Шатахууны үнэ Ховд, Говь-Алтай аймагт 30-100 төгрөгөөр буурч, Хөвсгөл аймагт 80 төгрөгөөр өсжээ
Зургаадугаар сарын 18-ны өдрийн байдлаар улсын хэмжээнд дунджаар ердийн хэрэглээний 27 хоногийн газрын тосны бүтээгдэхүүний нөөц байна.
Үүнээс:
- А-80 автобензин 45;
- Аи-92 автобензин 35;
- Дизелийн түлш 19;
- ТС-1 онгоцны түлш 18 хоногийн нөөцтэй байна.
Газрын тосны бүтээгдэхүүний жижиглэн борлуулалтын үнийн хувьд баруун бүсийн Ховд аймагт борлуулж буй АИ-92 автобензин 30 төгрөг, Говь-Алтай аймагт борлуулж буй АИ-92 автобензин 100 төгрөг, дизелийн түлш 90 төгрөгөөр тус тус буурсан бол хангайн бүсийн Хөвсгөл аймагт борлуулж буй А-80 автобензин 80 төгрөг, АИ-92 автобензин 80 төгрөгөөр тус тус өссөн байна.
Төвийн бүсийн Улаанбаатар хотод борлуулж буй А-80 автобензин 32 төгрөгөөр өссөн ба мөн бүсэд хамаарах Говьсүмбэр аймагт борлуулж буй АИ-92 автобензин 50 төгрөгөөр буурсан байна.
2019 онд 1.1 сая тонн газрын тос олборлон, экспортлохоор төлөвлөжээ
Монгол Улсын хэмжээнд 2019 онд нийт 8.15 сая баррель /1.1 сая тонн/ газрын тос олборлон, экспортод гаргаж, газрын тосны орлогоос улсын төсөвт 223.4 тэрбум төгрөгийн орлого төвлөрүүлэх төлөвлөгөөтэй байгааг УУХҮЯ-наас мэдээллээ.
Тэгвэл зургаадугаар сарын 12-ны байдлаар улсын хэмжээнд 3.01 сая баррель буюу 408,091 тонн газрын тос олборлож, 2.84 сая баррель буюу 385,746 тонн газрын тос экспортолжээ.
Тавдугаар сарын 7-ны өдрийн байдлаар улсын төсөвт 47.5 тэрбум төгрөгийн орлого хуримтлуулсан байна.
Эх сурвалж: УУХҮЯ
