Ерөнхийлөгчийн Тамгын газрын төсөв жил бүр өссөөр 4 жилийн өмнөхөөс 6 ДАХИН ИХ болоод байна

Гэрэл зургийг MPA агентлагийн онцгой зөвшөөрөлтэйгөөр ашиглав

Монгол Улсын 2023 оны төсвийн төслийг УИХ-аар хэлэлцүүлж буй. 

Энэ удаа Ерөнхийлөгчийн Тамгын газар болон УИХ-ын Тамгын газрын урсгал зардал хэрхэн нэмэгдэж ирснийг 2013 оноос хойших төсөвтэй харьцууллаа. 

Харин 2021 онд У.Хүрэлсүх МАН-аас Ерөнхийлөгчид сонгогдсон жилээс эхлээд энэ төсөв 13.2 тэрбум төгрөг болж хоёр дахин нэмэгдэв. Энэ бол КОВИД-19-ийн нөлөө эдийн засагт эд хүчтэй нөлөөлсөн хүнд жил билээ. 

Тэгвэл 2022 онд У.Хүрэлсүх Ерөнхийлөгчийн Тамгын газрын урсгал зардал 19.7 тэрбум төгрөг болж 2021 оныхоос 50% өссөн бол ийнхүү 2023 онд 26.6 тэрбум байхаар 35% өсгөж төсвийн төсөлд орж ирээд байна. 

Монгол Улсын Парламентын түүхэнд анх удаа анимэйшнд өөрийн дүрийг мөнхлөөд буй УИХ-ын дарга Г.Занданшатар 76 гишүүнийг 2019 оны хоёрдугаар сараас удирдаж эхэлсэн. Тэгвэл түүний тэргүүлж байгаа УИХ-ын Тамгын газрын урсгал зардал мөн л цар тахлын эдийн засгийн хамгийн хүндрэлтэй жил болох 2021 онд огцом нэмэгдсэнийг графикаас харж болно. 

2022 онд энэ дүн буураагүй 62.9 тэрбум болсон бол энэ удаа 61 тэрбум төгрөг зарцуулахаар төсвийн төсөлд тусгаад байна. 

2022 оны улсын төсвийг хэлэлцэх үеэр УИХ-ын дарга Г.Занданшатар "Ард иргэд маань хэмнэлтийн горимд шилжих хэрэгтэй байна" хэмээн чуулганы хуралдаанаар хэлж байсан ч өөрөө төсөвт нэмж 4.9 тэрбум төгрөгийг тусгуулахаар болж байсныг санаж байгаа байх.  

Тэгвэл ерөнхий зургаараа МАН парламентад олонх болсон даруйд УИХ-ын Тамгын газрын урсгал зардал өмнөх жилүүдийн дундажтай харьцуулахад 60 орчим хувь өссөн бол 2019, 2020 онуудад 110%, 2021 оноос хойш ойролцоогоор 3 ДАХИН нэмэгджээ.

МАН хэмнэлтийн талаар хамгийн ихээр ярьж буй. Хэмнэлтийн тухай хууль хүртэл батлуулсан. Гэвч үнэн хэрэгтээ эрх баригч нам болон Ерөнхийлөгч өөрсдөө төсвийн зарцуулалтыг ихээр өсгөж байгааг тоон үзүүлэлтүүд илтгэж байна.

Мөн тэд цар тахлын жилүүдэд төсвийн алдагдлыг түүхэнд байгаагүйгээр нэмэгдүүлж, халамжийг 2022 онд үргэлжлүүлж, нийгэм, эдийн засгийн олон сөрөг үр дагавар бий болох үндсийг өөрсдөө тавиад байгаа билээ.