Жижиг дунд үйлдвэрлэгчид шинэ бүтээгдэхүүнээ танилцуулж байна

Жижиг дунд үйлдвэрийн бүтээгдэхүүн үйлчилгээ, дэвшилтэт бүхнийг жил тутамд дэлгэн үзүүлдэг ““Жижиг дунд үйлдвэрийн бүтээгдэхүүн үйлчилгээ, технологи-2019” олон улсын үзэсгэлэн худалдаа өнөөдөр нээлтээ хийлээ. 

Үзэсгэлэнгийн нээлтэд МҮХАҮТ-ын дарга Т.Дүүрэн, Нийслэлийн засаг дарга бөгөөд Улаанбаатар хотын захирагч С.Амарсайхан, ОХУ-аас Монгол Улсад суугаа Элчин сайдын яам, Худалдааны төлөөлөгчдийн газрын тэргүүн М.В.Васильев, ОХУ-ын “Бизнес Контакт” ХХК-ний Ерөнхий захирал А.А. Сидоров болон Австрали Улсаас Монгол Улсад суугаа Элчин сайд Дайв Воусин, БНЭУ-аас Монгол Улсад суугаа Элчин сайд О.Р.Меена нар оролцлоо. 

 

Үзэсгэлэнг нээж МҮХАҮТ-ын дарга Т.Дүүрэн хэлэхдээ,”Бид жижиг дунд болон бичил бизнес эрхлэгчдэд тэгш боломж олгох, бараа бүтээгдэхүүнийг нь сурталчлах, борлуулалтыг нэмэгдүүлэхэд дэмжлэг үзүүлэх зорилгоор бие дааж лангуу авах боломжгүй бичил бизнес эрхлэгчдэд үнэ төлбөргүй тусгай цэг ажиллуулж байна” гэлээ.    

 

Мөн Нийслэлийн Засаг дарга бөгөөд Улаанбаатар хотын захирагч С.Амарсайхан оролцож, энэ удаагийн үзэсгэлэнд нийслэлийн таван дүүргийн жижиг дунд үйлдвэр эрхлэгчдийн бүтээл тавигдсантай танилцаж, “Үйлдвэрлэл эрхлэгчдийн бизнесийн үйл ажиллагааг дэмжин урамшуулах, өрсөлдөх чадварыг нэмэгдүүлэх зорилгоор жил бүр болдог энэ үзэсгэлэн-худалдаа хувийн хэвшлийнхэнд үзүүлж буй бодит дэмжлэг болох нэг арга хэлбэр болж буй”-г онцолж байв. Мөн нөгөө талаар шинэ бүтээгдэхүүн, үйлчилгээг сурталчлан таниулдаг. Энэ утгаар үндэсний үйлдвэрлэгчдийн бүтээгдэхүүн сав баглаа, боодлоос эхлээд чанарын хувьд сайжирч байгаа нь сайшаалтай байна гэв.

 

 “Жижиг дунд үйлдвэрийн бүтээгдэхүүн үйлчилгээ, технологи-2019” Олон улсын үзэсгэлэн 5 дугаар сарын 19-нийг дуустал үргэлжилнэ.