Т.Бадрал: Дөрөвдүгээр сарын 2, 4-нд БНСУ, 3-нд Токио руу нислэг хийж иргэдээ авчрахаар боллоо

Гэрэл зургийг mpa.mn

Улсын Онцгой комиссын Шуурхай штабаас мэдээлж байна.

ОБЕГ-ын дарга Т.Бадрал "Таван удаа тусгай үүргийн нислэг хийлээ. Нийтдээ 4,805 иргэн эх орондоо ирэх хүсэлтээ дипломат төлөөлөгчийн газруудад гаргасан байна. Олон улсын хэмжээнд 100 гаруй улс иргэдээд бусад улс орноос татаж авч байна. Австрали улсын ЗГ-ын хүсэлтээр өнөөдөр утс улсын зургаан иргэнийг эх орон руу нь явуулах ажлыг зохион байгууллаа. Мөн БНСУ хүсэлтээ гарган энэ долоо хоногийн амралтын өдрүүдээр 200 орчим солонгос иргэнийг татан авах гэж байгаа" гэв.

• Дөрөвдүгээр сарын 2-нд 08:00 цагт БНСУ руу дараагийн ээлжийн тусгай үүргийн онгоц илгээнэ.
• Дөрөвдүгээр сарын 3-нд Япон улс руу,
• Дөрөвдүгээр сарын 4-нд 08:30 цагт БНСУ руу тусгай үүргийн онгоц илгээнэ.

Гурван удаагийн тусгай нислэгээр 750 гаруй иргэнийг эх оронд нь авчрах боломжтой гэж үзэж байна хэмээн мэдэгдлээ.

Тэднийг хамгийн багадаа 21 хоног тусгаарлагдах юм.

Тусгай үүргийн онгоцоор ирэх иргэдэд хоёр үндсэн шаардлагыг тавина. Үүнд:

1. Тусгаарлах байранд байх 21 хоногийн төлбөрийг төлнө.
2. Байгаа улс орондоо шинжилгээнд хамрагдсан байх. Шинжилгээний бичгийг үндэслэж, онгоцонд суух зөвшөөрлийг өгнө гэдгийг тэрбээр анхаарууллаа.