СТАТИСТИК: ОХИД Монголын түүх, газар зүйгээс бусад хичээл дээр ХӨВГҮҮДЭЭС ИЛҮҮ байна

Ч.Болортуяа

2019 оны 3 сарын 26

iKon.MN

Гэрэл зургийг MPA.mn

- Боловсрол тэгш бус байдлын шалтгаан болох нь -

Орон нутгаас Дорнод аймаг, нийслэлээс Сүхбаатар дүүргийн ерөнхий боловсролын сургууль төгсөгчдийн элсэлтийн ерөнхий шалгалтын үзүүлэлт хамгийн сайн байгааг бид өмнөх нийтлэлдээ дурдсан.

ЭЕШ-ын дундаж дүнгээрээ сүүл мушгиж буй аймагт Баянхонгор, Булганыхан байгаа бол хотоос Багахангай дүүрэг байгаа юм.

Тэгвэл хүйсийн хувьд, бидэнд байгаа 2016-2018 оны ЭЕШ-ын дүнгээр охид Газар зүй, Монголын түүхээс бусад хичээл дээр хөвгүүдээс илүү оноотой байна.

iKon.mn “Боловсрол тэгш бус байдлын шалтгаан болох нь” сэдвийн хүрээнд цуврал контентууд хүргэж байгаа билээ.

Бид энэ удаад ерөнхий боловсролын сургууль төгсөгчдийн элсэлтийн ерөнхий шалгалтын статистик мэдээллийг дэлгэрэнгүй байдлаар хүргэж байна.

Ингэхдээ хүйсийн харьцуулалт, орон нутаг, дүүргүүдийн дундаж дүнг 2016-2018 оны дүнгээс нэгтгэсэн бол шалгалтын ерөнхий чанарын дундаж оноог хичээл тус бүрээр нь 2012-2018 оны статистикийг нэгтгэн харууллаа.

Нэг. Дорнод, Өвөрхангай амжилтаа хадгалсаар байна

2016-2018 оны буюу гурван жилийн үзүүлэлтийг харвал Дорнод, Өвөрхангай хоёр тэргүүлэх байраа булаалдсаар өмнө, хойноо орж явааг харж болно.

Гэтэл бусад аймгийн хувьд тухайлбал, 2018 онд сүүл мушгисан Баянхонгор аймаг гэхэд 2017 онд 6-р байрт жагсаж байсан байх юм.

Өөрөөр хэлбэл дараах "график 1"-ээс харвал Дорнод, Өвөрхангай, Дархан-Уул аймгууд бусад аймгаа тогтмол тэргүүлдгээс гадна сургалтын чанар тогтвортой хадгалагддаг зүй тогтол ажиглагдаж байна.

Харин Баянхонгор, Говьсүмбэр, Ховд, Өмнөговь аймагт боловсролын чанар уламжлагдах чанар ажиглагдсангүй, шалгалтын дүн өндөр хэлбэлзэлтэй байна.

Мөн төгсөгчдийн ЭЕШ-ын дундаж оноогоор 21 аймагт эзлэх байраа хамгийн сайн ахиулж буй аймаг бол Хэнтий байна.

График 1, 21 аймгийн ЕБС төгсөгчдийн 2016-2018 оны ЭЕШ-ын дундаж оноог байр эзлүүлэн харвал,

(Өмнөх жилээс ахисныг цагаанаар, буурсныг улбар шар өнгөөр үзүүлэв)

Хүснэгт 1, 2018 оны үзүүлэлтийг хүснэгтэлж харуулбал:

	Аймаг, дүүргийн нэр	Нийт шалгалтын тоо	Анхны онооны дундаж	Хэмжээст онооны дундаж	Байр
Аймгууд
1	Дорнод	2446	43.2	535.3	I
2	Увс	3033	42.2	520.6	II
3	Өвөрхангай	4494	40.9	520.4	III
4	Дархан-Уул	4837	40.8	516.2	IV
5	Дорноговь	2293	39.6	508.7	V
6	Ховд	3657	39.9	508.2	VI
7	Говьсүмбэр	964	39.2	505.8	VII
8	Завхан	3921	38.1	500.2	VIII
9	Говь-Алтай	2891	38.9	499.8	IX
10	Орхон	4595	37.9	499.7	X
11	Хөвсгөл	5811	37.8	498.9	XI
12	Хэнтий	2844	37.7	496	XII
13	Архангай	4498	37.8	494.7	XIII
14	Төв	3175	37	494.6	XIV
15	Дундговь	1927	37	493.6	XV
16	Сэлэнгэ	4805	37.2	492.8	XVI
17	Сүхбаатар	2220	37	492.1	XVII
18	Баян-Өлгий	2676	38.9	491.9	XVIII
19	Өмнөговь	3209	37.5	488.7	XIX
20	Булган	2412	36.1	488.1	XX
21	Баянхонгор	2868	37	487.7	XXI
Дүүргүүд
1	Сүхбаатар	10209	43.6	531.6	I
2	Баянгол	8160	42.6	526.1	II
3	Багануур	1880	40.8	516	III
4	Баянзүрх	12923	41.1	515	IV
5	Чингэлтэй	5593	39.9	505.4	V
6	Хан-Уул	5351	38.5	498.2	VI
7	Сонгинохайрхан	9216	36.1	485.3	VII
8	Налайх	1153	35.1	481.2	VIII
9	Багахангай	172	34.5	470.5	IX

"График 1, 2" болон дээрх хүснэгтээс таны хүүхэд Монгол Улсын хаана амьдарч байгаагаасаа шалтгаалан авч буй боловсрол ийм хэмжээний ялгаатай байгааг харж болно.

Улаанбаатарын хувьд гэхэд, хамгийн сайн үзүүлэлттэй байгаа Сүхбаатар дүүрэг дэх ЕБС-ийн сургуулийг төгсөж буй хүүхдүүд Багахангай дүүрэгт амьдарч байгаа хүүхдүүдээс дунджаар 60 (800 онооны харьцуулалтаар) оноогоор илүү байна.

Мөн орон нутгийг тэргүүлж буй Дорнодын төгсөгчдийн дундаж оноо Улаанбаатарын хамгийн сайн байгаа Сүхбаатар дүүргээс дөрөв орчим оноогоор илүү сайн байгааг та харж байгаа байх.

График 2, 2018 оны үзүүлэлтийг график болгож харвал аймаг, дүүргүүдийн ялгаа илүү тодорхой харагдах ажээ.

Хоёр. Охид Монголын түүх, Газар зүйгээс бусад хичээл дээр хөвгүүдээс илүү байна

Ерөнхий боловсролын сургууль төгсөгчдийн шалгалтын дундаж оноог хүйсээр харьцуулж харвал сүүлийн гурван жил гэхэд охид давамгай байгааг харж болно.

Нийгэмд хөвгүүд математик, физик гэх мэт байгалийн шинжлэх ухааны хичээлээр илүү сайн, "толгойтой" гэх тогтсон ойлголт байх нь бий. Тэгвэл статистик үүнийг үгүйсгэж байна. Өөрөөр хэлбэл, Монголын охид хөвгүүдээс 10 хичээлийн наймд нь илүү гэдгээ сүүлийн гурван жил нотолжээ (Харамсалтай нь хүйсийн хувьд харьцуулсан дата 2016 оноос өмнөх нь бидэнд одоогоор олдоогүй байна).

Хүйсийн хувьд зөрүүтэй энэ байдал улс орон болгонд өөр байгаа бөгөөд АНУ-ын SAT шалгалтын хувьд гэхэд сүүлийн 50 жил хөвгүүд охидоос давамгай байж ирснийг "график 6" харах боломжтой.

Учир шалтгааныг бид дараагийн нийтлэлээрээ судлаачдын хамт хүргэх болно.

График 3, ЭЕШ-ын дундаж оноог хүйсээр нь харьцуулбал, 2018 он

График 4, ЭЕШ-ын дундаж оноог хүйсээр нь харьцуулбал, 2017 он

График 5, ЭЕШ-ын дундаж оноог хүйсээр нь харьцуулбал, 2016 он

График 6, АНУ-ын SAT шалгалтын дундаж оноог хүйсээр харьцуулсан байдал,

http://www.aei.org/publication/2016-sat-test-results-confirm-pattern-thats-persisted-for-45-years-high-school-boys-are-better-at-math-than-girls/?fbclid=IwAR0a_IjTOITfY1oRxPY3IqLrQZKNVRLPPtp6VZrmlYuuY3_kf4xk1MZe-BM

Гурав. 2012 оноос хойш ЭЕШ –ын ерөнхий үзүүлэлт

Элсэлтийн ерөнхий шалгалтаар:

Математик,
Монгол хэл,
Нийгмийн ухаан,
Англи хэл,
Орос хэл,
Газар зүй,
Физик,
Биологи,
Хими,
МУ-ын түүх гэсэн 10 хичээлээр жил бүр шалгалт авч буй. Эдгээр хичээл тус бүр дээрх шалгалтын дундаж оноо сайжирч байна уу, үгүй юу гэдгийг 2012 оноос хойшх үзүүлэлтийг харьцуулан үзүүлж байна.

А.О.Д – гэдэг нь тухайн шалтгалтын даалгавар гүйцэтгэлийг 100 оноо гэж үзвэл түүнээс авсан үнэлгээг хэлж буй.
Харин Х.О.Д гэдэг нь төгсөгчийн шалгалтын оноог 800 оноотой дүйцүүлэн жагсаахыг хэлнэ.

График 7, ЭЕШ-ын дундаж оноо, хичээл тус бүрээр, 2012-2018 он,