Монгол Улсын эрдэс баялгийн салбарын өнгийг тодорхойлогч “Discover Mongolia-2020” уул уурхайн хөрөнгө оруулагчдын чуулга уулзалт 18 дахь жилдээ зохион байгуулагдлаа.
Коронавирусийн халдвараас шалтгаалан онцлогтой болж буй энэ удаагийн форумд Дэлхийн банкны ахлах эдийн засагч ноён Жийн Паскаль Н.Нганугийн “Уурхай ба оюун ухаан” хэмээх сэдвээр тавьсан илтгэл хамгийн сонирхолтой байв.
Тэрбээр "Уул уурхай Монголын өнөөдөр бол ирээдүй нь оюун ухаан хэмээн юуны өмнө тодорхойлж хэлмээр байна. Өнөө үед оюун ухаанд түлхүү суурилсан эдийн засгийн загвар нь илүү тогтвортойд тооцогдож байгаа билээ. Эдийн засгийн бүтцийн хувьд ижил төстэй улс орнуудтай харьцуулахад Монгол Улс хүмүүн капиталаа дутуу ашиглаж, институтийн чанар нь муудаж байна.
Капиталын төрөлжилт нь Монгол Улсын бүтээгдэхүүн болон зах зээлийн төрөлжилтөд чухал ач холбогдолтой. Гэтэл Монгол Улс капиталын нөөц баялгаа төрөлжүүлж чадаагүйгээс экспорт болон үйлдвэрлэлийн төрөлжилт сул байна гэж харж байна.
Түүнчлэн активын төрөлжилт нь бүтээгдэхүүний төрөлжилтийг дагуулна. Монгол Улс актив болон бүтээгдэхүүний төрөлжилтөөр бусад улсаас хоцорч байна" гэв.
Мөн цаашид дараах ҮНДСЭН ГУРВАН ЧИГЛЭЛД анхаарах шаардлагатай байгааг тэрбээр хэлсэн юм.
НЭГ. Тогтвортой байдлыг чухалчлах
ХОЁР. Бүтээмжийн өсөлтийг тэтгэх
ГУРАВ. Хүний болон институтийн хөгжилд чиглэх бодлогын тэргүүлэх чиглэлүүд
Хөдөлмөрийн зах зээлийн реформ:
Ур чадвартай ажиллах хүчнийг татах, эх орондоо тогтоон барих:
Институтийн хөгжил/ил тод байдал, хариуцлага, үр ашигтай улсын хөрөнгө оруулалт/
Харьцангуй давуу талтай салбар болон бүтээгдэхүүнээ дэмжих
“Discover Mongolia-2020” чуулга уулзалтыг Монгол Улсын стратегийн ач холбогдол бүхий ордуудад төрийн төлөөллийг хэрэгжүүлэх чиг үүрэгтэй “Эрдэнэс Монгол” ХХК хамтран зохион байгуулж байгаа юм. “Эрдэнэс Монгол” нэгдэл өнөөдрийн байдлаар 13 охин, хараат компани, гурван төслийн нэгжтэйгээр үйл ажиллагаа явуулж байгаа бөгөөд жилд 700-800 мянган тонн зэсийн баяжмал үйлдвэрлэж, 15-20 сая тонн коксжих нүүрс олборлож, дотоодын эрчим хүчний хэрэгцээнд 6 сая тонн нүүрс нийлүүлж байна.