Цэвэршилт

Гэрэл зургийг: The Telegraph

Энэ удаагийн нийтлэлээрээ эрэгтэй, эмэгтэй хүмүүсийн дунд үүсдэг цэвэршилтийн сэдвийг хөндлөө. 

Эмэгтэй

Эмэгтэйчүүдийн өндгөвчний үйл ажиллагаа аажим буурч, бэлгийн даавруудын тэнцвэрт байдал өөрчлөгдсөнтэй холбоотойгоор сарын тэмдэг алдагдах болон бусад дагалдах шинж тэмдгүүд илрэх нь цэвэршилт болж буйг илтгэнэ. 12 сарын турш сарын тэмдэг ирээгүй үед тухайн эмэгтэйг цэвэршсэн гэж үздэг. Цэвэршилтийн дундаж нас харилцан адилгүй бөгөөд дунджаар 45-55 насанд тохиолддог.

Илрэх байдал нь харилцан адилгүй байх бөгөөд дийлэнх эмэгтэйчүүд сарын тэмдгийн мөчлөг тогтвортой бус болж байгааг анзаардаг. Мөн нүүр, цээж рүү халуу оргих, шөнөдөө хөлрөх, сэтгэл санаа тогтворгүй болох, жин нэмэх, бодисын солилцоо удаашрах, арьс хуурайших, үтрээ хуурайших, бэлгийн дур хүсэл буурах зэрэг шинж тэмдгүүд илэрдэг.

Эдгээр шинж тэмдгүүд илэрч байгаа хүмүүст онцгой эмчилгээ шаарддаггүй бөгөөд өдөр тутмын амьдралын хэмнэлээ өөрчлөх замаар даван гарах боломжтой. Үүнд шим тэжээлээр баялаг тэнцвэртэй хооллолт, шаардлагатай амин дэм, эрдсийг нэмэлтээр хэрэглэх, биеийн онцлогт тохирсон дасгал хөдөлгөөн хийх, чанартай унтаж амрах зэрэг хамаарна. Мөн гэр бүл, найз нөхөд, нийгмийн дэмжлэгийг орхигдуулж болохгүй.

Зарим тохиолдолд дээрх цэвэршилтийн шинж тэмдгүүд хурцаар илэрдэг тул даавар орлуулах эмчилгээг эмэгтэйчүүдийн эмчийн хяналтайгаар хийдэг. Мөн сэтгэл зовнил хавсран илэрдэг тул сэтгэл засалчийн туслалцаа авах шаардлага тулгардаг.   

Эмч, эмнэлгийн тусламжийг цэвэршихийн өмнөх, цэвэршилтийн үед болон цэвэршсэний дараа хэдийд ч авах боломжтой бөгөөд урьдчилан сэргийлэх үзлэгүүдэд тогтмол хамрагдах хэрэгтэй. Жишээлбэл умайн хүзүүний хавдрын эсийн шинжилгээ, хөхний рентген зураг, ясны сийрэгжилт болон бусад товлолт оношилгоо шинжилгээнүүд багтана.

Эрэгтэй

Эрэгтэйчүүд ч гэсэн цэвэршдэг үү? Тийм ээ, эрэгтэйчүүд ч бас цэвэршдэг.

Ойролцоогоор 30 - 40 насны хооронд эрэгтэйчүүдийн төмсөгнөөс ялгардаг тестостерон дааврын түвшин жил бүр 2%-аар буурдаг байна. Улмаар 40 насны төгсгөл, 50 насны эхлэл үед эрэгтэйчүүдэд цэвэршилт тохиолдох ба бие болон сэтгэлзүйн шинж тэмдгүүд хавсран илэрдэг.

Эдгээр шинж тэмдгүүд хувь хүн бүрд харилцан адилгүй илрэх бөгөөд хэрэв тухайн хүний өдөр тутмын хэвийн амьдралд сөргөөр нөлөөлж байвал мэргэжлийн эмчийн тусламж авах хэрэгтэй. Мөн түрүү булчирхайн томролын илрүүлэг, хавдрын урьдчилан сэргийлэх үзлэгт тогтмол хамрагдаж хэвших чухал.