UNSICK PODCAST #23: Коронавирусийн зарим нэг нотолгоонд суурилсан мэдээлэл

Коронавирус хэмээх шинэ төрлийн вирус дэлхийд үүсэж бий болоод сар хүрээгүй байгаа билээ. Энэ богино хугацаанд анагаах ухааны гайхамшигт хөгжлийн ачаар тодорхой дата, судалгааны үндсэн дээр нотолгоонд суурилсан мэдээлэл бий болж байна (2020.01.27).

Коронавирусийн халдвар

• Уг вирусийн нууц хугацаа бол 2–14 хоног. Энэ нь тухайн хүн уг вирусийн халдвар авснаас хойш шинж тэмдэг илэрч, халдварт өвчин үүсэх хүртэлх хугацаа юм.
• Зонхилох шинж тэмдэгт халуурах (98%), ханиалгах (75%), амьсгаадах, булчингаар өвдөх ба ядарч сульдах шинж тэмдэг илэрдэг. Коронавирусээр өвдөхөд тухайн вирусийн халдварыг илтгэх өвөрмөц зовиур шинж тэмдэг байхгүй гэж хэлж болно. Энэ үед ханиад томуу, уушгины хатгалгаа эмгэгтэй төстэй зовиур шинж тэмдэг илэрнэ.
• Цээжний рентген зургаар ихэвчлэн 2 талдаа нэвчдэст уушгины үрэвсэл үүсгэсэн байдаг. Уг вирусийн халдвараар өвчлөхөд уушгины үрэвсэл үүсэж, хүндрэх магадлалтай юм. 
• Үхлийн шалтгаан бол амьсгалын дутагдал, сепсис шокоор ихэвчлэн нас барж байна (нас баралтын хувь 3%).

 

Оношилгоо

Уг вирусийн халдварыг ханиад томуу, уушгины хатгалгаатай төстэй шинж тэмдэг илэрсэн, 14 хонгийн дотор Хятад улсын Ухань, Хувэй мужуудаар зорчсон эсвэл 2019-nCoV халдвартай хүнтэй хавьтсан, тээвэрлэсэн тохиолдлыг сэжиглэдэг. Ханиад томуу, уушгины хатгалгаатай тохиолдол бүрийг тэр бүр сэжиглэж баталгаажуулах шинжилгээнд хамруулахгүй, харин тархварзүйн өгүүлэмжтэй эсвэл шаардлагатай тохиолдлыг сэжиглэж баталгаажуулах шинжилгээ хийдэг. 

2019-nCo вирусийн халдварыг ихэвчлэн “Real time RTPCR” ба “next-generation sequencing” хэмээх өндөр түвшний молекул биологийн шинжилгээгээр баталгаажуулдаг. Ийм төрлийн молекул биологийн шинжилгээ өндөр түвшний лаборатори, урвалж бодис шаарддаг. Шинэ төрлийн вирус учраас Монгол Улс төдийгүй дэлхий нийт бэлэн байгаагүй билээ.

Эмчилгээ

Уг вирусийн халдвар вирусийн шалтгаант халдварт өвчин учраас өвөрмөц эмчилгээ шийдлээ олоогүй байна. Мөн шинэ төрлийн вирус учраас урьдчилан сэргийлэх вакцин гаргаж амжаагүй. Коронавирусийн халдвараар өвчилсөн хүнд ихэвчлэн хүчилтөрөгч өгөх, шингэн нөхөх, шинж тэмдгийн эсрэг эмчилгээ хийнэ.

/Unsick podcast-аас дэлгэрүүлж сонсож болно/

Эх сурвалж: thelancet.com