"Жаст"-ын Ш.Батхүү, хотын дарга асан Э.Бат-Үүл, Б.Чулуудай нар санаатайгаар хугацаа хожиж, хөөн хэлэлцэх хугацааг дуусгах гэж байна

Гэрэл зургийг mpa.mn

Авлигатай Тэмцэх Газраас мэдээлэл хийж байна. 

Энэ удаагийн мэдээллээр гаалийн байцаагч нарын бүлэглэн үйлдсэн авлигын хэргийн бичлэгийг үзүүлэх юм байна. Мөн АТГ-аас зөвлөмж хүргүүлсээр байхад авлигын гэмт хэрэг, зөрчил гарсаар байгаа, зарим гэмт хэргийг нэмэлт мөрдөн байцаалтад буцаасан ч АТГ-т ирүүлэхгүй байгаа талаар холбогдох албан тушаалтнууд мэдээлэл хийнэ.  

ШУУД ҮЗЭХ: 

АТГ-ын Олон нийттэй харилцах асуудал хариуцсан ахлах ажилтан, ахлах комиссар Т.Баярхүү “АТГ газар хуулиар хүлээсэн үүргийнхээ дагуу төрийн байгууллагуудад авлигын эсрэг зөвлөмж хүргүүлдэг. Гэтэл зөвлөмж өгсөөр байтал авлигын гэмт хэрэг гарсаар байна. 

Мөн албан тушаалтнуудын холбогдсон авлигын хэргийн мөрдөн байцаалтын ажиллагааг дуусгаж, шүүхэд шилжүүлсэн ч АТГ-т буцаж ирүүлэхгүй 8-9 сар болж байгаа хэргүүд байна. Гэтэл эдгээр хэргийг АТГ зориудаар удааж байгаа мэтээр мэдээлэл цацагдах боллоо. 

Тухайлбал, “Жаст” группийн ерөнхий захирал Ш.Батхүүгийн холбогдсон хэргийг 2019 оны нэгдүгээр сарын 7-ны өдөр шүүхэд шилжүүлэх саналтайгаар Нийслэлийн прокурорын газарт хүргүүлсэн. Ингээд анхан шатны шүүхээс энэ оны гуравдугаар сарын 5-ны өдөр хэргийг нэмэлт мөрдөн байцаалтад буцаасныг Ш.Батхүү нь долоодугаар сарын 19-ны өдөр УДШ-д хяналтын журмаар гомдол гаргасан. 

Мөн Э.Бат-Үүл, Б.Чулуудай нарт холбогдох хэргийг 2018 оны арваннэгдүгээр сарын 30-ны өдөр шүүхэд шилжүүлэх саналтайгаар НПГ-т хүргүүлсэн. Чингэлтэй дүүргийн эрүүгийн хэргийн анхан шатны шүүх 2019 оны хоёрдугаар сарын 19-ны өдөр урьдчилсан хэлэлцүүлгээр хянан хэлэлцээд нэмэлт мөрдөн байцаалтад буцаасан. Э.Бат-Үүлийн өмгөөлөгч 2019 оны зургаадугаар сарын 20-ны өдөр хянатын журмаар гомдол гаргасан. 

Эдгээр хэргүүдийн хувьд яллагдагч нарын гэм буруугийн асуудлыг шүүхээр хэлэлцээгүй бөгөөд хэрэг шалгах процесстой холбоотой гомдлуудыг удаа дараа үндэслэлгүй гарган хугацаа хожиж байна. Гэмт хэргийн хөөн хэлэлцэх хугацааг өнгөрөөх зорилгоор үндэслэлгүй гомдол гаргаж байна АТГ-аас үзэж байгаа. Энэ бүх хугацаанд хэргийн хөөн хэлэлцэх хугацаа тоологдож байгаа бөгөөд зарим этгээдэд ял завших боломжийг олгож байна. 

Гэтэл үүнийг АТГ, прокурор, шүүхийн байгууллагууд санаатайгаар удааж байгаа мэт ойлголтыг нийгэмд түгээж байна. 

Хамгийн их удаж байгаа хэрэг 2016 оны арванхоёрдугаар сарын 21-нд шүүхэд шилжүүлсэн ч өнөөдрийг хүртэл шийдвэрлэгдээгүй байна.   

Б.Гарамгайбаатар, Н.Батбаяр нарын хэргийг 2018 оны есдүгээр сард шүүхэд шилжүүлсэн боловч удааширсаар байгаад хөөн хэлэлцэх хугацаа дуусаж, хэрэгсэхгүй болсон. Энэ хугацаанд хэргийг шалгасан мөрдөгчийн ажил ямар ч үр дүнгүй болж байна" гэлээ.