Нийслэлийг 2040 он хүртэл 240 гаруй их наяд төгрөгөөр хөгжүүлэх ерөнхий төлөвлөгөөг УИХ-д өргөн барив

Гэрэл зургийг MPA агентлагийн онцгой зөвшөөрөлтэйгөөр ашиглав

Засгийн газрын өнөөдрийн хуралдаанаар нийслэл Улаанбаатар хоттой холбоотой асуудлуудыг хэлэлцэн шийдвэрлэжээ. 

Тодруулбал өнөөдрийн хуралдаанаар

• Нийслэл Улаанбаатар хотын агаар, орчны бохирдлыг бууруулах арга хэмжээний тухай хуулийн төсөл,
• Нийслэл Улаанбаатар хотын 2040 он хүртэлх хөгжлийн ерөнхий төлөвлөгөө батлах тухай” Улсын Их Хурлын тогтоолын төслийг хэлэлцсэн байна. 

Энэ талаар нийслэлийн Засаг дарга Х.Нямбаатар танилцуулав.

Тэрбээр "1954 онд Монгол Улсын нийслэл анх удаагаа ерөнхий төлөвлөгөөгөө баталсан бөгөөд үүнээс хойш зургаа дахь удаагийнхаа ерөнхий төлөвлөгөөг боловсруулж, УИХ-д өргөн мэдүүлж байна. 

2040 он хүртэл Улаанбаатар хотыг хөгжүүлэх энэхүү ерөнхий төлөвлөгөөний үндсэн зарчим бол 20 минутын хотуудын нэгдэл буюу хүртээмжтэй хотыг бий болгох зорилтыг дэвшүүлж байна.  Үүгээр Улаанбаатар хотын 470, 000 гаруй га эдэлбэр газрыг гурван үндсэн хэсгээр төлөвлөсөн. 

2040 он гэхэд Улаанбаатар хоты хүн ам 2.5 сая хүрэх төлөвтэй байгаа тул тэдэнд үзүүлэх нийгмийн суурь үйлчилгээ, ногоон байгууламж, нийтийн тээвэр, авто замын сүлжээг нэмэгдүүлэх, хүнсний хангамжийг нэмэгдүүлэх таталцлын бүсүүдийг бий болгох зэрэг хот байгуулалтын стандартад тавигддаг бүхий суурь үзүүлэлтээр 2040 он хүртэл хөгжүүлэх төлөвлөгөөгөө боловсрууллаа. 

Шинэ төлөвлөгөөг боловсруулах явцад өмнөх ерөнхий төлөвлөгөөнүүдийн хэрэгжилтийг дүгнэсэн. 2020 он хүртэл хөгжүүлэх төлөвлөгөөний биелэлт 29.3 хувьтай байна. Энэ нь санхүүгийн нөөц бололцоогүйгээс шалтгаалан дэд бүтцийн хангамжийг нэмэгдүүлэх, өргөтгөх хөрөнгө зардлыг тусгаагүйгээс шугам сүлжээтэй хэсгүүддээ норм хэтрүүлж, хэт төвлөрүүлж, орон сууцжих бодлого явагдсан нь 2020 он хүртэл хөгжүүлэх ерөнхий төлөвлөгөөнд гарсан том алдаа байна. Мөн хууль тогтоомжийн уялдаагүй байдал, авлига албан тушаалын буруутай үйл ажиллагаанаас шалтгаалсан газар олголт, хотын норм дүрэм стандартыг зөрчиж барилгажих процесс явагдсан зэрэгтэй холбоотой. 

 

2040 он хүртэл хөгжүүлэх ерөнхий төлөвлөгөөг хэрэгжүүлэхэд ойролцоогоор 240 гаруй их наяд төгрөг зарцуулах урьдчилсан төлөвлөгөө гарч байгаа. Үүний 120 гаруй тэрбум төгрөгийг улс, нийслэлийн төсвийн хөрөнгөөс гаргана. Инженер, дулаан, цахилгаан хангамжийг нэмэгдүүлэх, шугам сүлжээг өргөтгөн шинэчлэх чиглэлээр улс нийслэлийн төсвийн хөрөнгийг чиглүүлнэ.

Харин инженер техникийн боломж бүрдсэн газруудад төр хувийн хэвшлийн хамтралаар 120 гаруй их наяд төгрөгийн бүтээн байгуулалтыг хийнэ. Хэмжигдэхүйуц үр дүнд хүрнэ гэж төлөвлөсөн.

Энэхүү төлөвлөгөөг 2017 оноос эхлэн боловсруулжээ.