Монгол улсын эдийн засаг 2018 оны эхний хагаст өмнөх оны өсөлтийг ахиулж 6.3 хувийн өндөр өсөлттэй гарсан нь уул уурхайн салбарын хөрөнгө оруулалт тэлж, өрхийн зээл олголт нэмэгдэж, хэрэглээ өссөн зэрэгтэй холбоотой байна.
Азийн хөгжлийн банкнаас Монгол Улсын 2018-2019 оны эдийн засгийн төлөв байдлын шинэчилсэн мэдээллийг танилцууллаа.
АХБ-ны Ахлах эдийн засагч Деклан Магий “Эдийн засгийн гол өсөлт нэмэгдэхэд Монгол Улсын нүүрсний экспортын өсөлт мөн хүлээлтийг давсан иргэдийн хэрэглээ голлон нөлөөлсөн юм. Эдийн засгийн өсөлтийн хажуугаар уул уурхайн хөрөнгө оруулалт цаашид үргэлжлэх хэдий ч түүний өсөлт саарах хандлагатай байна. Ингэснээр ирэх онд Монголын дотоодын нийт бүтээгдэхүүний хэмжээ ялигүй буурах хандлагатай байна” гэлээ.
Эдийн засгийн өсөлтийн гол нөлөөлөл үзүүлж буй хөрөнгө оруулалт нь ДНБ-ий 12.6 хувийг бүрдүүлж байгаа бол өрхийн зээл эрс өссөнтэй холбоотойгоор хэрэглээ нь ДНБ-ий 3.9 хувийг тус тус бүрдүүлж байна.
Энэ жил уул уурхайн салбарын хувьд үйл ажиллагаа эрчимжиж импорт өссөн нь нийт импортын өсөлт нийт экспортын өсөлтөөс давж цэвэр экспортын ДНБ-д эзлэх хувийн жин 10.3 хувиар буурахад нөлөөлсөн талаар мэдээлэв.
Монгол Улс дахь Суурин төлөөлөгч Ёланда Фернандез Ломмен “Эдийн засгийн гүйцэтгэл 2018 онд хүлээлтийг давсан байна гэж хэлж болно. Тодруулбал “Өрхийн зээл олголт эрс нэмэгдсэнээс иргэдийн бодит хэрэглээ өмнөх таамгийг давлаа. Уул уурхайн салбарт хийгдэж буй хөрөнгө оруулалт эдийн засагт чухал үүргийг гүйцэтгэсэн хэвээр байна.