ХУУЧИРСАН МЭДЭЭ: 2021/10/06-НД НИЙТЛЭГДСЭН
"Загасчилж яваад осолдсон хоёр иргэний нэгийг нь эрэн хайж байна"
iKon.MN
Гэрэл зургийг mpa.mn
Загасчилж яваад осолдсон хоёр иргэний нэгийг нь эрэн хайж байна.
Тодруулбал, Төв аймгийн Заамар сумын Төмөртэйн хоёрдугаар багийн нутаг Доргол гэдэг газар /аймгийн төвөөс баруун хойд зүгт 266 км, сумын төвөөс баруун зүгт 40 км/-т “Прадо-150” загварын автомашинтай таван иргэн загасчилж яваад Туул голыг гатлах үедээ автомашин нь усанд сууж хоёр хүн голд осолдсон тухай дуудлагыг аймгийн Цагдаагийн байгууллагаас аравдугаар сарын 5-ны өдрийн 22:21 цаг хүлээн авчээ.
Тус аймгийн Онцгой байдлын газрын Лүн сум дахь Эрэн хайх, аврах бүлгийн алба хаагчид 96 км замыг туулан 01:45 цагт очиж, 3 цаг 45 минут ажиллан осолдсон газраас зүүн хойд зүгт 1 км-т Туул голын уснаас аравдугаар сарын 6-ны өдрийн 05:40 цагт Улаанбаатар хотын харьяат иргэний цогцсыг гарган Заамар сумын Цагдаагийн хэлтэст шилжүүлэн өгсөн байна.
Харин Орхон аймгийн харьяат иргэнийг эрэн хайх ажиллагааг үргэлжлүүлж байна хэмээн Онцгой байдлын ерөнхий газраас мэдээллээ.
