Хэрсүүжиж байгаа монголчууд

2024 оны сонгуулийн өмнөхөн дөө нэг намын хэт дарангуйлал, эзэрхийллийг эсэргүүцсэн намууд сөрөг хүчний байр суурийг нөхнө гэсэн амлалтыг ам уралдан өгч байв. Төр данхайж байна, улс төрийн дарангуйлал руу гулсаж байна гэдгийг тэр улс төрийн намууд ч ганцхан мэдээд байсан юм биш олон нийт ч яс махандаа тултал ойлгочхоод байсан хэрэг. Ингээд сонгуулийн шинэ тогтолцоогоор, ҮХНӨ-өөр “шинэ” сонгууль болж өнгөрсөн.

Монголчууд нийтээрээ сүүлийн 10 гаруй жил эрэлд гараад байсан “улс төрийн сөрөг хүчин” болох боломжтой гэж үзсэн намуудад саналаа харамгүй өгсөөн. Учир нь нэг нам хэт олонх байж засаглах нь хяналт, хариуцлагын тогтолцоог гажуудуулж, төрийн хулгай дээрмийн суурь болдог юм байна, ардчилсан тогтолцоотой, парламентын засаглалтай улсад сөрөг хүчин ямар чухлыг оройтсон ч хатуу ойлгочихсон байв. ЖДҮ, нүүрсний хулгай, Хөгжлийн банкны асуудал гээд бидэнд сурах тод кэйсүүд олон байсан шүү дээ.

Ямартаа ч сонгогчид сөрөг хүчинтэй болчихлоо, одоо нэг урдах ажлаа хийгээд улстөржихгүй амьдарч болохоор боллоо гээд хэлж дуусаагүй байтал хамгийн их суудал авсан гурван нам Хамтарсан Засгийн газар байгуулах тухай мэдээ хөвөрч эхлэх нь тэр. Олонх болж чадаагүй нам л эвсэл байгуулж хамтардаг гэх улс төрийн онол, практикийг энд дурдах нь утгагүй болоод явчихна. Улс төрийн намын үзэл баримтлал баруун зүүний талаар ярих ч юм биш. Ийнхүү олны урам, итгэлийг шавартай хутган Хамтарсан Засгийн газар байгуулагдаад хоёр улирлын нүүрийг үзээд байна. Олон жил гацсан мега төслүүдийг хөдөлгөж, хөгжлийн манлайд хүрэхэд сөөм дутуу байгааг бүх л дарга нар хэлж байна. Энэ мэт хамгаалах мянга түмэн өнцөг байгаа ч харааж зүхэх өнцөг нь илүү олон байгаа нь нууц биш юм. Монголчууд дахин сөрөг хүчний эрэлд гараад байна. Уртын урт зурайсан замд...

Урьдын л адил монголчууд төр засгийнхаа “буянд” уйдахгүй л амьдарч байна. Сенсацаас сенсацын хооронд “завгүй” амьдарч байх зуур сөрөг хүчний орон зайг олон нийт өөрсдөө нөхөх нэгэн үйл явдал өрнөж эхэлсэн нь контент бүтээгч “Ноорог”-ийн залуусыг хойшлуулшгүй ажиллагаа явуулж баривчилсан явдал байлаа. Үндэслэл шалтгаан нь одоо хүртэл тодорхой болоогүй энэ үйл явдал сөрөг хүчний орон зайг хамгийн их үгүйлэхэд хүргэв. Гэхдээ бид гансраад, гаслаад зүгээр суусангүй. Өөрсдөө сөрөг хүчний орон зайг нөхөж, ард түмэн илүү хүчтэйг харуулахаар нэгдээд байна.

Энэ савыг дүүргэх улс төрийн намын орон зай хэдийгээр том ч олон нийтийн хүчтэй дуу хоолой, эсэргүүцэл дахин сонгогдох, эрх мэдлээ хадгалах хүсэлтэй улс төрийн намууд, улстөрчдөд хамгийн их хамаатай. Учир нь монголчууд өдрөөс өдөрт хэрсүүжиж байгаа. Хуулийн байгууллагын бүхий л удирдлага, төлөөллүүд өөрсдийгөө зөвтгөх мэдэгдлүүдийг удаа дараа хийж, тролл, "хиамчид"-аа бүрэн бүрэлдэхүүнээр нь дайчилсан ч жин дарж чадахгүй байгаа нь ч үнэн. “Төрийн пиар”-ын хуучин технологи нэгэнт ажиллахаа больсон. Төрийн дайсан гэж нэрлэсэн болгоныг дайсан гэж боддог, зөв гэж хэлсэн болгонд нь итгэдэг цагаан цаас, загасны ой санамжтай гэх тодотголын эзэн монголчууд төрийнхөө “буянаар” хэрсүүжсээр байна. Бидэнд энэ арга чинь нөлөөлөхгүй эсрэгээрээ үйлчлээд байгааг төрийн пиарчин, найруулагчид нөхөрсгөөр сануулах хүртлээ хатуужиж, иргэний нийгэм амьд байгааг эл үйл явдал тод харуулав. Бүгдээрээ худалдагдсан гэх тодотголтой сэтгүүл зүй ч тос усаараа ялгараад, эрүүл зөв сэтгэлгээтэй залуус улам илүү олуулаа болж, хүч нэмж байгааг ч харлаа, бахадлаа. Энэ тэмцлийн эрч буурахгүй, хар салхи шиг улам эрчийг авч байна. Ардчиллыг ТЭД зүсэм зүсмээр гэмтээсэн ч араас нь нөхөж, эвлүүлж байгаагаа Монголчууд мэдэрсэн өдрүүд өнгөрч байна.

Олон нийтийн дуу хоолойг сонсохгүй, хүсэл сонирхлыг илэрхийлэхгүй л бол дахиж сонгохгүй гэх хатуу байр суурь ч улам бэхжиж байгаа. Хамтарсан Засгийн газарт орж, итгэл эвдсэн АН, ХҮН-д хариуцлага тооцох өдрөө олон нийт хоног тоолон хүлээж суугаа. Хайр итгэлийг даагаагүй МАН-д яаж хариугаа барихаа бодчихсон л байгаа. Хаана, хэн, хэзээ юу хэлж, хаана хэний талд үйлчилсэн бэ гэдгийг хэвлэлийн хуудас, интернэтэд хэдийнээ түүх болон үлдэж байгаа. Харин басамжилж, дорд үзэх хэрэггүй гэдгийг хамгийн сүүлд нөхөрсгөөр дахин сануулъя даа.

#FreeNoorog #FreeDemocracy