Мандал Даатгал ХК ногдол ашиг хуваарилахаар боллоо

Мандал Даатгал ХК нь 2018 онд IPO хийснээр даатгалын салбар дахь анхны хувьцаат компани болсон бөгөөд санхүүгийн голлох үзүүлэлтүүдээрээ салбартаа тэргүүлсээр байна.

Мандал Даатгал ХК-ийн Төлөөлөн Удирдах Зөвлөлийн 2019 оны 2-р сарын 18-ны өдрийн ээлжит бус хурлын шийдвэрээр 2018 оны цэвэр ашгаас хувьцаа эзэмшигчиддээ нэгж хувьцаанд 100 төгрөг буюу нийт 624,301,600 төгрөгийн ногдол ашиг хуваарилахаар шийдвэрлэлээ.

Ногдол ашиг авах эрхтэй хувьцаа эзэмшигчдийн нэрсийн жагсаалтыг 2019 оны Хувьцаа эзэмшигчдийн ээлжит хурлын бүртгэлийн өдрөөр гаргах бөгөөд 2019 оны 5-р сарын 1-ээс 5-р сарын 31-ны өдрийн хооронд “Үнэт цаасны төвлөрсөн хадгаламжийн төв” ХХК дахь хувьцаа эзэмшигчдийн дансанд байршуулна.

Мандал Даатгал нь 2018 онд 2 тэрбум төгрөгийн цэвэр ашигтай ажиллахаар төлөвлөсөн бөгөөд цэвэр ашгийн бодит гүйцэтгэл 3.9 тэрбум төгрөг буюу төлөвлөснөөс 90 хувиар давсан биелэлттэй байна. 2019 онд компани 5.5 тэрбум төгрөгийн ашигтай ажиллаж, амжилтын буухиагаа үргэлжлүүлэхээр төлөвлөж байна.

Амжилт бүрийн маань ард хана мэт бат зогсдог мянга мянган харилцагчид болон хөрөнгө оруулагч нартаа талархал илэрхийлье.

1. ДААТГАЛЫН ҮЙЛ АЖИЛЛАГАА

2018 оны байдлаар 71,084 хувь хүн болон албан байгууллагын эрсдэлийг даатгаж, нийт 27.8 тэрбум төгрөгийн хураамжийн орлоготой ажиллалаа. Энэ нь өнгөрсөн онтой харьцуулахад 23%-аар өссөн үзүүлэлт юм.

Хураамжийн орлогын 91 хувийг голлох 6 даатгалын хэлбэр эзэлж байгаа бөгөөд эдгээр 6 бүтээгдэхүүний багц харьцангуй жигд байна.

2018 онд нийт 7,293 даатгуулагчид 4.3 тэрбум төгрөгийн нөхөн төлбөрийг олгосон. Нийт нөхөн төлбөрийн зардал өнгөрсөн оноос 8%-аар буурсан үзүүлэлттэй байна.

2. ХӨРӨНГӨ ОРУУЛАЛТЫН ҮЙЛ АЖИЛЛАГАА

Хураамжийн орлого нэмэгдэж, олон нийтэд нээлттэй хувьцаагаа санал болгож, санхүүжилт татсантай холбоотойгоор мөнгөн хөрөнгийн хэмжээ өнгөрсөн оноос 11.9 тэрбум төгрөгөөр нэмэгдсэн байна. Энэ нь хөрөнгө оруулалтын орлого нэмэгдэх суурь болж байна.

2018 онд хөрөнгө оруулалтын орлого 2.2 тэрбум төгрөгт хүрсэн бөгөөд хөрөнгө оруулалтын дундаж өгөөж 15% байна.

3. САНХҮҮГИЙН ҮЗҮҮЛЭЛТ

2018 оны байдлаар цэвэр ашгийн дүн 3.9 тэрбум төгрөгт хүрч өслөө. Цэвэр ашиг өссөнөөр нийт хөрөнгийн өгөөж өнгөрсөн оноос 8 хувиар өсч 14%-д, өөрийн хөрөнгийн өгөөж 16 хувиар өсч 36%-д тус тус хүрчээ.

4. ХУВЬЦААНЫ МЭДЭЭЛЭЛ

2-р сарын 18 өдрийн МХБ-ийн арилжаагаар нэгж хувьцааны үнэ 5,260 төгрөгөөр хаагдлаа. 9-р сарын 24-нд хоёрдогч зах зээлд арилжаалагдаж эхэлснээс хойш 2.2 тэрбум төгрөгийн хувьцаа арилжаалагдаад байна.

5. САНХҮҮГИЙН ТАЙЛАН

Орлогын хураангуй тайлан

Санхүүгийн байдлын хураангуй тайлан