Кени улсад хуралд оролцоод ирсэн 19 төлөөлөгчийг бүрэн тусгаарлажээ

Өнөөдөр буюу арваннэгдүгээр сарын 16-ны өглөө Африкаас манай улсад ирсэн зорчигчдоос гоц халдварт Холер өвчний шинж тэмдэг илэрсэн гэх мэдээлэл цахим орчинд тархаад байна.

Энэ талаар ЭМЯ-ны Нийгмийн эрүүл мэндийн газрын дарга Д.Нарангэрэлээс тодруулахад "Энэ сарын 11-14-ний өдөр Африкийн Кени улсад болсон олон улсын хуралд манай улсын төрийн болон төрийн бус байгууллагын 20 төлөөлөгч оролцсон.

Бидэнд ирүүлсэн мэдээллээр 13-ны өдөр тэдгээр төлөөлөгчийн нэг нь холер өвчнөөр өвчилж, тухайн улсын эмнэлэгт хэвтэн эмчлүүлэхээр болсон.

Харин өнөөдөр Кениэс Монголд 19 төлөөлөгч нь ирсэн. 

Тэднийг тухайн өвчтөнтэй хуралд хамт оролцсон учраас хавьтагч гэж үзэн урьдчилан сэргийлэхийн тулд бүрэн тусгаарлаж, шинжилгээ авч байна.

Тусгаарлагдсан төлөөлөгч дунд холер өвчнөөр өвдсөн гэх ямар нэг шинж тэмдэг, зовиур илрээгүй.

Төлөөлөгчид өнөөдөр 05:00,14:00,16:00 цагийн нислэгээр тус тус ирсэн бөгөөд Мэргэжлийн байгууллагуудын хамтарсан баг зорчин ирсэн онгоцыг мөн халдваргүйжүүлсэн.

Холер өвчнөөр өвдсөн хүн манай улсын Дэд сайд биш" гэлээ.