Уншиж байна ...
Зураг
Зураг

Казахстанд өнгөрсөн онд гарсан үймээний улмаас эвдэрч сүйдсэн худалдааны 350 байгууламжийг сэргээн барьжээ

П.Сайнжаргал, IKON.MN
2023 оны 2 сарын 5
iKon.MN
Зураг зураг

Казахстан улсад шингэрүүлсэн хийн түлшний үнийг нэмсэн явдлаас үүдэн өнгөрсөн оны нэгдүгээр сард олныг хамарсан үймээн самуун гарч байв. 

Энэхүү эмгэнэлт үйл явдал болоод нэг жил өнгөрсөнтэй холбогдуулан Казахстан улсын Ерөнхий прокурорын орлогч Елдос Килымжанов болон хууль сахиулах бусад байгууллагын дарга нар мэдээлэл өгсөн юм. 

Тодруулбал, 2022 онд болсон эмгэнэлт үйл явдлын улмаас Казахстаны цагдаагийн байгууллагаас эрүүгийн шинжтэй 4,623 гэмт хэрэгт мөрдөн шалгах ажиллагаа явуулжээ. Дотоодод үүссэн үймээн самуунтай холбоотойгоор,

  • Хүн амины гэмт хэрэг 91
  • Хулгай дээрэм 2,504
  • Хууль бус зэвсгийн наймаа 440
  • Эвдэн сүйтгэх үйлдэл 368
  • Бусдын эд хөрөнгөд санаатай хохирол учруулах гэмт хэргийн 188 тохиолдол бүртгэгдсэн байна. 
зураг
 

Энэ талаар "Өнгөрсөн жилийн нэгдүгээр сарын үймээн самууны улмаас 5,387 хүн хохирсон талаарх албан ёсны мэдээлэл бий. Үүний дотор 5,155 хүн бэртэж гэмтсэний 3,995 нь хууль сахиулах байгууллагын алба хаагч байсан. Нэгдүгээр сарын үйл явдлаас үүдэн 238 хүн амь насаа алдсан.

Олныг хамарсан үймээн самуун гарснаар ААН-үүд ойролцоогоор 80 сая ам.долларын (37.5 тэрбум тэнгэ) хохирол амссан байна. Улмаар ААН-үүдэд 16.7 тэрбум тэнгэ нөхөн олговор олгосон" гэдгийг албаныхан хэлж байв.

Тус улсын ерөнхийлөгч Касым-Жомарт Токаев ард түмэндээ хандаж 2022 оны нэгдүгээр сарын үйл явдалд оролцогчдод нэг удаагийн өршөөл үзүүлэх талаарх саналыг дэвшүүлсэн аж. Ингэснээр Казахстан улсын парламентаас өршөөл үзүүлэх тухай хуулийг баталжээ.

Хуулийн эх бичвэрт дараах зүйлсийг тусгасан байна. Үүнд:

Нэгдүгээр сарын 4-7-нд болсон жагсаал цуглаанд оролцсон хэргээр баривчлагдаж, яллагдагчаар татагдсан 1,700 орчим яллагдагчаас 1,000 гаруй хүн өршөөлд хамрагдах юм. Одоогийн байдлаар 1,095 хүн өршөөлд хамрагдаад байна.
Тус улсын шүүхээс хүнд гэмт хэрэг үйлдсэн 1,001 хүний ​​ялын хугацааг багасгасан аж.
Хөнгөн гэмт хэрэг үйлдсэн хүмүүсийг суллаж, бүх ялыг хэрэгсэхгүй болгосон. Харин хүнд гэмт хэрэгт холбогдсон этгээдүүдийн хорих ялыг багасгах талаар тус хуульд тусгажээ.
Өнгөрсөн онд нийт найман хотод 71 барилга сүйрч, шатсан аж. Үймээн самууны үеэр эвдэрч сүйдсэн 350 худалдааны байгууламжийг бүгдийг нь сэргээн барьсан байна.

Алматы хот дахь нэгдүгээр сарын үймээний үеэр эвдэрсэн байгууламжийг сэргээж буй үйл явц болон эмгэнэлт үйл явдалтай холбоотой хүндэтгэлийн дурсгалыг танилцууллаа.

Казахстан улсын Алматы хот