2019 онд дэлхийн дөрвөн улс тутмын нэг нь дотоодын үймээн самуунд автжээ

Өнгөрсөн онд дэлхийн дөрвөн улс тутмын нэг нь дотоодын бослого тэмцэлд автаж, 2020 онд энэ байдал үргэлжлэх төлөвтэй байгааг судлаачид харуулжээ.

Эрсдлийн шинжилгээ, стратегийн таамаглалаар тэргүүлдэг Verisk Maplecroft компаниас өнөөдөр гаргасан тайланд өгүүлснээр 2019 онд дэлхийн 47 улс дотооддоо ноцтой үймээн самуунтай байсан байна.

Эдгээрийн дотор Хонг Конг, Чили, Нигери, Судан, Хайти, Ливан зэрэг улсууд багтжээ.

30 жил үргэлжилсэн Омар Аль Башарын дэглэмийг өнгөрсөн онд унагасан Судан улс үймээн самууны түвшнээр дэлхийд тэргүүлж, дайнд нэрвэгдсэн Йемений байр суурийг эзэлсэн байна.

Үймээн самууны аюултай байдал, давтамж зэргээрээ Хонг Конг, Чили хоёр дэлхийн “хамгийн эрсдэлтэй газар”-аар тодорчээ.

Эдгээр улсуудын нөхцөл байдал ойрын хоёр жилд сайжрах төлөвгүй байгааг Verisk Maplecroft онцолсон байна.

Умард Солонгос бослого тэмцэл гаргахад хамгийн аюултай орноор нэрлэгджээ. Ирэх зургаан сарын хугацаанд үймээн самуун нэмэгдэх магадлалтай улсуудад Хятад, Турк, Саудын Араб, Орос, Тайланд багтсан байна.

2020 онд дотоодын бослого тэмцэлд өртөх хамгийн өндөр эрсдэлтэй 10 орныг дарааллаар нь жагсаавал Венесуэл, Иран, Ливи, Гвиней, Нигери, Пакистан, Бангладеш, Чили, Палестин, Этиоп болжээ.

Дэлхийн нийт улс орнуудын 5 хувь 2016 онд бослого тэмцэлд өртөх “өндөр эрсдэлтэй” ангилалд багтаж байсан бол 2020 онд энэ хэмжээ 10 хувьд хүрэхээр байгааг Verisk Maplecroft-ийн тайлан харуулсан байна.

Бослого тэмцэл гарах болсон гол шалтгаан нь дэлхийн эдийн засгийн хямралын дараах арав орчим жилийн хугацаанд хүмүүсийн дунд орлогын тэгш бус байдал нэмэгдэж, улс төрийн элитүүдэд итгэх итгэл алдарсан явдал гэж судлаачид дүгнэжээ.

Эх сурвалж: The Guardian