#UNLOCK 102: Зоригтой манлайл

daretolead.brenebrown.com

Судлаач Брене Браун "Dare to lead" номоороо дамжуулан "Эмзэг байдлаа хүлээн зөвшөөр, тэгж байж зоригжих болно" гэдгийг тунхагласан юм.

Хэдэн арван жилийн турш эмзэг байх нь сул доройн шинж гэж тодорхойлж ирснийг Брене Браун 20 гаруй жилийн туршид хийсэн судалгааныхаа үр дүнд бичсэн эл бүтээлээрээ шинэчилсэн хэмээж болно. Тэрбээр 2010 онд "Эмзэг байдлын хүч" буюу "The Power of vulnerability" хэмээх илтгэл тавьсан нь TEDTalks-ийн бүх цагийн хамгийн их үзэлттэй илтгэлийн нэг болсон билээ.

"Dare to lead" номыг сонсох:

UNLOCK Podcast · #108 Dare to lead

Номын санаануудаас онцлон дурдвал:

Манлайлал бол өөрийн сэтгэл хөдлөлийг удирдаж сурсныхаа дараагаар бусдын сэтгэл хөдлөлийг зөв чиглүүлж чаддаг болохын нэр юм. Энэ бол бусдын чадварыг олж харж, түүнийг нь хөгжүүлэхэд туслах, нөхцөл болзлоор хангах үүрэгтэй билээ.
Эмзэг байдал гэдэг нь тодорхойгүй үед, эрсдэлтэй байдалд, хэн нэгэнтэй ярилцах зэрэгт мэдрэгдэх сэтгэл хөдлөл хэмээн зохиогч тодорхойлсон байна.
Эмзэг байдал бол бүхий л сэтгэл хөдлөлийн голомт. Үүнийг мэдэрч байж сайн, муу бүхий л сэтгэл хөдлөлийг мэдэрч чадна. Ингэж гэмээнэ амьдрал утга учиртай болдог тухай номд өгүүлжээ.
Өөртөө богино хугацааны хүлээлт үүсгэхгүйгээр эцсийн мөчийг хүртэл тэснэ гэх хатуу итгэлтэй бай.
Баяр хөөр мэдрэх боломжийг бүү алд. Аз жаргалтай мөч маань хоромхон зуурынх байхвий гэж сэтгэл зовних үе гардаг. Манлайлагчдын хувьд ажилтнууддаа хэдий талархаж байвч сайшааж магтвал хий хөөрчихвий гэдгээс болгоомжилж, талархлыг хойш тавьдаг. Гэхдээ байгаа зүйлдээ талархах үедээ хүн дараа дараагийн хүнд хатуу цагийг даван туулах сэтгэлийн хат, уян хатан чанарыг олж авдаг.
Мэдрэмжийнхээ үндэс шалтгааныг ол. Таагүй мэдрэмж төрөхөд мэдээ алдуулагч буюу архи, тамхи, амттан идэх, зурагт үзэх гэх мэтээр мэдрэмжээ сарниулахыг зарим хүн хичээдэг. Гэвч энэ нь асуудлыг шийдэхгүй тул ямар асуудлаас үүдэн таагүй мэдрэмж төрснийг эрэлхийлэх хэрэгтэй.
Бусдын оронд өөрийгөө тавьж үзэх чадварт суралц. Үүний тулд бусад хүн ертөнцийг хэрхэн харж байгаагаар харахыг хичээ, бусдыг битгий шүүмжил, бусдын мэдрэмжийг ойлгохыг хичээгээд үзээрэй.
Үнэт зүйлдээ харшлах зүйлийг бүү хий.
Сониуч бай. Мэдэхгүйгээ хүлээн зөвшөөрч, шинийг мэдэхийг, ойлгохыг эрмэлз.
Бусдад итгэх зоригтой бай. Итгэл бол менежер болон ажилтнуудын дундах хамгийн чухал зүйл, байгууллагын амин сүнс нь юм.
Зоригтой байна гэдэг нь өөрийгөө ялан дийлэх тухай ойлголт юм. Мөн зоригтой байдал нь бусдад "халдварладаг". Зоригтой байгаа хүний дэргэд бусад нь зоригжиж, итгэлцэл төрдөг. Энэ тохиолдолд нэгэндээ хүлээцтэй хандаж, хүндэтгэсэн, харилцан ойлголцсон шийдвэр гардаг.