Ж.Хунан: ЗГ-ын шийдвэр албажиж гарсан ч хүүхдийн эрхэлж болохгүй ажлын байрны жагсаалт хүчин төгөлдөр үйлчилж байгааг санах хэрэгтэй
Хүний эрхийн үндэсний комисс /ХЭҮК/-оос Засгийн газрын хаврын морин уралдааныг зохион байгуулах эрхийг сэргээсэн тухай асуудлаар өнөөдөр мэдээлэл хийв.
ХЭҮК-ын гишүүн Ж.Хунан хурдан морины унаач хүүхдийн эрхийн асуудлаар дараах байр сууриа илэрхийллээ.
Тэрбээр "Өвөл хаврын улиралд зохион байгуулагдаж буй хурдан морины уралдаан нь хүүхэд амь нас, эрүүл мэндээрээ хохирохыг улам нэмэгдүүлж байна. Энэ асуудлыг дахиж нэмэхгүйгээр аль болох улам багасгах хүүхдийн эрх зөрчигдөхөөс урьдчилан сэргийлэх нөхцөлийг бүрдүүлэх ёстой гэсэн шаардлагыг тавьж байгаа. Зуны улиралд эрх нь зөрчигдөхгүй, өвлийн улиралд л зөрчигдөөд байгаа асуудал байхгүй. Засгийн газрын 2019 оны 57 дугаар тогтоол хүүхдийн эрхийг хамгаалах асуудалд ахиц дэвшил байсан.
2022 онд Хөдөлмөр, нийгмийн хамгааллын сайдын тушаалаар батлагдсан хүүхдийн хөдөлмөр эрхэлж болохгүй ажлын байрны жагсаалтаар 11 дүгээр сарын 1-нээс тавдугаар сарын 1-ны өдөр хүртэл хүүхдээр хурдан морь унуулахыг хориглосон нь хүчин төгөлдөр үйлчилж байгаа.
Засгийн Газраас гаргасан уг шийдвэр албажиж гараагүй байгаа гэж ойлгосон. Зөвхөн амаараа мэдэгдсэн байгаа. Албажиж гарсны ард нөхцөл байдал илүү тодорхой болох байх. Гэхдээ үүнээс үл хамаарч хүүхдийн эрхэлж болохгүй ажлын байрны дээрх жагсаалт хүчин төгөлдөр үйлчилж байгаа гэдгийг санах ёстой.
ХЭҮК үүсгэн байгуулагдсан цагаасаа эхлэн хурдан морины уралдаантай холбоотой хүүхдийн эрхийн зөрчлийг үргэлж хөндөн гурван удаагийнхаа илтгэлд энэ асуудлыг оруулсан. Нийтдээ комиссын гишүүний 11 зөвлөмж, зургаан шаардлагыг Монгол Улсын Ерөнхийлөгч, Ерөнхий сайд, Аймаг, нийслэлийн засаг дарга нарт болон Хүүхэд, гэр бүлийн хөгжил, хамгааллын газрын дарга нарт явуулсан. Эдгээр нь бүгд хүүхдийн амь нас, эрүүл мэнд хохирохоос урьдчилан сэргийлэх эрхзүйн зохицуулалт, хамгаалалтыг боловсронгуй болгоход чиглэсэн байдаг.
Насанд хүрээгүй хүүхдээр морь унуулахыг хориглосон зөвлөмжийг НҮБ болон бусад хүүхдийн эрхийн байгууллагуудаас өгдөг. ХЭҮК энэ зөвлөмжийг дагаж байгаа" гэв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
