Павит Рамачандран: АХБ ирэх дөрвөн жилд Монгол Улсын эрүүл мэнд ба нийгмийн хамгааллын салбарт урт хугацааны, бодит шинэчлэл хийхэд анхаарна
Азийн хөгжлийн банк 2021-2024 онд Монгол Улсын Засгийн газартай хамтран хэрэгжүүлэх шинэ түншлэлийн стратегиа эхлүүлээд буй.
Үүнтэй холбогдох мэдээллийг өнөөдөр Азийн хөгжлийн банкнаас өглөө.
Энэхүү түншлэлийн стратеги нь коронавируст өвчлөлийн (КОВИД-19) цар тахлыг даван туулж, хүртээмжтэй, тогтвортой хөгжлийг цогцлоох бат бөх суурийг тавихад Монгол Улсад дэмжлэг үзүүлэхэд чиглэх аж.
Ирэх дөрвөн жилийн хугацаанд Монгол Улсад хэрэгжих АХБ-ны үйл ажиллагаа нь
- Хүртээмжтэй нийгмийн хөгжил ба эдийн засгийн боломж,
- Уур амьсгалд тэсвэртэй дэд бүтэц,
- Ногоон бөгөөд уур амьсгалд зохицсон тогтвортой хөгжил хэмээх стратегийн гурван тэргүүлэх чиглэлийг баримтлах юм байна.
“Монгол Улсын хамгийн том хөгжлийн түншийн хувьд АХБ нь өнөөг хүртэл хэрэгжүүлж ирсэн үйл ажиллагааныхаа бат бөх сууринд түшиглэн уур амьсгалын өөрчлөлтийг даван туулах хүчин чармайлтуудыг эрчимжүүлж, бизнесийн орчныг сайжруулах зорилгоор инновацыг нэвтрүүлэхийн зэрэгцээ КОВИД-19 цар тахлын эсрэг хариу арга хэмжээгээр дамжуулан эрүүл мэнд ба нийгмийн хамгааллын салбарт урт хугацааны, бодит шинэчлэл хийхэд анхаарна” хэмээн АХБ-ны Монгол Улс дахь Суурин төлөөлөгч Павит Рамачандран хэлэв.
“Мөн бид КОВИД-19 цар тахлын хариу арга хэмжээг үргэлжлүүлэхийн хажуугаар шинээр үүсэж болзошгүй сорилтуудад бэлэн байхын тулд үйл ажиллагааныхаа уян хатан байдлыг хангана” гэдгийг онцлон тэмдэглэв.
Мөн Монгол Улсын цаашдын өсөлт хөгжлийг бэхжүүлэх зорилгоор КОВИД-19 цар тахлын эсрэг хариу арга хэмжээг эрүүл мэнд, нийгмийн хамгааллын салбарын дунд хугацааны шинэчлэлтэй уялдуулахад дэмжлэг үзүүлж, инновацыг нэвтрүүлэн ажиллана гэдгийг мэдээллийн үеэр хэлэв.
Стратегийн хоёр дахь тэргүүлэх чиглэлийн хүрээнд АХБ нь Монгол Улсын өрсөлдөх чадварыг нэмэгдүүлэх зорилгоор зам тээвэр, биет харилцаа холбооны салбарт томоохон хөрөнгө оруулалтуудыг төлөвлөж байгаа аж.
"Энэ хүрээнд Улаанбаатар хотын түгжрэлийг бууруулахад хувь нэмэр оруулахын зэрэгцээ хөдөө орон нутагт тогтвортой хөгжлийн боломжуудыг бий болгоно. АХБ-наас эдгээр хөрөнгө оруулалтын төслүүддээ арчилгаа үйлчилгээний бүрэлдэхүүн хэсгүүдийг оруулах, уур амьсгалд тэсвэртэй шийдлүүдийг нэвтрүүлэх, ногоон хөгжлийг дэмжих хамтарсан санхүүжилтийн механизмуудыг ашиглах, дэд бүтцийн бүтээн байгуулалтад хувийн хэвшлийн хөрөнгө оруулах боломжуудыг нэмэгдүүлэх замаар шинэчлэлийг түүчээлэн ажиллана.
Харин гурав дахь тэргүүлэх чиглэлийн хүрээнд макро эдийн засгийн болон бүх талын тэсвэртэй байдлыг бэхжүүлэхэд анхаарч, нөөцийн тогтвортой хэрэглээ, ногоон хөгжлийг дэмжинэ.
Түүгээр зогсохгүй Монгол Улсын Засгийн газартай нягт хамтран ажиллаж, уур амьсгалын өөрчлөлтийн чиглэлээр олон улсад хүлээсэн үүргээ биелүүлэх, тэр дундаа нүүрсний хэрэглээг аажмаар багасгах, мал аж ахуйн зохистой дадлыг нэвтрүүлэхэд нь дэмжлэг үзүүлэхийн зэрэгцээ тус улсын хөгжлийн замналыг тодорхойлсоор ирсэн байгалийн нөөцийн хэт хэрэглээнээс татгалзах замаар Монгол Улсын хөгжлийг илүү ногоон болгоход нь тусламж үзүүлнэ.
Шинэ түншлэлийн стратегийн хүрээнд АХБ-наас нийт хөрөнгө оруулалт, санхүүжилтийн дүнг бууруулахгүйгээр төсөл хөтөлбөрийн тоог цөөлөхөд анхаарна. Үйл ажиллагааны төлөвлөлтөд илүү нарийвчилсан шалгууруудыг нэвтрүүлснээр Засгийн газарт олгох нийт санхүүжилтийн хэмжээг хэвээр хадгалах хэдий ч илүү тогтвортой хөгжлийн нөлөө үзүүлэх боломжтой, цар хүрээ өргөнтэй, хөтөлбөрийн түвшний үйл ажиллагааг хэрэгжүүлнэ.
Нэн тэргүүнд дараах ажлуудыг хийхээр төлөвлөсөн. Үүнд,
- АХБ КОВИД-19 цар тахлын эсрэг ойрын хугацаанд авах хариу арга хэмжээгээ эрчимжүүлж, Засгийн газарт эдийн засгаа тогтвортойгоор сэргээн, нийгмийн хамгийн эмзэг бүлгийн иргэд өсөлт хөгжлөөс орхигдохгүй байхад анхаарахад нь дэмжлэг үзүүлнэ.
- АХБ хөгжлийн бусад түнш байгууллагуудтай нягт уялдаатай ажиллаж, салбар бүрийн үйл ажиллагааны голлох чиглэлээ тодорхойлно.
- АХБ үйл ажиллагаагаа газар зүйн байршлаар багцлан, эхний ээлжинд Монгол Улсын баруун бүсэд төвлөрөх бөгөөд хөгжлийн үр нөлөөг аль болох өндөр байлгахын тулд хот ба хөдөө орон нутаг дахь төсөл хөтөлбөрүүдийнхээ уялдаа холбоог нэмэгдүүлнэ.
- Төсөл хөтөлбөрийг хэрэгжүүлж эхлэх бэлэн байдалд онцгой анхаарна. Эцэст нь Монгол Улсын хөгжлийн замнал дахь хувийн хэвшлийн үүрэг оролцоог бэхжүүлэх үүднээс хувийн хэвшил оролцох боломжтой төслүүдийг эн тэргүүнд тавина" хэмээн Азийн хөгжлийн банкнаас мэдээлэв.
Энэхүү шинэ түншлэлийн стратеги нь эдийн засгийг сэргээн, хөдөлмөр эрхлэлтийг дэмжих замаар КОВИД-19 цар тахлыг даван туулж, хүртээмжтэй, тогтвортой хөгжлийг цогцлоох зорилго бүхий Монгол Улсын Алсын хараа-2050 ба Засгийн газрын 2020-2024 оны Үйл ажиллагааны хөтөлбөртэй уялджээ.
