15 эрэгтэй тутмын нэг нь үргүйдлийн асуудалтай нүүр тулдаг

Ойролцоогоор нийт хосуудын 15 хувьд жирэмслэхэд бэрхшээл тулгардаг бол нөхөн үржихүйн насны 15 эрэгтэй тутмын нэг нь үргүйдлийн асуудалтай нүүр тулдаг байна.

Эмэгтэй хүнд үр тогтоохын тулд эрэгтэйчүүдийн үрийн шингэнд хангалттай тооны давших хөдөлгөөнтэй, хэвийн бүтэцтэй, эр бэлгийн эсүүд байх ёстой. Нэг удаагийн дур тавилтаар хамгийн багадаа 40 сая орчим эр бэлгийн эсийг гадагшлуулж байж эр бэлгийн эсүүд үр дамжуулах хоолойд байгаа эм бэлгийн эстэй эвцэлдэж, үр тогтоож чаддаг.

Иймээс үрийн шингэнд эр бэлгийн эс огт байхгүй байх эсвэл давших хөдөлгөөнтэй болон хэвийн бүтэцтэй эр бэлгийн эсийн тоо цөөрсөн байх үед эрэгтэйд шалтгаант үргүйдэл үүсдэг.

Үүнд эрүүл мэндийн дараах шалтгаанууд нөлөөлнө.

• Варикоцеле: Төмсөгний венийн судасны өргөсөл
• Халдвар: Бэлгийн замаар дамжих зарим халдвар нь төмсөгт эргэшгүй өөрчлөлтийг үүсгэж, эр бэлгийн эс үүсэлтийг дарангуйлдаг бол дийлэнх нь эр бэлгийн эс гадагшлуулах сувагт гэмтэл учруулдаг.
• Үрийн шингэн гадагшлуулалт алдагдах: Дур тавих үед үрийн шингэн гадагшлахгүй байх эсвэл үрийн шингэн эргэх урсгалаар давсаг руу орох
• Эр бэлгийн эсийн эсрэг бие: Ховор тохиолдол тухайн хүний дархлаа тогтолцоо өөрийн эр бэлгийн эсийн эсрэг ажилладаг.
• Хавдар: Төрөл бүрийн хавдар, түүнээс үүдсэн хими болон туяа эмчилгээний үр дүн
• Дааврын тэнцвэргүй байдал
• Төмсөгт авсан гэмтэл
• Гахайн хавдраар өвдөх, хүндрэх
• Хромосомын өөрчлөлт зэрэг шалтгаан нөлөөлдөг.

Орчны талаас дараах зүйлс нөлөөлнө

• Химийн бодисын хортой орчинд ажиллаж, амьдрах
• Хүнд металлын болон цацраг идэвхт туяаны нөлөөнд өртөх
• Хэт дулааны нөлөөлөл: Төмсөг нь хүний биеийн ерөнхий температураас 1-2 градусаар бага температурт байхаар зохицуулагдсан байдаг. Иймд халуун ванн, саунд удаан суух, бариу дотуур хувцас өмсөж урт хугацаагаар хөдөлгөөнгүй суух нь эр бэлгийн эс үүсэлт, хадгалалтад сөрөг нөлөөтэй байж болзошгүй гэж үздэг.

Эрүүл мэнд, амьдралын хэв маяг талаас дараах зүйлс нөлөөлнө

• Эмийн хэрэглээ: Булчингийн хөгжлийг дэмжих зорилготой зарим эм, тарилга болон зарим мансууруулах бодис
• Хорт зуршил: Архины хэрэглээ эр бэлгийн дааврын хэмжээг бууруулсаар эр бэлгийн үүсэлтэд сөргөөр нөлөөлдөг бол тамхи татах болон дам тамхидалтад өртөх нь эр эсийн тоо хэмжээг багасгахад нөлөөлдөг байна.
• Биеийн жингийн илүүдэл: Дааврын тэнцвэргүй байдлыг үүсгэж эр бэлгийн эсийн үүсэлт, гадагшлалтыг дарангуйлна.
• Стресс бухимдал, нойргүйдэл нь дам байдлаар эрэгтэйчүүдийн нөхөн үржихүйд нөлөөлж байдаг.

Хэрэв танд болон таны дотнын хүнд дээрх шалтгаан, хүчин зүйлүүд байгаа эсвэл нэг жилийн хугацаанд тогтмол бэлгийн харьцаатай байсан ч жирэмсэн болоогүй бол мэргэжлийн эмчид хугацаа алдалгүй хандахыг зөвлөж байна.