Ижил маркийн хоёр автомашиныг 17 настай хүү хулгайлсан нь тогтоогджээ
Сүүлийн үед автомашин болон автомашины эд анги хулгайлах гэмт хэрэг нэлээд гарах болсон талаар албан бус эх сурвалж хэлж байна.
Тухайлбал, өнгөрсөн амралтын өдрүүдэд ижил маркийн хоёр автомашин хулгайд алдагдсан хэрэг Баянзүрх дүүрэгт гарчээ.
Хэргийн талаар тодруулбал, тухайн өдрүүдэд Баянзүрх дүүргийн зургаа болон тавдугаар хорооны нутаг дэвсгэрт Тoyota ist маркийн цагаан өнгөтэй хоёр ижил автомашин зогсоол дээрээсээ хулгайд алдагдсан хэрэг гарсан байна.
Хэргийн талаар автомашинаа алдсан иргэд цагдаагийн байгууллагад тус, тусдаа дуудлага өгчээ.
Мэдээллийн дагуу шалгахад, иргэн Б болон Г-ийн эзэмшлийн Toyota Ist маркийн улсын дугаартай цагаан өнгийн автомашинуудыг тус дүүргийн харьяат иргэн 17 настай, эрэгтэй Т хулгайлсныг олж тогтоосон байна.
Одоогоор уг хэрэг Баянзүрх дүүргийн Цагдаагийн хэлтэст шалгагдаж байгаа аж.
