ТАНИЛЦ: Таны төлөх татвар ихсэж төсвийн орлогыг НЭМЭГДҮҮЛЭХ ЦАГАЛБАР

Онцгой албан татварын тухай хуульд нэмэлт, өөрчлөлт оруулж 2017 оны 4 дүгээр сарын 1-ний өдрөөс эхлэн хос тэжээлт автомашин, шингэрүүлсэн хийгээр ажилладаг автомашин, цахилгаан тэжээлт автомашины татварын хөнгөлөлтийг 50 хувиар бууруулж, суудлын автомашины хөдөлгүүрийн цилиндрийн багтаамж, насжилтаас хамааруулж онцгой албан татварын хэмжээг нэмнэ.

Тухайлбал, 4500см³-аас доош хөдөлгүүрийн багтаамжтай суудлын автомашинд үйлдвэрлэсэн оноос хамааруулж 3-15 хувь, 4501см³-аас дээш хөдөлгүүрийн багтаамжтай суудлын автомашинд 40-250 хувиар тус тус онцгой албан татварын хэмжээг нэмэгдүүлнэ.

Ингэснээр төсвийн орлого

• 2017 онд 37.2 тэрбум төгрөг,
• 2018 онд 68.8 тэрбум төгрөг,
• 2019 онд 75.8 тэрбум төгрөгөөр нэмэгдэхээр байна.

Энэ 2017 оны 4 дүгээр сарын 1-ний өдрөөс эхлэн иргэдийн хадгаламжийн хүүгийн орлогод татвар ногдуулна.

Өнөөгийн мөрдөгдөж буй Хувь хүний орлогын албан татварын тухай хуулийн дагуу иргэдийн хадгаламжийн хүүд 2018 оны 1 дүгээр сарын 1-ний өдрөөс эхлэн татвар ногдуулна.

Энэ арга хэмжээ нь үндсэндээ татвар ногдуулж эхлэх хугацааг 9 сар наашлуулж байна гэсэн үг юм.  

Ингэснээр төсвийн орлого

• 2017 онд 43 тэрбум төгрөг,
• 2018 онд 67 тэрбум төгрөг,
• 2019 онд 70 тэрбум төгрөгөөр нэмэгдэх боломжтой.

Хадгаламжийн хэмжээ, хугацаа хамаарахгүй ирэх дөрөвдүгээр сараас ТАТВАР АВАХ юм. Энэ талаар ЭНД дарж уншина уу. 

Энэ 2017 оны 4 дүгээр сарын 1-ний өдрөөс эхлэн импортын тамхинд ногдох гаалийн албан татварын хэмжээг Дэлхийн худалдааны байгууллагатай тохирсон дээд хэмжээнд тулган нэмэгдүүлж 30 хувьд хүргэнэ.

Энэ арга хэмжээний үр дүнд төсвийн орлого

• 2017 онд 20 тэрбум төгрөг,
• 2018 онд 26 тэрбум,
• 2019 онд 27 тэрбум төгрөгөөр нэмэгдэх боломжтой.

Засгийн газар 2016 оны 10 дугаар сарын 5-ны өдрийн 109 дүгээр тогтоолоор автобензин, дизель түлшний онцгой албан татварыг 1.5-2.6 дахин буулгасан.

Дараа нь Засгийн газар 2016 оны 11 дүгээр сарын 30-ний өдрийн 166 дугаар тогтоолоор автобензин, дизель түлшний онцгой албан татварыг дахин 1.6-4.3 дахин бууруулсан. Эдгээр бууралтын үр дүнд нийт иргэд, аж ахуйн нэгжид 50 гаруй тэрбум төгрөгийн татварын хөнгөлөлтийг эдлүүлсэн байна.  

ОУВС-ын хөтөлбөр хэрэгжүүлэхтэй холбоотойгоор дээр дурдсан 2 удаагийн татварын бууралтыг 2017 оны 7 дугаар сарын 1, 2017 оны 10 дугаар сарын 1-ний өдрөөс эхлэн 2 үе шаттай буцаах болно.

Энэ арга хэмжээг авч хэрэгжүүлснээр төсвийн орлого доорх хэмжээгээр нэмэгдэх боломжтой.

• 2017 онд 103.2 тэрбум төгрөг,
• 2018 онд 227.9 тэрбум төгрөг,
• 2019 онд 253.2 тэрбум төгрөг

ОУВС, АНУ-ын төрийн сангийн идэвхтэй дэмжлэгтэйгээр орлогын удирдлагыг сайжруулах чиглэлээр тодорхой ажлыг хийсээр ирсэн.

Энэхүү арга хэмжээг цаашид үргэлжлүүлэн энэ 2017 онд багтаан татварын удирдлагын чиглэлээр холбогдох хуулийн төслийг боловсруулах, мөн хялбаршуулсан татварын тогтолцоо бий болгох хуулийн төслийг боловсруулна.

Ирэх 2018 оны 1 дүгээр сарын 1-ний өдрөөс эхлэн хувь хүний орлогын түвшингээс хамааруулж шатлал тогтоон 10, 15, 20, 25 хувиар орлогын албан татвар ногдуулах.

Түүнчлэн бага орлоготой иргэдийн орлогыг нэмэгдүүлэх үүднээс жилд үзүүлэх татварын хөнгөлөлтийн хэмжээг үе шаттайгаар нэмэгдүүлнэ.

• 2018 онд 120 000 төгрөгийн,
• 2019 онд 160 000 төгрөгийн,
• 2020 онд 200 000 төгрөгийн,
• 2021 оноос эхлэн 240 000 төгрөгийн татварын хөнгөлөлт үзүүлнэ.

Дээрх арга хэмжээг авч хэрэгжүүлснээр төсвийн орлого

• 2018 онд 73.3 тэрбум төгрөг,
• 2019 онд 50 тэрбум төгрөг,
• 2020 онд 16.1 тэрбум төгрөгөөр нэмэгдэх боломжтой

Нийгмийн даатгалын сангийн шимтгэлийн тухайд

• 2018 онд 2 хувиар,
• 2019 онд 1 хувиар,
• 2020 онд 2 хувиар нэмэгдүүлнэ.

Одоогоор нийгмийн даатгалыг ажилтан өөрөө 10 хувь, ажил олгогч 11 хувь төлдөг байсныг 2018 онд ажилтан, ажил олгогч тус бүр нэг нэг хувиар нэмэгдүүлэх тооцоолол хийсэн. 

2019 оны 1 дүгээр сарын 1-нээс хувь хүний НДШ 11.5 хувь, ажил олгогчийнх 12.5 хувь болно. 2020 оны 1 дүгээр сарын 1-нээс хувь хүний НДШ 12.5, ажил олгогчийнх 13.5 хувь болж нэмэгдэнэ.

Онцгой албан татварын тухай хуульд нэмэлт, өөрчлөлт оруулж, архи, тамхинд ногдох онцгой албан татварын хэмжээг

• 2018 онд 10 хувь,
• 2019 онд 5 хувь,
• 2020 онд 5 хувь нэмнэ. 

Улмаар төсвийн орлого

• 2018 онд 13.1 тэрбум төгрөг,
• 2019 онд 21.9 тэрбум төгрөг,
• 2020 онд 25.4 тэрбум төгрөгөөр

тус тус нэмэгдэх боломжтой.