БҮТ: Коронавируст халдварын улмаас ЭЕШ-д оролцож чадаагүй 220 бүртгүүлэгчээс шалгалт авч эхэллээ
“COVID-19” халдварын улмаас шалгалтад оролцоогүй шалгуулагчдаас авах Элсэлтийн ерөнхий шалгалт өнөөдөр эхэллээ.
Өөрөөр хэлбэл, 2021 оны наймдугаар сарын 19-22-ны өдрүүдэд зохион байгуулсан Элсэлтийн ерөнхий шалгалтад коронавируст халдварын улмаас оролцож чадаагүй шалгуулагчид өнөөдөр шалгалтад хамрагдаж байна.
Уг шалгалт өнөөдөр 10:00 цагт Англи хэлний шалгалтаар эхэлсэн бөгөөд 11 аймаг болон нийслэлд зохион байгуулж байна.
Шалгалтад улсын хэмжээнд нийт 220 шалгуулагч хамрагдаж байгааг Боловсролын үнэлгээний төвөөс мэдээлэв.
Тус шалгуулагчдыг ЭМЯ-наас ирсэн жагсаалт болон Боловсрол, соёл урлагийн газар, Боловсролын үнэлгээний төвд ирүүлсэн өргөдөл, шинжилгээний бичиг, эмнэлгийн магадлагаад үндэслэн суудлын хуваарийг бодож шалгалтад оруулжээ.
Шалгалт есдүгээр сарын 4-нийг хүртэл хуваарийн дагуу зохион байгуулагдах ба анхны оноог шалгалт өгсөн даруйдаа мэдэх боломжтой бол хэмжээст оноог 24 цагийн дотор мэдээлэх юм байна.
