гэрэл зургийг MPA.mn

Хөдөлмөр, нийгмийн хамгааллын сайд С.Чинзориг өнөөдөр 13:36 цагт Засгийн газрын ээлжит бус хуралдааны шийдвэрийг танилцуулахдаа "Орлого нь буурсан, үйл ажиллагаа нь доголдсон ААН, байгууллагыг нийгмийн даатгалын шимтгэлээс чөлөөлөхөөр хуульчилсан. Уг хөнгөлөлтөд 45 мянган ААН, байгууллага хамрагдахаар байна" гэсэн юм.

Харин энэ талаар өнөөдөр 20:00 цагийн орчимд Сангийн сайд мэдээлэл хийлээ. 

Сангийн сайд Ч.Хүрэлбаатар "Нийгмийн даатгалаас хөнгөлөх асуудлаар иргэд болон аж ахуйн нэгж, байгууллагуудад зөрүүтэй мэдээлэл тархаж байгаа тул нэгдсэн мэдээлэл өгье.

Нийгмийн даатгалыг дараах дөрвөн бүлгийнхэн төлөхгүй. Тодруулбал,

• Хувийн хэвшлийн аж ахуйн нэгж, байгууллага
• Төрийн бус байгууллага
• Төр, хувийн хэвшлийн бүх их, дээд сургууль
• Сайн дураар даатгуулагч нар зургаан сарын хугацаанд нийгмийн даатгалын шимтгэл төлөхгүй.

Ажил олгогч болон ажилтны төлөх ёстой нийгмийн даатгалын шимтгэлийн хэмжээг Монгол Улсын Засгийн газар төлнө

Үлдэж буй 0.01 хувь нь алтны компаниуд юм. Цар тахлын хямралын үед алтны ханш дэлхийн зах зээлд өссөн тул энэ салбарынхан шимтгэлээ төлнө. Татвар төлөлтийн байдлыг авч үзэхэд алтнаас бусад бүх компанийн орлого буурсан байгаа" гэв.

Нэг төгрөгөөр л буурсан бол ААН-ийн үйл ажиллагаа доголдсон гэж үзнэ

Зарим ААН-ийн орлого одоогоор хэвийн байгаа тул НДШ-ийн хөнгөлөлтөд хамаарахгүй гэж бодоод байна. Гэхдээ коронавирусийн нөлөө он дуустал үргэлжилнэ гэж харж байгаа. Тиймээс өнөөдөр хэвийн байгаа ч ирэх сард, цаашлаад 7-8 дугаар сард ч орлого буурах магадлалтай. Нэг төгрөгөөр л буурсан бол ААН-ийн үйл ажиллагаа доголдсон гэж үзнэ. Иймд нийгмийн даатгалын шимтгэлээ төлөхгүй байх магадлалтай байгаа тул төлчихөөд эргүүлж авъя гэснээс анхнаасаа төлөхгүй явах нь зөв гэдэг журмыг Засгийн газраас гаргасан" гэв.

/2020.04.17/

ВИДЕО: