СЗХ-ны шинээр хэрэгжиж буй журмын дагуу “ЛэндМН ББСБ” ХК-ийн ТУЗ-ийн хараат бус гишүүн Б.Өлзийбаяр чөлөөлөгдөх хүсэлтээ гаргалаа

“ЛэндМН ББСБ” ХК (цаашид “ЛэндМН”)-ийн Төлөөлөн удирдах зөвлөл (цаашид “ТУЗ”)-ийн хараат бус гишүүн, “Өлзий энд Ко” ҮЦК-ийн Гүйцэтгэх захирал Б.Өлзийбаяр нь Санхүүгийн Зохицуулах Хорооны 2021 оны 6 сарын 11-ний өдрийн 225 тоот “Үнэт цаасны бүртгэлийн журам”, мөн 2021 оны 6 сарын 11-ний өдрийн 226 тоот “Компанийн өрийн хэрэгсэл бүртгэх журам”-д тус тус заасан шаардлагуудыг хангах, цаашид Компаниас үнэт цаас гаргахад хамтран ажиллах боломжтой байх үүднээс 2021 оны 9 сарын 08-ны өдөр ТУЗ-ийн хараат бус гишүүнээс чөлөөлөгдөх хүсэлтээ гаргасан байна.

ЛэндМН-ийн ТУЗ уг хүсэлтийг хүлээн авч хэлэлцээд, 2021 оны 9 сарын 10-ны өдрөөр  Б.Өлзийбаяр гишүүний бүрэн эрхийг зогсоож, ТУЗ-ийн хараат бус гишүүнээс чөлөөлөх асуудлыг компанийн хувьцаа эзэмшигчдийн ээлжит хурлаар шийдвэрлүүлэх болон хараат бус түр гишүүн томилохоор шийдвэрлэжээ.

Ингэснээр ЛэндМН-ийн ТУЗ-ийн зүгээс хараат бус түр гишүүн сонгон шалгаруулах ажлыг зохион байгуулж, холбогдох хууль, тогтоомж, ЛэндМН-ийн дүрэм, ТУЗ-ийн үйл ажиллагааны журамд заасны дагуу томилох юм.

Б.Өлзийбаяр нь цаашид “ЛэндМН ББСБ” ХК-тай хамтран зах зээлд шинэ бүтээгдэхүүн гаргах, иргэдэд санхүүгийн боловсрол олгох, түүнчлэн Компаниас гаргах үнэт цаас буюу олон нийтэд  нээлттэй арилжаалагддаг “ЛэндБонд” төсөлд дахин  хамтран ажиллахаа илэрхийлжээ.