Коронавирусийн эсрэг вакцинжуулалтын цэгийн гадаах бодит байдал

Гэрэл зургийг mpa.mn

2021.04.22-ны 16:10 цаг.

Монголын Хүүхдийн ордны гадна талд хөгшин, залуу хамаагүй олон хүн уртаас урт дараалал үүсгэж зогсжээ. Вакциныхаа хоёр дахь тунг хийлгэх гэж байгаа хэрэг. Иргэдийн халдвар хамгааллын дэглэмийг баримтлуулахаар алба хаагчид зай бариулж, вакцины тоонд тааруулан хязгаарласан ч горьдлого үл тасран дараалал үүсгэн зогссоор. Удалгүй "Вакцин дууссан тул дугаарлах хэрэггүй, тараарай" хэмээн хэлээд хаалгаа хаалаа. 

Удаан дугаарлаж зогссон иргэд уурлаж, бухимдаж, дэмий л тэнд үүрэг гүйцэтгэж байсан алба хаагчид руу орилж, хашхирч, загнав. Гэвч вакцин дууссан хойно яалтай билээ, хэсэг бухимдлаад тарах тийшээ хандацгаав. 

 

Энэ бол зохион байгуулалт муутай, нэгдсэн удирдлагагүй мэт байгаагийн бодит тусгал.  

Хэн нэгэн рүү буруу чихэх гээгүй ч мэргэжлийн хүмүүсээ сонсоогүй нь үнэнд гүйцэгдсэн Засгийн газар, УОК өдөрт гарах халдварын тоог 700 давуулж байж сая нэг Хатуу хөл хорио тогтоох шийдвэр гаргасан. Гэвч Засгийн газрын эргэж буцсан, шийдэмгий бус, бөөрөнхийлсөн шийдвэрүүд дээр дурдсанчлан иргэдийг талцуулж, бухимдуулж, халдвар тарах нөхцөл рүү түлхсээр байна. 

Эргэж буцсан шийдвэрүүд ба бодит байдал:

2021.04.04 Ерөнхий сайд Л.Оюун-Эрдэнэ "4, 5 дугаар сарыг Дархлаажуулалтын сар болгон зарлаж, хүчин чадлыг хоёр дахин нэмэгдүүлж, үндэсний хэмжээнд вакцинжуулалтын ажлыг эхлүүлж байна".

2021.04.08 Засгийн газар "Тавдугаар сарын 1-ний дотор нийслэлийн насанд хүрсэн бүх хүнийг эхний тунд, 50-аас доошгүй хувийг хоёр дахь тунд хамруулна".

2021.04.09 НОК "Хөл хорионы үеэр дархлаажуулалтын суурин 120, явуулын 40 цэг ажиллана".

2021.04.09 ЭМЯ "Дархлаажуулалтыг 15 хоногийн хугацаанд түр зогсооно. Дархлаажуулалтыг үргэлжүүлсэн нөхцөлд вакцин тариулах гэсэн хүмүүсийн хөдөлгөөн тасрахгүй. Дархлаажуулалтын цэгт олон хүн цугларч, “Улаан” түвшинд мөрдөгдөх ёстой халдвар хамгааллын дэглэм зөрчигдөх, нэг дор олон хүн цугларч 15-30 минут түүнээс дээш хугацаанд байх зэрэг хэд хэдэн шалтгааны улмаас...". 

2021.04.10 ЭМ-ийн сайд С.Энхболд "Гэхдээ бидэнд олон хүнийг вакцинд хамруулах шаардлага байгаа тул хөл хорионы үед 60-аас дээш насны архаг хууч өвчтэй ахмад настнуудыг гэрээр нь вакцинжуулахаар явуулын баг гаргах төлөвлөгөөтэй байна".

2021.04.19 НОК "Хариу арга хэмжээний багт ажиллаж буй 13,836 хүнийг дархлаажуулалтын 34 цэгээр дамжуулж хоёр дахь тунд хамруулна". 

2021.04.22 Бодит байдал дээр иргэд хоёр дахь тунгаа хийлгэхээр өглөөний 05:00-06:00 цагаас дугаарлаж, халдвар хамгааллын дэглэм бүрэн алдагдав. 

Харин хатуу хөл хорио тогтоосон хугацаа дуусахад гурав хоног дутуу байна. 

Хэдийгээр дөрөв, тавдугаар сард дархлаажуулалтыг хоёр дахин нэмэгдүүлнэ хэмээн Ерөнхий сайд Л.Оюун-Эрдэнэ мэдээлж байсан ч өөрсдөөс шалтгаалахгүй нөхцөл байдлын улмаас 15 хоногийн хугацаанд дархлаажуулалтыг зогсоохоор болсон тухай ЭМЯ-наас дөрөвдүгээр сарын 9-нд албан ёсоор мэдээлэхэд иргэд ойлгосон. Өөрсдөө үйлдвэрлэдэггүйгээс хойш яая гэх вэ гээд хүлээсэн. 

Гэвч УОК, НОК, Шуурхай штабын уялдаа холбоогүй, гаргасан шийдвэр нь ганц хоёрхон хоногийн дотор 360 хэм эргэдэг, өгч байгаа мэдээллүүд нь зөрүүтэй энэ байдлаас болж иргэд төөрөлдөж, бухимдаж байна.

2021.04.22-ны 16:25 цаг.

Хүүхдийн ордны гадна "Та нар иргэддээ олигтой үйлчил л дээ. Вакцин нь дуусаж байсан бол түрүүнээс хойш хэлээд тараахгүй энэ олон хүнийг зогсоогоод... Тоог нь ядаж хэлдэг юм байгаа биз дээ" хэмээн 70 дөхөж байгаа болов уу гэмээр хөгшин бухимдан үглэсээр булан тойрон одлоо.