"Усан парк" нэрийдлээр Дунд гол дээр газар аваад орон сууц барьж буй асуудлаар стратегийн өмгөөллийн ажлыг эхлүүлжээ

"Усан парк" нэрийдлээр Дунд гол дээр газар аваад дараа нь "Худалдаа, нийтийн үйлчилгээний төв, орон сууц" болгож /болгуулж/ улмаар орон сууц барьж буй асуудлаар стратегийн өмгөөллийн ажлыг "Онч шийдэл" НҮТББ-аас эхлүүлжээ.

Тус байгууллага нь нийтийн ашиг сонирхлыг төлөөлөн хамгаалан нэхэмжлэл гаргаснаар Нийслэлийн Засаг дарга, Нийслэлийн Ерөнхий архитектор бөгөөд Хот байгуулалт, хөгжлийн газрын дарга нарт холбогдуулан захиргааны хэрэг үүссэн талаар "Онч шийдэл- НҮТББ-ын захирал Ө.Эрдэнэ-Очир цахим хуудсаараа дамжуулан мэдээлсэн байна.

Захиргааны хэрэг үүсгэх тухай Нийслэл дэх захиргааны хэргийн анхан шатны шүүхийн захирамж энэ сарын 25-ны өдөр гарсан бөгөөд "Онч шийдэл- НҮТББ-ын захирал Ө.Эрдэнэ-Очир болон Удирдах зөвлөлийн дарга Ш.Алтангадас нарын шүүхэд гаргасан нэхэмжлэлээр захиргааны хэрэг үүсгэх нь үндэслэлтэй гэж үзжээ.

Зургийг "Онч шийдэл" ТББ-ын фэйсбүүк хуудсаас авав.

Ташрамд дурдахад, мөн тус Усан парктай холбоотой газрын асуудлыг гэмт хэргийн шинжтэй гэх үндэслэлээр Авлигатай Тэмцэх Газар хэрэг нээн шалгаж буй.

Тодруулбал, Туул голын сав газрын захиргаанаас АТГ-т 2022 оны долдугаар сарын 1-ний өдрийн 01/424 дугаар албан бичгээр хүргэсэн мэдээллийг 2022 оны долдугаар сарын 6-ны өдөр хүлээн авч, холбогдох мөрдөн шалгах ажиллагааг явуулаад Эрүүгийн хуулийн тусгай ангийн 22.1 дүгээр зүйлийн 1 дэх хэсэгт заасан гэмт хэргийн шинжтэй үндэслэлээр 2021 оны долдугаар сарын 25-ны өдөр хэрэг бүртгэлтийн хэрэг нээж шийдвэрлэсэн байдаг.