Э.Болорчулуун: Газрын анхны үнэ өндөр учраас дуудлага худалдаанд иргэд оролцсонгүй

Т.Өлзийбаяр, iKon.mn

2017 оны 10 сарын 6

iKon.MN

Гэрэл зургийг mpa.mn

эрэмбэлэх: шинэ нь эхэнд хуучин нь эхэнд

11:05 2017/10/06

Газрын дуудлага худалдаа эхэлсэн ч иргэд оролцсонгүй. Энэ талаар Нийслэлийн газрын албаны дарга Э.Болорчулуун мэдээлэл хийлээ.

30 байршлын 160.77 га газрыг худалдах байсан

Тэрбээр "2017 он гарсаар хоёр дахь удаагийн дуудлага худалдааг зохион байгуулсан ч газрын үнэ өндөр байгаа учраас иргэд оролцсонгүй. Энэ удаагийн дуудлага худалдаагаар Баянзүрх, Хан-Уул, Сонгинохайрхан, Налайх, Багахангай, Багануур зэрэг 6 дүүрэгт үйлдвэрлэл үйлчилгээ, амины орон сууц, аялал жуулчлал, аж ахуй, орон сууц, зочид буудлын зориулалтаар 30 байршлын 160.77 га газрыг худалдах байсан.

Өмнөх дуудлага худалдаа 2017 оны 7 дугаар сарын 23 өдөр болж, Хан-Уул, Баянгол дүүрэгт 2 байршлыг 765,6 сая төгрөгөөр худалдсан.
Дуудлага худалдаанд оролцогчдын тоо Барилга хот байгуулалтын сайдын 2015 оны 12 дугаар сарын 07 өдрийн 234 тоот тушаал гарч дуудлага худалдааны анх үнийг хэт өндөр тогтоосноос хойш сүүлийн 2 жилийн хугацаанд эрс буураад байна.

Өөрөөр хэлбэл, ЗТБХБ-ын сайдын 2010 оны 206 тоот тушаалаар 1 m2 газрыг үнэлгээний бүсчлэлээс хамаарч 33,000 төгрөгөөр үнэлдэг байсныг Барилга хот байгуулалтын сайдын 2015 оны 12 дугаар сарын 07 өдрийн 234 тоот тушаалаар 1м2 газрыг бүсчлэлээсээ хамаарч 220,000 төгрөгөөр үнэлж эхэлснээс хойш дуудлага худалдаанд оролцогчдын тоо буурч зарим дуудлага худалдаанд оролцогч ирэхгүй болсон.

Жишээ нь: Нийслэлийн Газрын үнэлгээний 3 дугаар бүсэд үйлчилгээний зориулалтаар эзэмшүүлэхээр 1000 m2 газрын дуудлага худалдааны анхны үнийг тодорхойлъё. ЗТБХБ-ын сайдын 2010 оны 206 тоот тушаалаар 1000 м.кв =11.000.000 төгрөг болгож тогтоосон. Харин БХБЯСайдын 2015.12.07 өдрийн 234 тоот тушаалаар 1000 м.кв =88.000.000 төгрөг болгосон байна.

Дуудлага худалдааны анхны үнийг ямар ч судалгаа, үндэслэлгүй хэт өндөр тогтоосон нь дуудлага худалдаанаас төсөвт төвлөрүүлэх ажил зогсонги байдалд орж, иргэд, аж ахуйн нэгж байгууллагуудын нээлттэй, ил тод байдлаар газар эзэмших, ашиглах эрх авч бизнесээ өргөжүүлэхэд санхүүгийн хувьд хүндрэл учруулж байна.

Нийслэлийн газрын албаны зүгээс нийслэлийн Засаг даргын удирдлагын зөвлөлийн хуралд болон НИТХ-ын тэргүүлэгчдэд газрын үнийг бууруулах талаар танилцуулсан. Ингээд үнийг бууруулахгүй бол болохгүй байна гэдэг санал дүгнэлтийг гаргаад ЗТБХБ-ын сайдад хүргүүлсэн. Тэндээс бид нарын саналыг харгалзаж үзээд шийдвэр гаргана.

Газрын анхны үнээ бууруулах үндэслэлээ нарийн тооцож үзсэн. Газрын анхны үнийг 2010 онд тогтоож байсан үнэ болох 33,000 мянган төгрөгөөр тогтоох хүсэлтээ өгөөд байна.

Нийслэлийн төсөвт газрын төлбөр, дуудлага худалдааны орлогоос 45 тэрбум төгрөг төвлөрүүлэх ёстой. Үүнээс бид гэрээт болон аж ахуйн нэгж байгууллагуудынхаа төлөвлөгөөнөөс 30.5 тэрбум төгрөгийг төвлөрүүлдэг. 3-р улирлын байдлаар үүнийг давуулан биелүүлсэн. Дуудлага худалдааны хувьд 14.5 тэрбум төгрөг төвлөрүүлэх ёстой. Одоогийн байдлаар 785 сая төгрөг дөнгөж орж ирлээ. Төсөвт 13 сая найман зуун мянган төгрөг тасрахад хүрээд байна" гэлээ.

Газар эзэмших, ашиглах эрхийн дуудлага худалдааг 2003 оноос өнөөдрийг хүртэл нийт 38 удаа зохион байгуулжээ.

09:34 2017/10/06

Нийслэлийн Газрын албанаас зарласан газар эзэмших, ашиглах эрхийн дуудлага худалдаа болж байна. Газар эзэмших, ашиглах эрхийн дуудлага худалдаа Хангарди ордны 14 давхрын хурлын зааланд өнөөдөр 10:00 цагаас эхлэн нээлттэй явагдана.

Дуудлагаар дараах 30 байршил дахь газруудыг худалдаалах юм.

д/д	Газрын байршил	Зориулалт	Хэмжээ /га/	Дуудлага худалдааны анхны үнэ /төг/
1	Баянзүрх дүүргийн 11-р хороо,УБ-Налайхын чиглэлийн авто замын хойд талд	Амины сууцны хороолол	3.46	307,182,687
2	Баянзүрх дүүргийн 20-р хороо, Хадатын аманд	Амралт, аялал жуулчлал	3.32	146,880,000
3	Хан-Уул дүүргийг 10-р хороо, Чингис хаан олон улсын нисэх онгоцны буудлын баруун урд талд	Орон сууц	1.6	153,189,787
4	Хан-Уул дүүргийг 10-р хороо, Чингис хаан олон улсын нисэх онгоцны буудлын баруун урд талд	Орон сууц	3.0	274,982,440
5	Хан-Уул дүүргийг 10-р хороо, Чингис хаан олон улсын нисэх онгоцны буудлын баруун урд талд	Амины сууцны хотхон	2.23	199,004,901
6	Хан-Уул дүүргийг 10-р хороо, Чингис хаан олон улсын нисэх онгоцны буудлын баруун урд талд	Конторын барилга	1.14	764,573,728
7	Хан-Уул дүүргийг 10-р хороо, Чингис хаан олон улсын нисэх онгоцны буудлын баруун урд талд	Орон сууц	0.7	69,428,944
8	Хан-Уул дүүргийг 10-р хороо, Чингис хаан олон улсын нисэх онгоцны буудлын баруун урд талд	Орон сууц	0.7	69,428,944
9	Хан-Уул дүүргийг 10-р хороо, Төв аймаг чиглэлийн авто замын дагуу	Худалдаа, үйлчилгээ	0.8	352,800,000
10	Хан-Уул дүүргийг 10-р хороо, Төв аймаг чиглэлийн авто замын дагуу	Үйлчилгээ	1.0	444,228,702
11	Хан-Уул дүүргийг 10-р хороо, Чингис хаан олон улсын нисэх онгоцны буудлын баруун урд талд	Худалдаа, үйлчилгээ	0.83	735,536,472
12	Хан-Уул дүүргийг 10-р хороо, Чингис хаан олон улсын нисэх онгоцны буудлын баруун урд талд	Орон сууц	0.39	38,781,165
13	Хан-Уул дүүргийг 10-р хороо, Морингийн гэр хорооллын урд талд	Орон сууц	5.0	440,800,000
14	Хан-Уул дүүргийг 10-р хороо, Морингийн гэр хорооллын урд талд	Орон сууц	4.0	352,800,000
15	Хан-Уул дүүргийг 10-р хороо, Морингийн гэр хорооллын урд талд	Орон сууц	4.0	352,800,000
16	Хан-Уул дүүргийн 14-р хороо, Түргэний гол дагуу	Аж ахуй, фермер	3.75	128,739,733
17	Хан-Уул дүүргийг 8-р хороо, Чингис хаан олон улсын нисэх онгоцны буудлын урд талд	Үйлчилгээ	5.0	2,214,453,500
18	Сонгинохайрхан 32-р хороо, Авто худалдааны цогцолборын Бүс 6, барилга 7	Зочид буудал, худалдаа үйлчилгээ	1.1	492,300,000
19	Сонгинохайрхан 32-р хороо, Авто худалдааны цогцолборын Бүс 6, барилга 8	Зочид буудал, худалдаа үйлчилгээ	1.1	492,300,000
20	Сонгинохайрхан 21-р хороо, Рашаант өртөөний зүүн талд	Аж ахуйн	8.03	354,286,320
21	Сонгинохайрхан 21-р хороо, Баруун турууны давааны баруун хойд талд	Аж ахуйн	3.02	133,493,000
22	Налайх дүүргийн 5-р хороо, Гандан уулын урд талд	Үйлдвэрлэл	1.0	44,800,000
23	Налайх дүүргийн 5-р хороо, Гандан уулын урд талд	Үйлдвэрлэл	1.0	44,800,000
24	Налайх дүүргийн 5-р хороо, Гандан уулын урд талд	Үйлдвэрлэл	1.0	44,800,000
25	Налайх дүүргийн 5-р хороо, Гандан уулын урд талд	Үйлдвэрлэл	1.0	44,800,000
26	Налайх дүүргийн 5-р хороо, Гандан уулын урд талд	Үйлдвэрлэл	1.0	44,800,000
27	Багахангай дүүргийн 1-р хороо, УБ-Замын-Үүд чиглэлийн төмөр замын баруун талд	Үйлдвэрлэл	60.0	2,640,800,000
28	Багахангай дүүргийн 2-р хороо, Багануур чиглэлийн төмөр замын хойд талд	Үйлдвэрлэл	5.0	220,800,000
29	Багахангай дүүргийн 2-р хороо, УБ-Замын-Үүд чиглэлийн төмөр замын зүүн талд	Худалдаа, үйлчилгээ	1.0	44,800,000
30	Багануур дүүргийн 3-р хороо, 252 дугаар ангийн хойд талд	Худалдаа, үйлчилгээ	35.6	31,33,600,000
Нийт			160.77	14,781,990,323

Дуудлага худалдаанд оролцогчдын хүсэлтийг 2017 оны аравдугаар сарын 3-ны өдрийн 8.30 минутаас эхлэн 2017 оны аравдугаар сарын 6-ны өдрийн 9.30 минут хүртэл нийслэлийн Газрын алба, Газрын менежмент, төлөвлөлтийн хэлтэст битүүмжилсэн хайрцгаар хүлээн авсан байна.

11:05 2017/10/06