Хувьсан өөрчлөгдөж буй Нүүдэлчид

Гадныхан биднийг ямар нүдээр харж байгаа нь их сонирхолтой. Учир нь тэд илүү шинэлэг, бидний анзаараагүй өнцгөөс асуудлыг авч үзсэн байх нь элбэг.

Ингээд Монгол нутгаар аялсан зурагчин Hannah Reyes-ийн зургуудийг түүний хувийн тайлбартай нь хамт хүргэж байна. Мөн тэрээр хувьсан өөрчлөгдөж буй нүүдэлчдийн амьдралын талаар өөрийн бодлоо илэрхийлжээ.

Монголын хээр тал бол дэлхийд цор ганц нүүдэлчин соёлын өлгий нутаг билээ. Хятад, Орос гээд дэлхийн хоёр том гүрний дунд оршдог хэдий ч нүүдэлчдийн тал нутаг, амьдрах хэв маяг тийм ч их өөрчлөгдөөгүй.  Өнөөдөр ч тэдний зарим ёс заншил Чингис хааны эрин үеийнхээс ялгаагүй хэвээр байна.

Гэсэн хэдий ч сүүлийн жилүүдэд  газар нутгийн өөрчлөлт бий болж, иргэд боловсрол, ажлын байр, орчин үеийн тав тухтай амьдралыг хайн хотод суурьшиж эхэлжээ. Үнэн хэрэгтээ дан ганц хот руу нүүдэллэж байгаа хүмүүсээс гадна нүүдэлчин амьдралын хэв маягаа үргэлжлүүлэхээр шийдсэн хүмүүст ч бас энэ хандлага нөлөөлж байна. 

Өнөөдөр талын нүүдэлчид амьдралын уламжлалаа шинэ хэв маягтай хослуулан амьдарч байна. Тэд нүүдлийн мал аж ахуйгаа эрхэлж байгаа ч мал сүргээ маллахдаа мотоцикл их ашигладаг болсон. Мөн нэг газраас нөгөө рүү нүүдэллэхдээ үхэр тэрэг биш ачааны машин ашиглаж байна. Ачааны машин, мотоцикл зэргийг ашиглахтай холбоотой хөдөө шатахуун түгээх газрууд бий болж эхэлжээ. 

Монголын уламжлалт сууц болох гэрийн гадаа нарны эрчим хүчээр цахилгаан гаргадаг хавтангууд байдаг. Энэ нь хөдөө цахилгааны эх үүсвэрийг бий болгох гол арга зам. Нарны эрчим хүчээр бий болгосон цахилгаанаар тэд зурагт үзэж, төв суурин газар сургууль сурч байгаа хүүхдүүдтэйгээ холбоо барьдаг ажээ.

Монгол хүүхдүүд хөдөө, суурин газар гээд хаанаас гаралтай байх нь хамаагүй хотын сургуульд сурдаг. Харин хөдөөний хүүхдүүд зуныхаа амралтаар гэртээ харьж аав ээждээ мал маллахад нь тусалдаг юм. Тэдний зарим  нь сургуулиа төгсчихөөд малчин болдог байна. 

Технологийн хөгжил нүүдэлчдийн амьдралыг тодорхой хэмжээгээр өөрчилж байгаа. Гэхдээ энэ өөрчлөлтүүд уламжлалаа урт удаанаар хадгалж, өсөн хөгжихөд нь тусалж болох юм.

Тэд хөдөө талын нүүдэлчин амьдралаасаа зугтахаасаа илүү шинэчлэлийг өөрсдийн амьдралдаа “нутагшуулах” нь илүү чухал байна.

Соёлын энэ өөрчлөлт орчин үеийн тав тухтай амьдралыг бий болгохын зэрэгцээ эртний гайхалтай амьдралын хэв маягаа хадгалах боломжийг олгоно. 

Эх сурвалж: TheDiplomat

1

Монгол залуу шонхор шувуутай хамт. Бүргэдийн ан хийдэг нүүдэлчид жуулчдыг шувуудаар татаж, нэгэн төрлийн бизнес хийдэг.

2

Шөнийн талд буй гэр

3

Малчин хүүхэд эмээлгүй морь унаж байна.

4

Нүүдэлчдийн гол сууц болох гэрээ барьж буй залуу. Яг одоо тэрээр гэрийнхээ гол модыг барьчихсан байгаа нь.

5

Гэртээ амарч буй Монгол эр. Түүний ард өлгөсөн хивсэн дээр уламжлалт маягийн хээ харагдаж байна. Харин гэрийн тавилгаа хотын дэлгүүрээс авчээ.

6

Ээжийгээ гэрээ барихад тусалж буй балчир охин.

7

Гэрийнхээ голд нимгэн дэлгэцтэй зурагт байршуулжээ. Орчин үед нүүдэлчид нарны эрчим хүч ашиглан зурагт үзэж, гар утас ашиглаж байна.

8

Хөдөө нутгийн зам дээр байгаа морьд. Үндэстний бэлгэ тэмдэг болсон морийг Монголчууд мал аж ахуй, ан агнуур, спорт болон аялал жуулчлалд өргөн ашигладаг.

9

Буддын шашны ариун дагшин газар хөдөө их тааралдана. Эдгээр газрууд нь хүмүүсийн оюун санааг байгалиа хайрлан, хамгаалж хүндэтгэхэд чиглүүлдэг.

10

Монгол гэрийн гадаа буй нарны эрчим хүч гаргадаг хавтан. Нүүдэлчид гэрийнхээ цахилгааныг үүгээр бий болгож авдаг.

11

Үндэсний хувцасаа өмссөн эр мотоцикл дээрээ сууж байна. Өнөө үед мотоцикл нүүдэлчдийн ахуй амьдралд өргөн ашиглагддаг болсон билээ.

12

Ээжийгээ үнээ саахыг харж буй балчир охин. Зуны цагт хүүхдүүд гэртээ ирж аав, ээждээ тусалдаг.