Түлэнхийн төвгүй 10 жил болж байхад ХЗДХЯ, Монголбанк, Улсын мөрдөн байцаах газрын шинэ байрууд жил орчмын хугацаанд ашиглалтад оров

Гэрэл зургийг MPA агентлагийн онцгой зөвшөөрөлтэйгөөр ашиглав

Манай улс Түлэнхийн төв эмнэлэггүйгээр 10 жилийн нүүр үзэж байна. Энэ хугацаанд түлэнхийн шалтгаантай өвчтөнүүдийг Гэмтэл, согог судлалын үндэсний төвийн Хүүхдийн гэмтэл согогийн нэгдүгээр тасгийн байранд хүлээн авч, үйлчилгээ үзүүлж ирсэн юм.

Дээвэр нурсан гэсэн шалтгаанаар анх тус эмнэлгийн барилгыг акталж, шинээр барих шийдвэрийг 2012 онд гаргаж байв. Ийнхүү шийдвэр гарснаас таван жилийн дараа буюу 2017 онд эмнэлгийн барилгын ажил эхэлсэн ч одоо хүртэл ашиглалтад ороогүй байна.

Гэтэл зарим төрийн байгууллагын барилгаа шинэчлэх ажил богино хугацаанд явагдаж сүндэрлэсээр байна. Тухайлбал, Улсын мөрдөн байцаах газрын шинэ байрыг наймхан сарын хугацаанд барьж, ашиглалтад оруулсан. 2018 оны дөрөвдүгээр сарын 20-ны өдөр ЦЕГ-ын төв байрны дэргэд Улсын мөрдөн байцаах газрын барилгын шавыг тавьж байв. Тэгвэл тухайн оны арванхоёрдугаар сарын 20-нд шинэ барилгын нээлтийг хийж, тууз хайчилсан. Нэг ёсондоо есөн давхар барилгыг наймхан сарын дотор барьж дуусжээ.
Хууль зүй, дотоод хэргийн яам, Монголбанкны байрны өргөтгөлийн ажил нэг жилийн хугацаанд үргэлжилсэн байна.
Тагнуулын ерөнхий газрын байрны өргөтгөл мөн л богино хугацаанд гүйцэтгэгдэж, ашиглалтад орсон юм.
Төрийн тусгай албан хаагчдын нэгдсэн эмнэлгийн барилга таван жил орчмын дараа ашиглалтад орж байжээ.

Түлэнхийн төвийн асуудлаар сонгуулийн жилүүдэд нэг шуугиад өнгөрдөг болсон. Удахгүй ашиглалтад оруулна хэмээн албан тушаалтнууд мэдэгддэг ч харамсалтай нь өнөөдрийг хүртэл уг төв байргүй хэвээр байна. Гэтэл энэ олон жилийн хугацаанд эмнэлгийн газрын 60 хувьд нь хувийн орон сууц, оффисын барилга барьж хувийн хэвшилд шилжүүлсэн байгааг олж илрүүлснээ "Энхрий үрс халуун сэтгэл" НҮТББ-ын тэргүүн ГССҮТ-ийн Мэдээгүйжүүлэг, эрчимт эмчилгээний эмч, Эрх зүйн магистрант О.Энхмаа ил болгон мэдээлсэн билээ.

Тус эмнэлгийг барих анхны төсөвт өртөг 7.9 тэрбум төгрөг байсан бол өнгөрсөн хугацаанд нэмэгдсээр зардал нь бараг гурав дахин нэмэгджээ. Кувейтийн сангийн буцалтгүй тусламжаар 10 орчим тэрбум төгрөгийн санхүүжилтийг авсан байна.

Сүхбаатар дүүргийн XI хорооны нутаг дэвсгэрт баригдаж буй Түлэнхийн төвийн барилга хэзээ ашиглалтад орох талаар холбогдох албаны хүмүүсээс тодрууллаа.

Түлэнхийн төвийн А блокийг ашиглалтад оруулах хүсэлтээ өгсөн

Энэ талаар Эрүүл мэндийн яамнаас тодруулахад “Барилгын тухай хуулийн 48.4-т заасны дагуу Түлэнхийн төв эмнэлгийг хэсэгчилж ашиглалтад оруулахаар ажиллаж байна.

Хоёрдугаар сарын 9-нд бид хуралдаж, Хотын стандарт орчны аюулгүй байдлын хяналт зохицуулалтын газарт Түлэнхийн төвийн А блокийг ашиглалтад оруулах хүсэлтээ өгсөн. Ирэх долоо хоногт улсын комисс ажиллана” гэлээ.

Барилгын тухай хуулийн 48.4-т Цогцолбор барилга байгууламжийн технологийн хувьд нэгдмэл бус бүрдэл хэсгийг хэсэгчлэн энэ хуулийн 48.1-д зааснаар ашиглалтад оруулж болно гэж заажээ.

Хоёр сар орчмын дараа хоёрдугаар блокийн барилгыг хүлээж авна

Түлэнхийн төв эмнэлэг яагаад ашиглалтад орохгүй удаад буй талаар ГССҮТ-ийн харьяа Түлэнхийн төвийн ашиглалтын өмнөх захиргааны дарга, их эмч, О.Хишигсүрэн “Энэ нь барилгын ажилтай холбоотой. Тоног төхөөрөмж бэлэн, санхүүжилт шийдэгдсэн. ГССҮТ, Эрүүл мэндийн яамнаас шалтгаалах зүйл байхгүй” гэлээ.

Харин хэзээ нүүж орох тухайд “Улсын комисс Түлэнхийн төвийн байран дээр ажиллаад хүлээгээд авбал эхний ээлжид түлэнхийн тасаг нүүж орно. Харин хоёрдугаар блокийн барилгын ажил дуусаагүй байгаа. Уг ажлыг хурдлуулах тал дээр шаардаж байна. Энэ хавар хоёр сар орчмын дараа хоёрдугаар блокийн барилгыг хүлээж авна гэсэн зорилттой ажиллаж байгаа” гэсэн юм.

Түлэнхийн төв эмнэлэг ашиглалтад орохгүй удсаар байвал түлэнхийн тасаг ачааллаа дийлэхгүйд хүрч буйг албаныхан онцолсоор ирсэн. Тэгвэл одоогийн байдлаар үйл ажиллагаа нь доголдсон хэвээрээ байгаа аж.

Уг тасаг 4,000-4,500 хүнд яаралтай тусламж үзүүлдэг бөгөөд тэдний 2,500-3,500 нь бага насны хүүхэд байдаг. Эмнэлэг ашиглалтад орвол харьцангуй дээрдэнэ. Гэхдээ хоёр блок хоёулаа ашиглалтад орж байж Түлэнхийн төвийн үйл ажиллагаа хэвийн үргэлжлэх юм байна.

Түлэнхийн тасаг 80 ортой бөгөөд 50 хүртэлх хувьд нь өвчтөн хүлээж авч байгаа гэдгийг их эмч О.Хишигсүрэн хэлэв.

Түлэнхийн төвийн барилгын өртөг 24 тэрбум төгрөг аж. Тодруулбал Нутгийн зам групп ХХК 16.5 тэрбум төгрөгийг Кувейтийн сангаас , Цаст констракшн ХХК 7.9 тэрбум төгрөгийг Монголын талаас авч, тус төвийн барилгын ажлыг гүйцэтгэж байгааг хэллээ.

Салбар яам болон Түлэнхийн тасгийнхны хэлснээр Монгол Улс хамгийн багадаа хоёр сарын дараа Түлэнхийн төв эмнэлэгтэй болох нь. Энэ удаа хэлсэн хугацаандаа ашиглалтад орох эсэхийг хүлээх л үлдлээ.