Олонхын нэр дэвшүүлсэн Ерөнхий сайдыг томилох саналыг Ерөнхийлөгч тав хоногийн дотор УИХ-д оруулна
УИХ-ын анхдугаар чуулган өнөөдөр хуралдах гэж байна.
Анхдугаар чуулгантай холбоотой Үндсэн хуулийн нэмэлт өөрчлөлтөөр шинэ Засгийн газар бүрдэх үйл явц, шинэ Засгийн газар бүрдтэл бүрэн эрхтэй байх засаглалын хэлбэрүүдийг танилцуулж байна.
Нэг. ЕРӨНХИЙЛӨГЧ ЗАСГИЙН ГАЗРЫН ГИШҮҮДИЙГ ТОМИЛОХОД ОРОЛЦОХ ЭРХГҮЙ
Ерөнхий сайдыг томилохдоо Үндсэн хуулийн 39 дүгээр зүйлийн 2 дахь хэсэгт заасны дагуу "Улсын Их Хуралд олонхи суудал авсан нам, эвслээс нэр дэвшүүлсэн хүнийг; аль ч нам, эвсэл олонхын суудал аваагүй бол хамгийн олон суудал авсан нам, эвсэл бусад нам, эвсэлтэй зөвшилцөн олонхыг бүрдүүлж нэр дэвшүүлсэн хүнийг; бусад тохиолдолд Улсын Их Хуралд суудал авсан нам, эвсэл зөвшилцөн олонхыг бүрдүүлж нэр дэвшүүлсэн хүнийг Ерөнхий сайдаар томилох саналыг Ерөнхийлөгч тав хоногийн дотор Улсын Их Хуралд оруулна".
Ерөнхий сайдыг УИХ-аас сонгосны дараа Ерөнхий сайд ямар ямар яамтай байх, хэдэн сайдтай байх талаарх саналаа хууль хэлбэрээр танилцуулна. Ингэхдээ Үндсэн хуулийн 39 дүгээр зүйлийн 3 дахь хэсэгт заасны дагуу "Монгол Улсын Ерөнхий сайд Засгийн газрын бүтэц, бүрэлдэхүүн, түүнд өөрчлөлт оруулах тухай хуулийн төслийг Ерөнхийлөгчтэй зөвшилцөн Улсын Их Хуралд өргөн мэдүүлнэ. Ерөнхий сайд энэ асуудлыг Ерөнхийлөгчтэй долоо хоногийн дотор зөвшилцөж чадаагүй бол Улсын Их Хуралд өөрөө өргөн мэдүүлнэ".
Засгийн газар ямар ямар яамтай, хэдэн сайдтай байх талаарх хуулийг УИХ-аас баталсны дараа Ерөнхий сайд хэн хэнийг Засгийн газрын гишүүнээр томилохоо өөрөө шийднэ.
Ингэхдээ Үндсэн хуулийн 39 дүгээр зүйлийн 4 дэх хэсэгт заасны дагуу "Засгийн газрын гишүүнийг Улсын Их Хурал, Ерөнхийлөгчид танилцуулснаар Ерөнхий сайд томилж, чөлөөлж, огцруулна. Засгийн газрын гишүүн Улсын Их Хуралд тангараг өргөнө" гэжээ.
Хоёр. УИХ-ЫН АНХДУГААР ХУРАЛДААН ХУРАЛДТАЛ ЕРӨНХИЙЛӨГЧ ЦОРЫН ГАНЦ ЗАСАГЛАЛ БИШ
УИХ шинээр сонгогдсон гишүүд тангараг өргөтөл хүчинтэй ажиллаж байгаа. Энэ тухай Үндсэн хуулийн 23 дугаар зүйлийн 2-т "Улсын Их Хурлын гишүүний бүрэн эрх нь Төрийн сүлдэндээ тангараг өргөснөөр эхэлж, Улсын Их Хурлын дараагийн сонгуулиар шинэ сонгогдсон гишүүд тангараг өргөснөөр дуусгавар болно" гэж бий.
Ерөнхий сайд У.Хүрэлсүх, түүний Засгийн газар дараагийн Ерөнхий сайдыг сонгогдох хүртэл бүрэн эрхээ хэрэгжүүлсэн хэвээр байгаа. Энэ тухай Үндсэн хуулийн 40 дүгээр зүйлийн 2 дах хэсэгт зааснаар "Засгийн газрын бүрэн эрх Улсын Их Хурлаас Ерөнхий сайдыг томилсноор эхэлж, шинэ Ерөнхий сайдыг томилсноор дуусгавар болно" гэж байдаг билээ.
