УИХ-ын дарга Та төсөвт нэмж тусгуулсан ₮4.9 тэрбумын урсгал зардлаасаа татгалзаж, өөрөө эхлээд ХЭМНЭНЭ ҮҮ!

Гэрэл зургийг MPA агентлагийн онцгой зөвшөөрөлтэйгөөр ашиглав

“Ард иргэд маань хэмнэлтийн горимд шилжих хэрэгтэй байна” гэж чуулганы индрээс хэлсэн УИХ-ын дарга Г.Занданшатарын үг олон нийтийн бухимдлыг төрүүлж, эцэстээ залуусыг шөнөжин төв талбайдаа жагсахад хүргэлээ. Өнгөрсөн шөнө цагдаагийн хүчээр тараасан уг жагсаал одоо ч Төрийн ордны өмнө үргэлжилж байна.

Бодит байдал дээр хэмнэх шаардлагатай байгаа субъект нь төр өөрөө юм. Өнөөдөр Монгол Улсад ТӨР хамгийн ТОМ КОМПАНИ болон хувирсан. Энэ КОМПАНИТАЙ ямар нэгэн байдлаар хамтран ажиллаж, гэрээ байгуулж, тендерт оролцох нь эдийн засгийн хүндрэлийг хохирол багатай даван туулах гарц болсон. Харин иргэд бидний цалин нэг ч төгрөгөөр нэмэгдээгүй ба 15%-ийн үнийн өсөлтөд хэмнэж болох бүх боломжоо шавхан өдөр хоногийг туулж байгаа билээ.

Монголын Хөрөнгийн биржийн нэгдүгээр ангилалд бичигддэг, зах зээлийн үнэлгээ нь 10 тэрбум төгрөгөөс доошгүй, сүүлийн жилд 5 тэрбум төгрөгөөс доошгүй хэмжээний борлуулалтын орлоготой ТОП зарим компанийн борлуулалтын орлогыг авч үзье.

Эндээс төр ямар их мөнгөтэй том “компани” болох нь харагдаж байна. Харамсалтай нь огт ашигтай ажилладаггүй, хэт үрэлгэн, хөрөнгө оруулалт нь оновчгүй бөгөөд үр дүнгүй. Татвар төлөгчдийн мөнгөөр 4 сая хүрэхгүй иргэдээ сэтгэл амгалан амьдрах нөхцөлийг нь бүрдүүлж чадахгүй байгаа атлаа өөрсдөө бүх боломжийг эдэлж, гар дүрэх боломжтой бүх мөнгөнд ямар нэгэн байдлаар хутгалдаж байгаа нь залуусын бухимдлыг ийнхүү эцэст нь тулгалаа.

Гэрэл зургийг MPA агентлагийн онцгой зөвшөөрөлтэйгөөр ашиглав

График. Төсвийн тэнцэл 2018-2021 он

Төсвийн урсгал зардал сүүлийн жилүүдэд тасралтгүй өссөөр ирсэн бөгөөд нийт төсвийн зардлын 80-аас дээш хувийг эзэлж байна.

Ийм учраас залуус жагсаж, нэгдэж байна. Уриа нь “Монголдоо сайхан амьдаръя”. Монгол залуус бүгдээрээ Монголоос явах мөрөөдөлтэй биш гэдгийг тэдний барьсан уриа лоозон харууллаа. Шударга нийгмийг цогцлоож, төр өөрөө хэмнэлтээ гаргаж, ажлаа хийж чадвал иргэд эх орондоо сайхан амьдрахыг хүсэж байна.

2022 оны улсын төсвийг эргэн сануулъя. Иргэдээ хэмнэлтэд уриалаад байгаа УИХ-ын дарга Г.Занданшатар 2022 оны Төсвийн тухай хуулийн төслийг хэлэлцэх үеэр өөрийн урсгал зардлыг 4.9 тэрбум төгрөгөөр НЭМЖ суулгуулсан. Тодруулбал,

Монгол Улсын Үндсэн хуулийн 30 жилийн ойг тохиолдуулан Улсын Бага Хурлын зарим гишүүнд нэг удаагийн мөнгөн дэмжлэг үзүүлэхэд зориулж 840 сая төгрөг,
Ардын Их Хурлын депутатуудад буцалтгүй тусламж үзүүлэхэд зориулж 2 тэрбум 350 сая төгрөг,
Үндсэн хуулийн 30 жилийн ойн арга хэмжээг зохион байгуулахад зориулж 200 сая төгрөг,
УИХ-ын хяналт шалгалтын тухай хууль батлагдахтай холбогдуулж, хуулийн хэрэгжилтийг хангахад шаардагдах 1 тэрбум 562.8 сая төгрөг буюу нийт 4 тэрбум 952.8 төгрөгийг УИХ-ын даргын урсгал зардалд нэмж тусгахаар болж УИХ баталсан.

Энэ мөнгөнөөсөө эхлээд Та өөрөө татгалзах нь шударга ёсонд нийцнэ.

Хөгжлийн Банк. Улсын нэрээр гаднаас авсан зээл болох бондын мөнгийг хэрхэн үр ашиггүй зарцуулсныг бид харж байна.

Хөгжлийн Банкны нийт актив нь 3.2 их наяд төгрөгийн 55.4% буюу 1.6 их наяд нь найдваргүй зээлдэгчдийн гарт орсныг олон нийтэд нээлттэй мэдээлсэн. Тэгвэл 1.6 их наяд төгрөгөөс 1 их наяд орчим нь Төрийн Өмчит Компаниудад хамаарч буй.

Хүснэгт. Хөгжлийн Банкны танилцуулсан зээлүүдэд дурдагдсан Төрийн Өмчит Компаниуд

№	Зээлдэгчийн нэр	Олгосон огноо	Валют	Олгосон дүн	Нийт үлдэгдэл	Нийт үлдэгдэл
				(тухайн валютаар)	(тухайн валютаар)	(төгрөгөөр)
1	МОНГОЛ ГАЗРЫН ТОС БОЛОВСРУУЛАХ ҮЙЛДВЭР ТӨХХК	4.26.2018	MNT	158,744,844,711	203,782,866,176	203,782,866,176
2	ДОРНОД БҮСИЙН ЭРЧИМ ХҮЧНИЙ СИСТЕМ ТӨХК	10.28.2021	CNY	44,216,836	44,244,565	19,812,716,386
3	МИАТ ТӨХК	6.30.2017	JPY	1,275,730,695	648,339,201	15,975,077,906
4	ДЦС-4 ТӨХК	7.20.2018	EUR	76,641,251	77,067,380	244,484,704,307
5	ТӨРИЙН ОРОН СУУЦНЫ КОРПОРАЦИ	5.28.2015	USD	50,000,000	41,601,529	118,543,557,769
6	ТӨРИЙН ОРОН СУУЦНЫ КОРПОРАЦИ	2.5.2016	MNT	19,254,778,631	25,649,932,438	25,649,932,438
7	ТӨРИЙН ОРОН СУУЦНЫ КОРПОРАЦИ	5.28.2015	MNT	83,587,839,898	96,651,553,645	96,651,553,645
8	ТӨРИЙН ОРОН СУУЦНЫ КОРПОРАЦИ	10.2.2013	MNT	84,700,000,000	74,887,806,099	74,887,806,099
9	ЭРДЭНЭС МОНГОЛ ХХК	2.12.2014	MNT	177,845,787,591	151,276,992,912	151,276,992,912
10	ЭРЧИМ ХҮЧНИЙ ЯАМ	1.30.2014	USD	14,816,251	16,096,828	45,867,910,816
Нийт						996,933,118,454

Хөгжлийн Банкны нийт актив нь 3.2 их наяд төгрөг. Харин үүнээс 55.4% буюу 1.6 их наяд нь найдваргүй зээлдэгчдийн гарт орсон байгаа юм.

Энэ талаар нэгдүгээр сарын 31-нд зарласнаас хойш 49.8 тэрбум төгрөгийн эргэн төлөлт хийгджээ. Цаашид эргэн төлөлтийг эрчимжүүлэх чиглэлийг Хөгжлийн Банканд өгсөн байна.

Энэ бүхнээс ТӨР өөрөө эхлээд ХЭМНЭЛТ хийх шаардлагатайг харуулж байна. Иргэд бид өдөр бүр, цаг тутамд, үйлдэлд болгондоо ХЭМНЭСЭЭР байгаа билээ.