• 7 сарын 3, Ням
Уншиж байна ...

Б.Энхбаяр: УИХ-ын гишүүний хувь заяа, дахин сонгогдох эсэхийг Төсвийн байнгын хороо шийддэг болж

А.Төгөлдөр, iKon.mn
2022 оны 5 сарын 19
iKon.MN
Зураг зураг
Гэрэл зургийг MPA агентлагийн онцгой зөвшөөрөлтэйгөөр ашиглав

Монгол Улсын нэгдсэн төсвийн 2023 оны төсвийн хүрээний мэдэгдэл, 2024-2025 оны төсвийн төсөөллийн тухай хуулийн төсөл болон дагалдах бусад хууль тогтоомжийн хэлэлцэх эсэхийг хэлэлцэж байна. Энэ үеэр гишүүд асуулт асууж, хариулт авав.

УИХ-ын гишүүн Б.Энхбаяр: Төсөв тойрсон, хулгай хийдэг том схем УИХ дотор байна. Засгийн газраас өргөн барьсан төсвийг Төсвийн байнгын хороо нааш цааш нь болгодог юм байна. УИХ-ын гишүүд Төсвийн байнгын хорооноос их хамааралтай болсон. Тухайн гишүүний хувь заяа, дахин сонгогдох эсэхийг Төсвийн байнгын хороо базаад сууж байдаг. Гишүүд хадаг барьж гуйдаг. Байнгын хороо болохоор гишүүдийг ялгадаг, царай хардаг, төсвийг нь ихэсгэж, багасгадаг.

Миний хувьд УИХ-ын гишүүнээс сонгогдсоноос хойш нэг л зүйл ярьж байгаа. 30 мянган хүнтэй хамгийн том хороо болох Баянзүрх дүүргийн 26 дугаар хороонд сургууль байгуулах асуудал. Үүнд зориулж энэ оны төсөвт таван тэрбум төгрөг суулгасан. Гэтэл хэмнэлтийн бодлогын хүрээнд гээд энэ төсвийг 1.4 тэрбумаар багасгасан. Бүх л тойргийн энэ мэт зардлыг хэмнэж байгаа гэж бодтол бусад гишүүдийн тойрогт нэмсэн байсан.

Сарын өмнө төсвийн тодотгол хийхэд Увс аймагт төсөв нэмсэн байсан. Харин Баянзүрх дүүрэгт “Шинэ хөдөө” гэдэг төсөл нэмсэн. Улаанбаатар хотын хамгийн хотожсон дүүрэгт “Шинэ хөдөө” гэдэн төсөл хэрэгжүүлэх нь. Яасныг нь тодруулахад Төсвийн байнгын хорооны хэдэн хүн шийдсэн байдаг.

Төсвийн байнгын хорооны дарга Ч.Хүрэлбаатар: Хуулийн дагуу бүгд явж байгаа. Тэнд хэн нэгэн хүн мэдээд шийдээд байдаг зүйл биш. Ч.Хүрэлбаатар гэдэг хүнд дургүй байж болно. Гэхдээ УИХ руу нулимаад байх хэрэггүй.

Баянзүрх дүүрэгт “Шинэ хөдөө” гэдэг төсөл хэрэгжүүлэх гэж байгаа бол хэн нэгэн хүн санал гаргасан байж таарна. Тэр эзнийг нь олж ярь. Хаа хамаагүй хүмүүс рүү үсчээд байх шаардлагагүй.