Мобиком Фэйсбүүктэй хамтран интернэтэд ҮНЭГҮЙ холбогдох FREE BASICS үйлчилгээг нэвтрүүллээ

Мобиком Корпораци Фэйсбүүктэй хамтран интернэтийг илүү олон хэрэглэгчдэдээ түгээх зорилгоор FREE BASICS хэмээх цоо шинэ үйлчилгээг нэвтрүүлснээ өчигдөр зарлалаа.

Фэйсбүүкийн FREE BASICS хэмээх энэхүү үйлчилгээ нь дэлхийн олон улс оронд амжилттай хэрэгжиж байгаа бөгөөд Монгол Улс 29 дэх орон нь болж байна.

Үйлчилгээний гол онцлог нь олон мянган хэрэглэгч огт үнэ төлбөргүйгээр цахим ертөнцөд холбогдох боломжтойд оршино.

Мобикомын нийт хэрэглэгчид FREE BASICS үйлчилгээг ашиглан гар утаснаасаа өргөн хэрэглээнд зориулсан боловсрол, эрүүл мэнд, мэдээний болон олон нийтийн сүлжээний вэбсайтуудад үнэ төлбөргүйгээр хандаж болдог болж байгаа юм байна. Тухайлбал олон нийтийн сүлжээ Фэйсбүүк, цахим нэвтэрхий толь Википедиа, мэдээллийн портал сайт Gogo, цахим орчуулгын Translate.com болон цаг агаарын AccuWeather зэрэг өргөн хэрэглээний 20 гаруй вэбсайтад үнэгүй хандах боломжтой болж ажээ.

Хэрэглэгчид freebasics.com хуудсанд хандах эсвэл Андройд утсанд зориулсан апликейшныг rap утсандаа татаж аваад дээрх вэбсайтууд руу үнэгүй хандана.

Харин тухайн хүний утасны марк, үйлдлийн систем болон бусад апликейшны шинэчлэл хийх тохиргооноос хамааран дата хэрэглээнээс тооцогдож болзошгүйг анхаарах хэрэгтэй аж.

ХҮМҮҮСИЙН ХАМГИЙН ИХ ХҮЛЭЭЖ БУЙ ҮЙЛЧИЛГЭЭ

 

Шинээр нэвтэрч буй үйлчилгээний талаар Мобиком корпорацийн Байгууллагын бизнесийн газар, Бүтээгдэхүүн Маркетингийн газрын захирал М.Энхсайхантай товч ярилцлаа.

-Free Basics үйлчилгээг нэвтрүүлэх зорилго, онцлог нь яг юу вэ?

-Мобиком корпораци өнөөдрөөс эхлээд Фэйсбүүктэй хамтраад Free Basics буюу хүмүүст анхан шатны мэдээллийг үнэгүй хүргэх үйлчилгээг нэвтрүүлж байна. Үүн дотор фэйсбүүкийг текст хэлбэрээр, түүнчлэн Монголын мэдээллийн сайт болох Gogo.mn, эмэгтэйчүүд, хүүхэд, боловсролын талаар мэдээллийг агуулсан үйлчилгээ байгаа.

Энэ нь Мобиком корпорацийн зүгээс мэдээллийг хэрэглэгчиддээ түргэн шуурхай, хурдан хүргэх, 20 жилийн ойн ажлын нэг хэсэг болж байгааг мэдэгдэхэд таатай байна.

-Энэ үйлчилгээг нэвтрүүлэхэд хэрэглэгчдийн эрэлт хэрэгцээг хэр их байгаа гэж тооцоолсон бэ?

-Бидний хувьд энэ бол хүмүүсийн хүлээж байгаа номер нэг үйлчилгээ гэж бодож байна. Манай Монгол Улс залуучуудын орон төдийгүй иргэд шинэ юм ашиглах дуртай, хүсэлтэй байдаг

Ялангуяа технологийн хувьд. Тиймээс энэ нь бүхний хүсэж буй дата үйлчилгээний нэг хэсэг юм.

-Энэ үйлчилгээг цаашид хэрхэн хөгжүүлэх вэ. Ямар зорилготой ажиллах вэ?

-Дата мэдээллийг илүү их хүргэдэг болно. Цаашид мэдээллээ байгаа байршлаас хамааралгүй илүү хурдан, шуурхай хүлээн авдаг болгох зорилготой байгаа.

“МОБИКОМ КОРПОРАЦИТАЙ ХАМТРАН ИЛҮҮ ОЛОН ХҮНИЙГ ЦАХИМ ЕРТӨНЦТЭЙ ХОЛБОЖ БАЙГААДАА БАЯРТАЙ БАЙНА”

 

Фэйсбүүкийн Ази, Номхон Далайн Хөгжил Түншлэлийг хариуцсан захирал Анна Найгрен Монгол Улсад энэ үйлчилгээ нэвтэрч буйтай холбоотой “Интернэт бол нийгмийн болон эдийн засгийн хөгжилд томоохон нөлөөтэй зүйл болоод байна. Free Basics үйлчилгээ нь Монголын олон түмэнд интернэтийн хэрэглээг авахад нь томоохон хувь нэмэр оруулна гэдэгт баттай итгэж байна.

Бид хүн бүрт боловсрол, эрүүл мэнд, мэдээний вэбсайтууд руу үнэ төлбөргүй хандах боломжийг олгосноор тэдний амьдралд томоохон өөрчлөлтийг авчирна гэж найдаж байгаа. Мобиком Корпорацитай хамтран илүү олон хүнийг цахим ертөнцтэй холбож байгаадаа баяртай байна” хэмээв.

ТА FREE BASIC ҮЙЛЧИЛГЭЭГ АШИГЛАН ДАРААХ ВЭБ САЙТУУДАД ХАНДАХ БОЛОМЖТОЙ

Та бүхэн энэхүү үйлчилгээтэй холбоотой дэлгэрэнгүй мэдээллийг Мобиком корпорацийн вэб сайтнаас аваарай.