Элэг нэгт монголчууд минь ТУСЛААРАЙ

Гэрэл зургийг MPA агентлагийн онцгой зөвшөөрөлтэйгөөр ашиглав

Үе үе олон нийтийн сүлжээгээр ЭЛЭГ НЭГТ МОНГОЛЧУУД МИНЬ ТУСЛААРАЙ гэх постууд хөвөрдөг нь нийтлэг үзэгдэл болжээ. Зарим нь бүр хандив босгох гээд аян, шоу тоглолт зохион байгуулж байна. Сайн санааны үзүүрт тос гэдэг шиг хүнд туслах сэтгэл нь сайхан. Гэвч бид ийм маягаар хэдэн арван хүнийг л аварч чадна. Харин иргэндээ ээлтэй эрүүл мэндийн систем, эрсдэлийг хаах даатгалтай бол бид хэдэн зуу мянгаар нь аварч чадна. Хандивын аян бол биднийг эрүүл болгох шийдэл биш.

Нэгэн жишээ авъя. Манай улсын хорт хавдрын өвчлөлөөр дэлхийд тэргүүлдэг. Сүүлийн 10 жилийн хугацаанд хорт хавдраар шинээр өвчлөгсдийн байнга өсөж байна.

Хорт хавдрыг эмчлэх эмчилгээний зардал нь зургаан сар үргэлжлэхэд дунджаар 1,500 - 30,000 ам.доллар буюу ойролцоогоор 3,750,000-75,000,000 төгрөгийн хооронд хэлбэлздэг. Монгол хүний дундаж цалин энэ оны байдлаар 1,330,000 төгрөг гэж тооцвол гурван сараас зургаан жилийн цалин нь хагас жилийн эмчилгээний зардалтай дүйцэж байна. Мөн эмчилгээний зардал өндөр учраас ар гэрийнхэнд нь сэтгэл санааны хямрал, хөрөнгө мөнгөний бэрхшээл тулгарч байна.

Тухайлбал одоогийн байдлаар эрүүл мэндийн санхүүжилтийн 40%-ийг улсын төсвөөс, 20%-ийг ЭМДС-аас, үлдсэн 40 хүртэлх хувийг иргэд хувиасаа гаргаж байна. Хувь хүний халааснаасаа гаргах эрүүл мэндийн санхүүжилтийн хэмжээ 25%-аас хэтэрвэл ядуурал гүнзгийрч, орлогоос хамааралтай тэгш бус байдал өснө гэж Дэлхийн Эрүүл Мэндийн Байгууллага (ДЭМБ) үздэг. Гэтэл иргэд энэ мэт санхүүгийн дарамтыг даван туулахаар халаасаа хоосолж, өр, зээл авч эцэстээ "Элэг нэгт монголчуудаа туслаарай" хэмээн хандивын аяныг орон даяар өрнүүлэх зэргээр л аргацааж байна шүү дээ.

Монгол Улсын эрүүл мэндийн даатгалын тухай хуулийн 7 дугаар зүйлийн 7.1-д зааснаар Аливаа даатгал төлөгч “эрүүл мэндийн чанартай, аюулгүй, тэгш, хүртээмжтэй тусламж, үйлчилгээ авах эрхтэй” гэж заасан байдаг. Гэтэл иргэд маань төлж буй эрүүл мэндийн даатгалынхаа үр шимийг хүртэж тэгш, хүртээмжтэй тусламж үйлчилгээг эх орондоо авч чадаж байгаа юу гэдэг нь өөрөө маш том асуудал болоод байна.

Эх орондоо эмчлүүлж чаддаг, эх орондоо эрүүл болж чаддаг эрүүл мэндийн систем бидэнд хэрэгтэй байна.