Хоцрогдсон бодлоготой, хойно үлдсэн Улаанбаатар хот

Гэрэл зургийг MPA.mn

Нийслэлийн Засаг дарга бөгөөд Улаанбаатар хотын захирагчийн 2020-2024 оны үйл ажиллагааны хөтөлбөрийн төсөлд санал авах хуудас явж буйг сонсоод ажил болгон уншиж танилцлаа.

Мэргэжлийнхээ дагуу мэдээж байгаль орчин, ногоон хөгжил, уур амьсгалын өөрчлөлт, амьдрахад таатай хотын бодлого төлөвлөлт дээр юу туссан байгааг онцгойлон уншиж үзэв. Урам хугарч, ичив.

Эрхэм хотын дарга та цар тахалтай тэмцээд нойр, хоолгүй зүдэрч явааг тань бид бүгдээрээ ойлгосон. Цар тахал дуусахтай зэрэгцээд Улаанбаатар хот маань хөгжлийн шинэ шатанд гарахгүй юмуу? Ядаж зөв төлөвлөөд аль нэг хэсгээсээ арай сайжрахгүй юмуу? Хаанаас цуглуулж нийлүүлж бичсэн нийтэд хүртээлгүй төсвийн их зарлага вэ? Та бүхэн өөрсдөө энэ нэр томъёонуудаа онолын түвшинд ойлгож байгаа юу?

Иргэдийн оролцоог энэ мэтээр хангаж буй нь сайн боловч ийм муу боловсруулсан төсөлд бүр ч муу саналууд ирнэ. Иргэдээс ирсэн саналаа нэгтгээд ирэх 4 жилд улсынхаа нийгэм, эдийн засаг, соёлын төв болсон хотыг ингэж хөгжүүлэх гэж байна гэж ойлгов.

Эрхэм уншигч Улаанбаатар хотын иргэнд танд зөвхөн Ногоон хөгжлийн бодлого гэсэн тавдугаар хэсгийг тоймлон хэлбэл ирэх 4 жилд:

Одоо төсөлд тусаж буй заалтуудаас	Учир зүйг нь ойлгох гэж буй миний бодол
Цэцэрлэгжүүлэлт ногоон байгууламж нэмэгдүүлэх мастер төлөвлөгөөг хэрэгжүүлнэ	Энэ төлөвлөгөө нь хэдийн хоцрогдсон бөгөөд ямар ч тооцоо үндэслэлгүй, олон улсын практикт байхгүй
Үндэсний цэцэрлэгт хүрээлэнгийн тохижилтыг үргэлжлүүлэн, шарилжгүй хот болно	Тэгш хүртээмжийн тухай бид бодох ёстой бөгөөд хотын гудамж талбай, дүүрэгт бүрд цэцэрлэгтэй болгох талд анхаармаар байна
Эмнэлэг, сургууль, цэцэрлэг, тоглоомын талбайг тохижуулах замаар тоосжилтыг бууруулна	Хот төлөвлөлтийн бусад заалтуудтайгаа уялдуулмаар. Яг энэ байдлаар өнгөрсөн жилүүдэд хэдэн арван тэрбумаар элдэв хэнд ч хэрэггүй үзэмжгүй тохижилтууд хийсэн
Сайжруулсан түлшээ үргэлжлүүлэн утааг 80 хувь хүртэл бууруулна	Ирэх 4 жилдээ түлшний хэрүүлээ хийсээр л явах нь. Нүүрс түлээ орлуулах өөр бусад шийдэл байдаг тухай дуулгахсан
Хөрсний бохирдлыг бууруулах хөтөлбөр, арга хэмжээ боловсруулж хэрэгжүүлнэ	Энэ зорилтыг сүүлийн 10 жил баттай ярьсан боловч одоог хүртэл хөтөлбөр нь гараагүй л байгаа бололтой
Хог хаягдлын үйлчилгээний төлбөр, хураамж төлөх нээлттэй ил тод хялбаршуулсан цахим систем нэвтрүүлнэ	Аль нэг том цахим систем дээрээ суулгаж өгч болдоггүй аж. Жишээлбэл Ухаалаг хол гэсэн заалт дээрээ Иргэн хуулийн этгээдэд зориулсан газрын удирдлагын нэгдсэн цахим систем нэвтрүүлнэ гэдэгтэй уях боломж байхгүй юу? Энэ мэт маш олон энд тэнд цахим систем хөгжүүлэх заалтууд байна.
Байгаль орчныг хамгаалах, нөхөн сэргээх ажлыг эрчимжүүлэн орчны бохирдол, доройтлыг бууруулж, экосистемийн тэнцвэрт байдлыг хадгална	Экосистемийн тэнцвэр ярьсаар байтал энэ хотын иргэд чинь бохирдолдоо хордож мутацид орох нь. Иргэдэд амьдрахад таатай орчин нөхцөл илүү чухал биш үү?
Нийслэлийн хэмжээнд иргэдийн эрүүл, ая тухтай амьдрах орчны аюулгүй байдлыг хангах, хотын стандарт, норм дүрмийг боловсруулж, мөрдүүлнэ.	Өмнөх Засаг дарга С.Амарсайхан гишүүн маань өчнөөн тэрбум төгрөгөөр стандарт боловсруулах нэртэйгээр цаас үйлдвэрлэж байгаад явсан. Түүнийг нь батлаад хэрэгжүүлэх эрхзүйн орчин бэлэн биш байхад дахиад стандарт, норм боловсруулах юмуу?
Уул уурхайн олборлолтын улмаас эвдэгдсэн талбайг үе шаттайгаар нөхөн сэргээж, сөрөг нөлөөллийг бууруулна.	Үнэнээсээ яриад байна уу? Улаанбаатар хотын ногоон хөгжилд энэ л бүр дутагдаад байж уу? Хэний хөрөнгөөр хаанахын уурхайн нөхөн сэргээлтийг хийх гэж байгаа юм бэ?
Ногоон барилгын стандарт боловсруулж нэвтрүүлсэн байна.	Уучлаарай Засаг даргаа, үүнийг Барилга хот байгуулалтын яам хийдэг ажил санагдаж байна. Та болон танай удирдлагууд чиг үүргээ сайтар ойлгоно уу. Тэгээд ч бэлэн боловсруулагдсан ногоон барилгын стандарт Барилга хот байгуулалтын яамны хаа нэгтээ тоосонд дарагдаад хэвтэж буй.

Зөвхөн ногоон хөгжлийн бодлого гэсэн 4 нүүрийг шүүн унштал ийм байлаа.

Энд ногоон ажлын байр, ногоон үйлдвэрлэл, эдийн засаг, уур амьсгалын өөрчлөлтийн сөрөг нөлөөллийг бууруулах, ногоон санхүүжилт татах замаар олон улсын төсөл хөтөлбөрүүд хэрэгжүүлэх, технологи дата ашиглан төлөвлөлт хийх, орчны бохирдлыг бууруулахад инновац шинжлэх ухааны ололт ашиглах тухай юу ч алга.

Та бүхэн ийм хөтөлбөрийг батлан, үр ашиггүй дэмий ажлуудыг давтан давтан хийж нийслэлийн төсвөөр тоглохоо болино уу! Иргэдийн санал авч дууссан бол эргүүлээд олон улсын мэргэжилтнүүд, салбарын экспертүүдийг оролцуулж мөрийн хөтөлбөрөө сайжруулна уу!

Бидэнд одоо улиг болсон, үр дүнгээ өгдөггүй ажлуудаа давтан хийж суух төсөв мөнгө, цаг хугацааны ч тансаглал байхгүй болсон. Бид хөгжлийн бодлогоороо хамгийн адагт, хүн амьдрахад хамгийн таагүй дайнтай хотуудын жишигтэй ойролцоо нөхцөлд амьдарч байна. Хотыг удирдахад хүчтэй манлайлал, академик мэдлэг туршлага хэрэгтэй. Та суралцаагүй байж болох ч туслаад өгөхөд бэлэн олон улсын экспертүүд бэлэн байдаг юм шүү. Гагцхүү жаахан сэтгэл, цаг гаргаад анхаарч ажиллаад өгөх хэрэгтэй байна.

Уншигч та ч бас мөрийн хөтөлбөрийн төслийг доорх хаягаар үзэж бусад заалтуудтай танилцах боломжтой бөгөөд ирэх 4 жил улсын нийслэлээ хөгжүүлэх гэж буй Засаг даргадаа тусламж дэмжлэг үзүүлэхийг бодоорой.

ЭНД дарж саналаа өгөх боломжтой.