Г.Занданшатар: Багануурын ДЦС-ын гэрээг цуцалбал 512 сая ам.долларын нөхөн төлбөр төлөх нөхцөл үүснэ
ЗГХЭГ-ын дарга Г.Занданшатар өнөөдрийн Засгийн газрын хуралдаанаар хэлэлцэн шийдвэрлэсэн асуудлуудын талаар мэдээлэл өглөө.
Тэрбээр өвөлжилтийн бэлтгэл, үер усны гамшгийн дараах авч буй арга хэмжээ, Төрийн албаны тухай хуулийн дагаж мөрдөх журмууд, төрийн албан хаагчийн ёс зүйн бодлогын баримт бичиг боловсруулж байгаа гэх зэрэг асуудлаар мэдээлэл өгсөн. Түүнээс Багануурын ДЦС-ын талаар Засгийн газрын хуралдаанаар яригдсан эсэхийг тодруулахад,
"Багануурын ДЦС-ын асуудлыг хэлэлцсэн. Нэг талаас Багануурын ДЦС-ын хүчин чадал хэтэрхий өндөр, манай эрчим хүчний аюулгүй байдлын нэгдсэн тогтолцоонд доголдол учруулж болохуйц эрсдэлтэй гэсэн зарим мэргэжилтний дүгнэлт гарсан. Нөгөө талаас хоёр улсын Засгийн газар хооронд байгуулсан гэрээ хэлцэлд тусгагдсанаар манай талаас дангаар шийдвэр гаргаж, гэрээг цуцалбал 512 сая ам.долларын нөхөн төлбөр төлөх нөхцөл үүснэ. Оруулсан хөрөнгө оруулалт болон ирээдүйд олох ашгаа тооцоод гэрээ цуцалсан тохиолдолд нөхөн төлбөр төлөхөөр гэрээнд тусгачихсан юм байна лээ. Арбитрын шүүхэд очвол манай улс нөхөн төлбөрт орох эрсдэлтэй гэсэн үг.
Мөн гаргасан шийдвэр маань хоёр улсын болон олон улсын харилцаанд сөргөөр нөлөөлөхгүй байх талыг харгалзан үзэх хэрэгтэй.
Тиймээс эрчим хүчний хангамжийнхаа аюулгүй байдлыг бодолцохын зэрэгцээ, өмнө зурагдсан гэрээ хэлэлцээрийг судалж байна. Гэрээ хууль ёсны дагуу байгуулагдсан эсэхийг нарийвчлан судлах үүрэг даалгавар өгсөн байгаа" гэв.
