УИХ-ын намрын ээлжит чуулганыг 10:00 цагт нээнэ

Улсын Их Хурлын намрын ээлжит чуулганы нээлт өнөөдөр 10:00 цагт болно.

Мөн энэ өдөр 14:00 цагаас УИХ-ын гишүүд цаг үеийн шинжтэй асуудлаар Монгол Улсын Ерөнхийлөгчийн мэдээллийг сонсож, хаалттай хуралдах юм байна. 

УИХ-ын намрын ээлжит чуулганы эхний сард нийт 24 хууль тогтоомжийн төслийг хэлэлцэхээр төлөвлөжээ. Хэлэлцэх асуудлын эхэнд

• Монгол Улсын 2022 оны төсвийн тухай хууль,
• Төрөөс мөнгөний бодлогын талаар 2022 онд баримтлах үндсэн чиглэл батлах тухай Улсын Их Хурлын тогтоолын төсөл,
• Зөвшөөрлийн тухай,
• Монгол Улсын Их Хурлын хяналт шалгалтын тухай,
• Согтууруулах ундааны эргэлтэд хяналт тавих, архидан согтуурахтай тэмцэх тухай,
• Хөрөнгийн үнэлгээний тухай,
• Актив удирдлагын компанийн тухай,
• Хөгжлийн бодлого, төлөвлөлт, түүний удирдлагын тухай хуульд нэмэлт, өөрчлөлт оруулах тухай,
• Мэргэжлийн нэгдсэн холбооны эрх зүйн байдлын тухай,
• Худалдаа, аж үйлдвэрийн танхимын тухай зэрэг хуулиуд багтсан байна.