ТАНИЛЦ: COVID-19 халдвараас сэргийлэх зорилгоор хийсэн ХЯЗГААРЛАЛТУУД
Засгийн газар, Улсын Онцгой комисс болон Нийслэлийн Онцгой комиссоос COVID-19 халдвараас урьдчилан сэргийлэх зорилгоор хорио тогтоосон салбар, үйлчилгээний байгууллага, иргэдийн урсгалыг хязгаарласан мэдээллийг нэгтгэн хүргэж байна.
Шинээр гаргасан шийдвэр:
НЭГ. Япон, Монголын хоорондын нислэгийг хоёрдугаар сарын 28-наас гуравдугар сарын 11-нийг дуустал түр зогсоолоо.
Хугацаа, цагийн хувьд өөрчлөлт орсон газрууд:
ХОЁР. Бүрэн дунд сургууль болон их дээд сургууль, цэцэрлэг, коллежийн үйл ажиллагааг зогсоож, олон нийтийн арга хэмжээг зохион байгуулахыг гуравдугаар сарын 2-ныг хүртэл хориглоод байсан бол гуравдугаар сарын 30-ны өдрийг хүртэл сунгаад байна.
ГУРАВ. Нийслэлийн хэмжээнд бүх тѳрлийн баар, фитнес, саун, дэн буудал, биллиард, спорт заал зэрэг спорт, соёл урлагийн газруудын үйлчилгээг гуравдугаар сарын 30-ны ѳдѳр хүртэл үйл ажиллагааг нь түр зогсоов.
Энэ хугацаанд кафе, рестораны үйл ажиллагааг 22:00 цаг хүртэл ажиллахыг зѳвшѳѳрч буй.
ДӨРӨВ. Нийслэл дэх 321 сүм, хийдийн үйл ажиллагааг гуравдугаар сарын 30-ныг хүртэл бүрэн хаав.
ТАВ. Нийтийн тээврийн үйлчилгээг хоёрдугаар сарын 24-26-нд зогсоогоод байсан бол НОК-ийн шийдвэрийн дагуу гуравдугаар сарын 3-ны ѳдѳр хүртэл цагийн хуваарийн тусгай зохицуулалттайгаар явуулахаар боллоо.
ЗУРГАА. Улс, хот хоорондын зорчигч тээвэр, суудлын галт тэрэг, орон нутгийн хуваарьт нислэг, хувийн тээврийн хэрэгслийн зорчих хөдөлгөөнийг хоёрдугаар сарын 27-н хүртэл түр хугацаагаар зогсоосон байсан бол уг хугацааг сунгаж, 27-ны 08:00 цагаас гуравдугаар сарын 3-ны өдрийн 08:00 цаг хүртэл сунгасан.
ДОЛОО. Нийслэлийн бүх шатны нутгийн захиргааны байгууллагын ажилтан, албан хаагчид албан томилолтоор болон хувийн ажлаар гуравдугаар сарын 30-ны өдрийг хүртэл гадаад улс орнуудад зорчихгүй.
НАЙМ. Монгол Улс, БНХАУ-ын хилийн агаарын зам, төмөр зам, авто замын боомтоор Хятад руу зорчих монгол иргэд, Хятадаас Монголд ирэх гадаадын иргэн, харьяалалгүй хүнийг улсын хилээр нэвтрүүлэх хөдөлгөөнийг зогсоосон дэглэмийг гуравдугаар сарын 30-н хүртэл сунгаад байна.
ЕС. Онцгой комиссын хоёрдугаар сарын 20-ны өдрийн хуралдаанаараа нүүрс, газрын тосны бүтээгдэхүүний экспортыг гуравдугаар сарын 2-ноос эхлүүлэхээр болсон байсан ч нөхцөл боломж хангагдаагүй хэмээн үзсэн тул гуравдугаар сарын 15-ныг хүртэл сунгах шийдвэрийг өчигдөр гаргасан юм.
АРАВ. БНСУ, Монгол Улс хоорондын хоёр талын нислэгийг хоёрдугаар сарын 25-наас гуравдугаар сарын 2-ныг дуустал түр зогсоогоод байсан бол уг хугацааг сунгаж, гуравдугаар сарын 11-нийг дуустал зогсоохоор өөрчлөв.
