ФОТО: Япон улсын Засгийн газраас "Patrol Y61" маркийн 30 машиныг усны сав, газрын захиргаадад бэлэглэлээ
Япон улсаас "Эдийн засаг, Нийгмийн хөгжлийг дэмжих хөтөлбөр"-ийн хүрээнд Байгаль орчны салбарт богино долгионы холбоогоор тоноглогдсон 30 автомашиныг өнөөдөр хүлээлгэн өглөө.
Энэ үеэр Япон улсаас Монгол Улсад суугаа элчин сайдын яамны хэргийг түр хамаарагч Кояма Исао "Монгол орны цэнгэг усны нөөц, эко системийн менежмент, байгаль орчныг хамгаалах судалгаа, шинжилгээнд зориулан Япон улсын засгийн газраас хэрэгжүүлж буй нийгэм, эдийн засгийг хөгжүүлэх буцалтгүй тусламжийн солилцооны бичигт 2019 оны гуравдугаар сард гарын үсэг зурсан. Үүнээс хойш дэлхий нийтээр шинэ төрлийн коронавирус халдвар тархаж, энэхүү хамтын ажиллагаа хэрэгжүүлэхэд багагүй цаг өнгөрсөн билээ.
Харин өнөөдөр Монголын байгаль орчныг хамгаалах үйлсэд үр бүтээлтэй ашиглагдах 30 автомашиныг авчран хүлээлгэн өгч байгаадаа баяртай байна.
Монгол Улс 1990-ээд оны эхээр ардчилсан зах зээлд шилжсэнээс хойш эдийн засаг нь хурдацтай хөгжиж байгаа ч нөгөө талаар уул уурхайн хөгжлийн эко системийн үзүүлж буй сөрөг нөлөөгөөр байгаль орчин эрсдэлд орж байгаа нь бодит үнэн. Иймд Монгол Улсын дотоодын хөгжлийн асуудлыг шийдвэрлэхийн тулд илүү их идэвх зүтгэл гарган ажиллаж, байгаль орчноо хамгаалах нь нэн чухал юм.
Энэ удаа хүлээлгэн өгсөн автомашин нь орон нутгийн гол, мөрний сав газрын захиргаа, байгалийн тусгай хамгаалалттай газарт үр бүтээлтэй ашиглагдаж, Монгол орны үзэсгэлэнт байгаль, ирээдүйн хойч үед өвлөгдөн үлдэнэ гэдэгт бат итгэлтэй байна" хэмээв.
БОАЖ-ын сайд Б.Бат-Эрдэнэ "Япон улсын Засгийн газар Nissan "Patrol Y61" автомашиныг буцалтгүй тусламжийн хүрээнд бэлэглэж байгаа явдалд гүнээ талархаж байна. Дэлхий дахинд уур амьсгалын өөрчлөлт явагдсанаар усны асуудал мөн тулгамдаад байгаа. Уур амьсгалын өөрчлөлтийн нөлөөгөөр гол, мөрөн, булаг шанд, нуур цөөрмүүд дэлхий даяар олноор ширгэж байна.
Бид үргэлжлүүлэн Япон улсын засгийн газартай Байгаль орчныг хамгаалах чиглэлээр байнга хамтарч ажиллана. Байгалийн тусгай хамгаалалттай газрууд бүрэн автомашинаар хангагдсан, усны сав, газрын захиргаад маань орхигдсон байсан. Энэ удаад Япон улсын засгийн газарт хүсэлт тавьж, энэхүү 30 автомашиныг олгож байна.
Цаашид бид цаг уур орчны шинжилгээний газар, аймаг бүрийн байгаль, орчин аялал жуулчлалын газрууд дээрээ анхаарах шаардлагатай. Мөн үргэлжлүүлээд бусад тоног төхөөрөмжөөр хангах төслүүдээ хэрэгжүүлэх болно" гэв.
ФОТО:
