Жуков худалдааны төвөөс Кино үйлдвэр хүртэлх дулааны шугамыг шинэчлэх ажил хоёр сар үргэлжилнэ
Дэлхийн банкны хөнгөлөлттэй зээлээр санхүүжилтээр хэрэгжиж буй Улаанбаатар хотын дулаан хангамжийг нэмэгдүүлэх төслийн хүрээнд Баянзүрх дүүргийн нутаг дэвсгэр Жуков худалдааны төвөөс Кино үйлдвэр хүртэлх төв зам дагуух 2Д магистраль шугамын 250мм голчтой 282 метр хос шугамыг 400 мм голчтой болгож өргөтгөх ажил тавдугаар сарын 15-наас эхлэх юм байна.
Энэ талаар "УБДС" ТӨХК-ийн тархмал эх үүсвэрийн төслийн нэгжийн ахлагч Д.Баяртогтох "2025 онд Дэлхийн банкны санхүүжилтээр Жуков худалдааны төвөөс Кино үйлдвэр хүртэлх төв зам дагуух 2Д магистраль дулааны шугамыг өргөтгөх ажил хийгдэнэ. Ингэснээр 13, 15 дугаар хорооллын дулаан хангамж сайжрах, гэр хорооллын айлуудад дулааны эрчим хүчийг хүргэх боломжууд бүрдэх юм. Ашиглалтын хугацаа дууссан хүйтэн усны шугамыг шинэчлэх ажил давхар хийгдэнэ. Энэ жил дулааны шугамыг өргөтгөх тул 20-25 жил шинэчлэлт хийгдэхгүй.
2017 оноос хойш энэ хэсэгт дулааны шугамын өргөтгөл хийгдээгүй юм. Амгалан ДЦС-д өргөтгөл хийгдэж байгаатай холбоотойгоор энэ жил зайлшгүй өргөтгөхөөр боллоо.
Дулааны шугамыг угсрах ажлыг гүйцэтгэгч "МЭЗ" компанийн зүгээс наадмаас өмнө дуусгана гэж төлөвлөж байгаа. Гэрээний дагуу есдүгээр сарын 1-нд дуусгах ч хугацааг шахаж ажиллана" гэж мэдээллээ.
Дулааны шугамыг угсрах ажлыг гүйцэтгэх "МЭЗ" компанийн төлөөлөл "Одоогийн байдлаар шугамыг өргөтгөх материалын захиалга 80%-тай байна. Тавдугаар сарын 15-наас дулаан зогсохтой зэрэгцэн хоёр сарын хугацаанд дулааны 2Д магистраль шугамыг өргөтгөнө" гэв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
