Зуны гурван сарыг зургаа юм шиг санаж, нозоорсон монголчуудын ухамсарын өдрүүд эхэлж байх шиг байна.
Гэнэт л ажлаа санасан юм шиг бөөнөөрөө уухай хашгираад л дайрдаг өдрүүд гэх үү дээ. Өчигдөр есдүгээр сарын 1-ний өдөр тохиов. Хаа сайгүй л их, дээд болон дунд сургууль, цэцэрлэгүүд хичээлийн шинэ жилийн нээлтээ хийлээ.
Зургаан настнууд, цэцэрлэгийн багачуудын эцэг, эхээ дагаж уйлах, төрийн өндөрлөгүүдийн сургуулийн нээлтэд оролцож үг хэлэх зэрэгцэж, сүүлийн хоёр сар бужигнаагүйгээрээ л бужигналаа, манайхан.
Жилийн жилд л тэгдэг уламжлалтай хойно яая гэх вэ. Харин сургууль, цэцэрлэгийн бүртгэл эхлэхтэй зэрэгцээд бүхий л хүн үгээ хэлж, үстэй толгойгоо зулгааж эхэлсэн.
Цэцэрлэгт хүүхдээ бүртгүүлж чадаагүй эцэг, эхчүүд хонон өнжин дугаарлаад хоосон хоцорсноо гайхаж байна. Зарим нь сугалаа татаж, аз таарч хүүхдээ цэцэрлэгт өгсөнөө ярих. Дунд сургуулийн хүүхдүүд ч гэсэн анги танхимдаа багталцахгүй, дүрэмт хувцас нь чанаргүй гээд хэл ам их. Ерөнхийдөө Улаанбаатар хотод хүрэлцээтэй зүйл алга.
Гэтэл төр засгийнхан болохоор хүн амаа өсгөх бодлого баримталж ажиллаж байгаа гэх. Тэр дундаа эрх баригчид “Олуулаа” гэсэн уриалга гаргаж, янз бүрийн хууль гаргахаар ажиллаж байна. Хүүхэд бүрт сард 20 мянган төгрөг өгч байгаа.
Цаашлаад “Олуулаа” хуулийн төсөл батлагдвал хүүхэд гаргасны төлөө эхчүүдэд өгөх мөнгө нэмэгдэх талаар ч ярьж буй. Юу юугүй л таван сая хүнтэй болчих гээд л үзээд байна. Бүр 10 сая болбол сайн гэх. Яах вэ, төрөлтийг дэмжиж, гэртээ хүүхдээ хараад сууж байгаа ээжүүдэд төрөөс цалин мөнгө өгдөг болчихвол хүн амын өсөлт хурдсах нь мэдээж.
Бага ч гэсэн шүү дээ. Одоо ч гэсэн төрөлт нэг үеэ бодвол илт нэмэгдсэн. Харамсалтай нь шинэ төрсөн иргэд маань хаана сурч хүмүүжих вэ гэдэг асуудал өөрийн эрхгүй урган гарч байгаа юм. Үүнээс өмнө жирэмсэн ээжүүд хаана аюулгүй, сэтгэл амар, авлига хээл хахуульгүйгээр төрөх вэ. Сүүлийн 20 гаруй жил манай улс хүүхдэд зориулсан бүтээн байгуулалт хийгээгүй. Ганц нэг сургууль, цэцэрлэг нэмсэнийг эс тооцвол шүү дээ.
Эмнэлгийн барилга бол түй ч байхгүй. Харин энэ жил Ажиа гэгээний санаачилгаар боссон хүүхдийн эмнэлэг ашиглалтад орлоо. Гэхдээ төрөх эмнэлэг бол нэмэгдээгүй.
Эхчүүд хүүхдээ хаана төрүүлэх вэ гэж өдөр нь шаналж, шөнө нь хар дарж байна гээд хэлчихвэл сүржигнэсэн болохгүй. Арай гэж хоёр яс салаад, бяцхан үр нь хоёр нас хүрэхэд өгөх цэцэрлэг алга. Бүтэн хоёр жил ажилгүй суусны эцэст арай гэж цэцэрлэгийн бараа харуулах гэхээр олдохгүй.
Азтай нэг нь сугалаанд хожиж, цэцэрлэгт хүүхдээ өгч байна. Яах вэ, хахуульд өгчих ахиу мөнгөтэй бол цэцэрлэгт хүүхдээ өгч болох байх. Энэ мэтээр цэцэрлэгийн төлөө “дайтаж” дууссаны дараа сургуульд оруулах гэж дахиад л “байлдана” даа. Нэг ангид 40 шахсан олон хүүхэд сууна. Ядаж байхад зургаан настай сургуульд ордог болчихсон, жинхэнэ утгаараа жонхуу хутгаж байна.
Сургуулийн хүрэлцээ гэж байхгүй, хэдэн хүүхдүүд маань “гөөхий” болоод л сууна. Ийм байхад юун төрөлтийг дэмжих бодлого яриад байгаа юм, бүү мэд. Саалиа бэлтгэхээр саваа бэлд гэдэг үгийг манай төр засгийнхан мэддэг бололтой юм билээ. Ингээд бичихээр БШУЯ руу, салбарын сайд руу дайрч байна гэж ойлгох байх. Тийм биш, энэ асуудал өнөөдөр гэнэтхэн болчихсон юм биш шүү дээ. Ийм байдалтай олон жилийн нүүрийг үзэж байна.
Харин ч Л.Гантөмөр сайд энэ мэт асуудлуудыг засч залруулах, шинэчлэх гэж чадлынхаа хэрээр л ажиллаж байна гэж ойлгоод байгаа. Яг одоогоор нийгэмд өрнөж, хамгийн их шүүмжлэл дагуулж байгаа асуудал бол боловсролын тогтолцоо, сургууль цэцэрлэгийн хүрэлцээ, их, дээд сургуулийн төлбөр учраас хөндөхгүй байхын арга алга.
Сургууль, цэцэрлэгийн барилга барихгүй биш барьж л байна. Дараа жилийн намар гэхэд овоо хэдэн цэцэрлэг, сургууль баригдах тооцоотой байгаа юм билээ. Нийслэлээс хүртэл төлөвлөөд, төсөвлөөд явж байна. Салбар яам ч энэ асуудалд анхаарлаа хандуулж байгаа. Л.Гантөмөр сайд энэ салбарыг хариуцаж ажиллах хугацаандаа боловсролын салбарын хүнд суртал, гажуудлыг арилгахаар дөрвөн зорилтыг дэвшүүлсэн.
Нэгдүгээрт, боловсролын удирдлага, менежмент чанарын үнэлгээ, хяналтыг шинэчлэх, хоёрдугаарт, багшийн хөгжлийг сайжруулах, гуравдугаарт, хувь хүний хүсэл зорилгод тулгуурласан хөгжлийн шинэчлэл хийх дөрөвдүгээрт, сургалтын хүртээмжтэй, аюулгүй орчны шинэчлэл гэсэн зорилтууд багтаж байгаа юм билээ. Эхнээсээ ажил хэрэг болоод явж байна.
Тууштай хэрэгжүүлээд, хийгээд, энэ салбарын гажуудлыг засаад, хүрэлцээгүй байгаа сургууль, цэцэрлэгийг бариад явбал дорвитой үр дүн гарч л таарна. Аливаа ажил ганц, хоёр жилийн дотор оргилдоо хүрээд, бүх зүйл сайхан болчихгүй. Тэр дундаа олон жил болоод, тартагтаа тулчихсан боловсролын салбарыг өөрчлөх, шинэчлэхэд дорвитой бодлого, хугацаа хэрэгтэй.
Аль эрт л тийм байсан. Харамсалтай нь манай төрд залгамж халаа гэж байдаггүй болохоор нэгнийнхээ хийсэн ажлыг нөгөө нь баллуурдах маягтай явсаар он удаж байна. Түрүүчийн дөрвөн жил УИХ-ын гишүүн Ё.Отгонбаяр боловсролын салбарын “жолоо”-г атгасан.
Тэр хугацаандаа янз бүрийн хөтөлбөр хэрэгжүүлж, туршиж, бөөн л юм болсон. Бас л боловсролын салбарыг шинэчлэх зорилготой л үзэж байсан байх. Гэвч дараагийн Засгийн газар бүрэлдэж, шинэ сайд гарч ирээд тэр бүх ажил нь зогссон гэхэд болно.
Өнөөх сүрхий Кембрижийн хөтөлбөр нь хэрэгжээд байгаа сурагтай боловч дорвитой үр дүн харагдахгүй л юм. Энэ мэтээр нэг хүн гарч ирээд л өөрийнхөө хүрээнд шинэчлэл хийх гэж зүтгэдэг. Ерөөсөө л Монгол Улсын амьдрал, бүхий л салбарууд сонгуулийн дөрвөн жилийн хооронд л өрнөж байна.
Одоо дараагийн сонгуулиар Засгийн газар бас л солигдох биз. Тэр үед салбарын сайдууд ч давхар солигдох нь дамжиггүй. Дахиад л өөр нэг Боловсролын сайд гарч ирээд, энэ дөрвөн жилд Л.Гантөмөр сайдын хийсэн бүхий л ажлыг хаяж, өөрөө шинээр эхлүүлэх байх. Юун түүний тавьсан дөрвөн зорилт, ёстой долоон уулын цаана хол шидэгдэнэ биз дээ, харин ч нэг. Түүнийхээ дараа өөрөө нэг, хоёр, эсвэл арван ч зорилт тавьж магадгүй. Ингээд л Монгол Улс дахиад боловсролын шинэчлэл, сургууль, цэцэрлэгийн хүрэлцээгээ ярьсаар л байх болох нь.
Ердөө л төрийн залгамж халаа алдагдсанаар энэ бүх болохгүй, бүтэхгүй зүйлүүд үргэлжилж байна. Уг нь нэг хүнээ найм, цаашлаад 12 жил хүртэлх хугацаанд салбарын сайд хийлгэх арга, чарга байдаггүй л юм байх даа. Тэгж болдоггүй юм гэхэд нэг сайдын хийж, хэрэгжүүлж байсан ажлыг дараагийнх нь үргэлжлүүлээд, илүү боловсронгуй болгоод л явмаар байна шүү дээ.
Тэгэхгүй өөрөө л шинэчлэгч болох гээд, нэг их ажил хийсэн болж харагдаж, өрөөлийг үгүйсгэх гэж зүтгэсээр шинэчилсэн ч юмгүй, хуучин нь ч хэвээрээ биш, жонхуу болоод байна. Монголын ирээдүй болсон мянга мянган үрс цэцэрлэггүй, сургуульдаа “гөөхий” болж, дээрээс нь сайд болгоны туршилтын “туулай” болсоор хэцүүдлээ.
Тиймээс болдог бол дараагийн дөрвөн жилд ч гэсэн Л.Гантөмөр сайдыг Боловсролын сайдаар нь үлдээж, шинэчлэлийнх нь эцсийг үзмээр л байна шүү дээ. Ойрын өдрүүдэд нийгмийн халуун сэдэв боловсролын салбар болоод байгаа учраас жишээ авсан гэдгээ дахиад хэлье. Түүнээс биш бүх салбарт л төрийн залгамж халаа үгүйлэгдэж байна. Одоо хувь хүний “од” болох гэсэн өвчинөөс илүү улс орны хөгжил чухал байна шүү дээ.