ХОМ: Засгийн газрын гишүүдээс хамгийн их хөрөнгөтэй нь сайд Ч.Номин, С.Амарсайхан, Д.Амарбаясгалан нар
Авлигатай Тэмцэх Газраас төрийн өндөр албан тушаалтнуудын 2022 оны хөрөнгө, орлогын мэдүүлгийг нэгтгэн танилцуулсан.
Үүнээс Засгийн газрын гишүүдийн хөрөнгө, орлого өнгөрсөн онд хэрхэн өөрчлөгдсөнийг онцолж байна.
Соёлын сайд Ч.Номин 52.4 тэрбум төгрөгийн хөрөнгөтэйгөөр танхимаа тэргүүлж буй бол түүний дараа 14.4 тэрбум төгрөгийн хөрөнгөтэй Шадар сайд С.Амарсайхан, 14 тэрбум төгрөгийн хөрөнгөтэй Засгийн Газрын Хэрэг Эрхлэх Газар(ЗГХЭГ)-ын дарга Д.Амарбаясгалан нар бичигдэж байна. Харин Эрүүл мэндийн сайд С.Чинзориг жагсаалтын сүүлийг мушгив. Тэрбээр өөрийгөө 552 сая төгрөгийн хөрөнгөтэй гэж мэдүүлжээ.
График #1: ЗГ-ын Гишүүдийн 2022 оны хөрөнгө орлогын мэдүүлэг. Орлого, зээл, үл хөдлөх гэх мэд төрлөөр сонгон харьцуулж харах боломжтой.
Засгийн газрын гишүүдээс
- Хамгийн их орлоготой нь Эрчим хүчний сайд Б.Чойжилсүрэн. Түүний орлого 1.5 тэрбум төгрөг.
- Соёлын сайд Ч.Номин 11.5 тэрбум төгрөгийн үнэлгээтэй орон сууц барилга байгууламжтай нь танхимдаа тэргүүлэх үзүүлэлт.
- Хамгийн өндөр үнэлгээтэй тээврийн хэрэгсэлтэй сайд нь мөн Ч.Номин байна. Түүний тээврийн хэрэгслийн үнэлгээ нь 1.1 тэрбум байна. Харин Уул уурхай, хүнд үйлдвэрийн сайд Ж.Ганбаатар 1 тэрбум төгрөгийн үнэлгээ бүхий тээврийн хэрэгсэлтэй нь хоёрдугаарт бичигдэх дүн юм.
- Хамгийн их үнэт эдлэлтэй нь Боловсрол, шинжлэх ухааны сайд Л.Энх-Амгалан. Тэрбээр 1.6 тэрбум төгрөгийн үнэлгээ бүхий үнэт эдлэлтэй.
- Хамгийн их бэлэн мөнгөтэй сайд нь Ч.Номин. 2022 оны хөрөнгө орлогын мэдүүлэгтээ тэрбээр 2.4 тэрбум төгрөгийн бэлэн мөнгөтэйгөө мэдүүлжээ.
Хөрөнгийн өөрчлөлт
Засгийн газрын гишүүдийн 2021 болон 2022 оны хөрөнгө орлогын мэдүүлгийг харвал сайд нарын хөрөнгө нэг жилийн хугацаанд нийт 4.3 тэрбумаар өсжээ.
Онцолбол Эрчим хүчний сайд Б.Чойжилсүрэн, Сангийн сайд Б.Жавхлан нарын хөрөнгө жилийн дотор нэг тэрбум гаруйгаар нэмэгдсэн байна. Харин Боловсрол, шинжлэх ухааны сайд Л.Энх-Амгалангийн хөрөнгө 9.3 тэрбум, Соёлын сайд Ч.Номингийнх 4.4 тэрбум, Уул уурхай, хүнд үйлдвэрийн сайд Ж.Ганбаатарынх 3.8 тэрбум төгрөгөөр буурчээ.
Сонирхуулахад Ерөнхий сайд Л.Оюун-Эрдэнийн хөрөнгө 33.8 сая төгрөгөөр нэмэгдсэн байна.
График #2: 2021 vs. 2022 хөрөнгийн өөрчлөлт Засгийн газрын гишүүн тус бүрээр. Төрлөөр ялгаж харьцуулж харах боломжтой.
Мал аж ахуй
Монгол Улсын сайд, Олимп, нийтийн биеийн тамир, спортын Үндэсний хорооны дарга Б.Бат-Эрдэнэ эзэмшдэг малынхаа тоогоор бусдаасаа хавьгүй илүү боловч малын үнэлгээгээрээ ЗГХЭГ-ын дарга Д.Амарбаясгалан цойлж байна. Сайд Д.Амарбаясгалангийн 817 хонь, 60 үхэр, 96 адууны нийт үнэлгээ нь 1.1 тэрбум төгрөг.
Сайд нар бүгд тодорхой тооны малтай бөгөөд хамгийн бага малтай нь Гадаад харилцааны сайд Б.Батцэцэг, Эрчим хүчний сайд Б.Чойжилсүрэн нар юм.
График #3: Засгийн газрын гишүүдийн мал аж ахуй
| Нэр | Толгой | Дэлгэрэнгүй | Үнэлгээ |
|---|---|---|---|
| Л.Оюун-Эрдэнэ | 414 | Хурдан удмын адуу-5, Адуу-23, Үхэр-83, Хонь-154, Ямаа-149 | 200,175 |
| Д.Амарбаясгалан | 973 | Хонь-817, Адуу-96, Үхэр-60 | 1,128,835 |
| Б.Бат-Эрдэнэ | 3000 | Адуу-328, Үхэр-72, Хонь-2600 | 589,200 |
| Б.Батцэцэг | 5 | Хурдан удмын адуу-5 | 30,000 |
| Х.Болорчулуун | 260 | Адуу-260 | 208,000 |
| Ц.Даваасүрэн | 383 | Адуу-152, Хонь-180, Ямаа-50, Тэмээ-1 | 162,340 |
| Б.Жавхлан | 964 | Адуу-70, Хурдан удмын адуу-60, Хонь-800, Үхэр-34 | 621,410 |
| Х.Нямбаатар | 700 | Хурдан удмын адуу-35, Үхэр-21, Ямаа-157, Хонь-444, Адуу-43 | 236,050 |
| Г.Сайханбаяр | 26 | Үхэр-4, Адуу-22 | 23,000 |
| Н.Учрал | 200 | Хонь-150, Адуу-20, Хонь-30 | 31,400 |
| С.Чинзориг | 190 | Хонь-160, Адуу-30 | 20,000 |
| Б.Чойжилсүрэн | 6 | Адуу-6 | 4,000 |
Тээврийн хэрэгсэл
Хамгийн өндөр үнэлгээтэй тээврийн хэрэгсэлтэй нь Соёлын сайд гэдгийг дээр дурдсан. Түүний эзэмшилд Mercedes Benz G55-AMG, Nissan Patrol, Porsche Cayenne зэрэг таван машин байна.
Тээврийн хэрэгслийн үнэлгээгээрээ хоёрдугаарт бичигдэж буй Уул уурхай, хүнд үйлдвэрийн сайд Ж.Ганбаатарын эзэмшилд Lexus 570, Land Rover, Mercedes Benz S350L гэсэн гурван машин бий.
Харин Цахим хөгжил, харилцаа холбооны сайд Н.Учралын Mercedes Benz S400, G500, Lexus 570, Nissan Tiida гэсэн дөрвөн машины нийт үнэлгээ нь 885 сая төгрөг аж.
График #4: Засгийн газрын гишүүдийн эзэмшиж буй тээврийн хэрэгсэл. График дээр дарж дэлгэрэнгүй брэнд, загварыг харах боломжтой.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
34 СЭТГЭГДЭЛТЭЙ
|
