ЗӨВЛӨГӨӨ: Нойргүйдэлд орсон үед татгалзах таван зүйл

Нойргүйдэл нь хамгийн түгээмэл тохиолддог нойрны эмгэг бөгөөд сэтгэл зүй, биеийн эрүүл мэндийг тогтворгүй болгож амьдралын чанарыг доройтуулдаг. Хэдэн өдрөөс 3 сар хүртэл үргэлжилбэл богино хугацааны нойргүйдэл, гурван сараас дээш хугацаатай байгаа тохиолдолд урт хугацааны нойргүйдэл гэж үздэг. Энэхүү байдал нь таны эрүүл мэндийг доройтуулж буй анхдагч шалтгаан байж болох хэдий ч бусад өвчнөөс шалтгаалан хоёрдогчоор үүсэж болно.

Нойргүйдлийн үед дараах шинж тэмдгүүд илэрнэ

• Унтаж чадахгүй удаан хөрвөөх
• Шөнөжин өнгөц сэрвэлзэж унтах
• Шөнийн турш хэд хэдэн удаа сэрэх
• Хэт эрт сэрээд эргэж унтаж чадахгүй байх
• Сэрсний дараа ядарсан мэдрэмжтэй байх
• Ядарч сульдаж байгаа хэдий ч өдөртөө унтаж чадахгүй байх
• Өдрийн турш ядарч, цухалдах
• Өдөртөө төвлөрч чадахгүй ажлын бүтээмж, суралцах чадвар буурах  
• Авто осол гаргах, ажил дээрээ алдаа гаргах эрсдэл нэмэгдэх гэх мэт

Богино хугацааны нойргүйдэлд хүргэх боломжтой хүчин зүйлс

• Стресс бухимдал
• Тав тухгүй ор, орчин (дуу чимээ, дулаан)
• Согтууруулах ундаа, кофейний хэрэглээ
• Шөнийн ээлжийн ажил
• Цагийн зөрүүтэй улс хоорондын аялал гэх мэт

Урт хугацааны нойргүйдэлд хүргэх шалтгаан

• Бие болон сэтгэцийн эрүүл мэндийн асуудлууд
• Нойргүйдэлд хүргэдэг эмийн тогтмол хэрэглээ гэх мэт

Нойргүйдэлд хүргэх эрсдэлт хүчин зүйлс

• Эмэгтэйчүүд дааврын тэнцвэргүй байдлаас шалтгаалж нойргүйдэлд илүү өртөмтгий байдаг
• Насжилттай холбоотой нойргүйдлийн асуудлууд үүсэх ба 60-аас дээш насныхан илүү мэдрэг

Богино хугацааны нойргүйдлийг хүн өдөр тутмын дадлаа өөрчилсөөр даван туулах боломжтой. Жишээлбэл:

• Өдөр бүр тогтмол цагт орондоо орох, босох
• Унтахаас 1 цагийн өмнө тайвширч амрах – усанд орох, ном унших зэрэг
• Унтлагын өрөөний гэрэл, дулааны зохицуулах
• Өдөр бүр өөрт тохирсон дасгал хөдөлгөөнийг тогтмол хийх

Дараах зүйлсээс зайлсхийх хэрэгтэй.

• Унтахаас 6 цагийн өмнөөс архи, тамхи, цай, кофе хэрэглэхгүй байх
• Орой хүнд хоол их хэмжээгээр идэхгүй байх
• Унтахаас 4 цагийн өмнөөс ачаалал ихтэй дасгал хөдөлгөөн хийхгүй байх
• Телевиз, утас унтахын өмнө хэрэглэхгүй байх
• Өдөртөө шаардлагагүй тохиолдолд унтахгүй байх

Хэзээ эмчид хандах вэ?

• Өдөр тутмын дэглэмээ өөрчилж унтахад туслах дээрх аргуудыг хэрэглэсэн ч үр дүн өгөхгүй байх
• Нойргүйдэл удаан хугацаагаар үргэлжлэх, хүндрэх
• Нойргүйдлээс үүсэж байгаа үр дагавар нь хэвийн амьдралын хэв маягийг өөрчлөх