Франц эр уламжлалт аргаар махан бүтээгдэхүүн боловсруулж, эхнэр нь хөрөнгийн талх барьсаар бизнесээ амжилттай эхлүүлсэн ТҮҮХ

Түм бужигнасан их хотын нэгээхэн буланд "Мерлин" хэмээх буйдхан газар үйл ажиллагаа явуулдаг. Франц эр уламжлалт аргаар янз бүрийн махан бүтээгдэхүүн боловсруулж, эхнэр нь амьд хөрөнгийн талхаа барьдаг. Эхнэртэйгээ одоогоос 20 орчим жилийн өмнө Монголд ажлаар ирэхдээ танилцжээ. 

Үүдээр нь орвол талхны үнэр үнэртэж, махан бүтээгдэхүүнээ хөргөгчинд өлгөсөн харагдана. Худалдагч шинэхэн гарсан багетыг бор цаасанд боож, талх зүсэх чимээ гарч байлаа. 

Утсан хиам, талх болон хагас боловсруулсан бүтээгдэхүүн хийдэг тус газрын эзнийг Жан-Мари Кайло гэдэг. Энэ оны зургаадугаар сарын сүүлчээр "Мерлин" дэлгүүрээ нээж, тэд өөрсдийн бизнесээ амжилттай эхлүүлж чаджээ. 

"Амталсан мах, гар аргаар хийсэн хиам, амтат талхгүйгээр зарим хүн өглөөний цайгаа төсөөлөхөөргүй болсон"

Амжилттай гэсний учир нь энэхүү дэлгүүрийг зорих шинэ үйлчлүүлэгчдийн тоо өдөрт нэмэгдсээр буй. Бидний хийдэг амталсан мах, гар аргаар хийсэн хиам, амтат талхгүйгээр зарим хүн өглөөний цайгаа төсөөлөхөөргүй болсон гэж дэлгүүрийн эзэн ярьж байлаа. 

Дэлгүүрийн эзэн өглөөний 04:00 цагт босож, 05:00 цагт ажил дээрээ очдог байна. Улмаар 10:30 цагаас дэлгүүрээ нээж, өөрийн бэлтгэсэн талх, багет, нарийн боов, махан бүтээгдэхүүнээ худалдаалж эхэлдэг. Тэрбээр долоо хоногийн турш 19:00 цаг хүртэл ажилладаг.

Одоогоор зургаан төрлийн хиам, утсан гурав, утаагүй гурав, панцетта, үхрийн мах гэсэн нэр төрлийн хиам худалдаалагдаж байна. Түүнчлэн утсан өвчүү болон торт ч бий. Цаг агаарын байдлаас шалтгаалж түүний хийдэг бүтээгдэхүүний төрөл зүйл, жор нь шинэчлэгддэг. Гэсэн хэдий ч махан бүтээгдэхүүн болон талх тус дэлгүүрт үргэлж байдаг. 

Гахайн утсан мах хийхэд 5-6 хоног, гахайн махны хиам хийхэд 18 орчим хоног шаарддаг байна. 

Дэлгүүрийнхээ нэрийг хэрхэн сонгож өгсөн талаар "Эхэндээ дэлгүүрээ "LOUP GOURMAND" гэж нэрлэсэн боловч Монгол хэл рүү орчуулах боломжгүй байсан. Мерлин бол домогт илбэчин, Артур хааны зөвлөх байсан хүн юм. Тиймээс энэ нэрийг сонгож өгсөн" хэмээв. 

"Францын уламжлалт аргаар боловсруулсан махан бүтээгдэхүүний дэлгүүр нээхэд хүмүүс эхэндээ их сониучирхсан"

Өдөрт дунджаар 70 орчим хүн тус дэлгүүрээр үйлчлүүлж ямар нэг зүйл худалдаж авдаг байна. "Монгол хүний сэтгэхүй угаасаа сониуч болохоор эхэндээ зүгээр л юуг ямар үнээр зарж байгаа вэ гэдгийг харах гэж ирдэг хүмүүс их байсан. Харин яваандаа тэд худалдан авагчид болж байна.

Би монголоор ярьдаггүй болохоор хүмүүс манай бүтээгдэхүүнийг амтлаад ямар сэтгэгдэлтэй байгааг нь тэдний нүүр хувирлаас хэрхэн царай нь өөрчлөгдөж байгаагаас анзаардаг. Сайхан амт амталсан хүн инээмсэглэдэг" хэмээн Жан-Мари Кайло онцолсон юм. 

Бүх талх, багет, нарийн боовоо амьд хөрөнгөөр хийдэг аж. Өдөр бүр гурилыг хооллож эрүүл сайхан үнэртэй, шингэж сайтай талхыг бэлэн болгодог байна. 

 

Франц улсын иргэн түүний хувьд элдэв будаггүй, нитритгүй, гар аргаар боловсруулсан эко бүтээгдэхүүнийг эхнэрийн хамт үйлдвэрлэн монголчуудад хүргэж байна. Тэрбээр олон улсын туршлагатай бөгөөд АНУ, Африкт 100 орчим ажилтантай томоохон ресторануудад ажиллаж байжээ. 

Тэрбээр 12 настайгаасаа амралтаараа хоол хийж эхэлсэн байна. Цэвэр цөцгийн тосоор хийсэн кроссант хэрхэн хийхийг аль хэдийн мэддэг байв. Улмаар ресторанд талхчин, шарагч зэрэг ажлыг найзуудынхаа хамт дадлага болгож хийдэг байжээ. Одоо ч гэсэн тэрбээр хоол үйлдвэрлэл хүнсний худалдаагаа орхиогүй яваа. 

Түүний сонголт гал тогоо байсан. Ресторанд мэргэжлээ төгс эзэмшсэн хүмүүс ажилладаг гэж тэрбээр хэлж байлаа. Нарийн боов, шаркутери, махны дэлгүүр, загасны дэлгүүр, нарийн боовны газар, зайрмаг, товчхондоо идэж болох бүх зүйлийг хийхийн тулд мэргэжлээ бүрэн дүүрэн эзэмшсэн байх зайлшгүй шаардлагатай. 

Тэрбээр Францад "L'auberge du Connestable Chandos" гэдэг ресторантай байжээ. Тухайн ресторан нь Мазероллес дахь Путиерийн хажууд байрладаг бөгөөд 2014 онд худалдаж аваад дахин зарсан байна. 

Харин эхнэрийн хамт Монголд ирж амьдарснаас хойш ресторан нээхийг хүсээгүй ч хоолны бизнес эрхэлсээр байгаа аж.

"Бяслаг хийж амжилтад хүрэхийг зорьж байна"

 

Хиам хийх үйл явц нь нэлээд төвөгтэй байдаг аж. Энэ нь махыг тодорхой хугацаанд амтлагчаар давслах явдал юм. Гахай, адуу, үхэр, тахиа, загасны махыг тодорхой температурт хатаах болон утсанаар махны шинж чанараас хамаарч тодорхой хугацааны дараа бүтээгдэхүүн бэлэн болдог. 

Манай бүтээгдэхүүний бусдаас ялгарах зүйл бол амт юм

Өөрийн хийж буй бүтээгдэхүүний онцлогийн талаар "Зах зээлд гарч буй манай бүтээгдэхүүний бусдаас ялгарах зүйл бол амт юм. Хамгийн гол нь нитрит гэх мэт химийн бүтээгдэхүүн будагч бодис огт хэрэглэдэггүй. Зөвхөн уламжлалт гар аргаар бүх бүтээгдэхүүнээ боловсруулдаг. 

 

Bagi Mgl фэйсбүүк хуудсаас авав

Тэрбээр өөрийн мөрөөдлийн тухайд "Бүх зүйл миний хүссэнээр байвал би ирээдүйд хэд хэдэн зүйл бүтээхийг хүсэж байна. Мэргэжлийн хүмүүсийг сургаж бэлдэж гаргахыг хүсдэг. Тухайлбал загас, бяслаг, талх нарийн боовны төрөлжсөн дэлгүүр бий болгохыг зорьж байна. 

"Би хэзээ ч сурч мэдсэн зүйлдээ ханадаггүй, улам их суралцсаар байдаг"

Миний дараагийн зорилго бол халах үед хайлдаг бяслаг хийж амжилтад хүрэх явдал юм. Би хэзээ ч сурч мэдсэн зүйлдээ ханадаггүй, улам их суралцсаар байдаг" хэмээн ярьж байлаа.