2019 оны 11 сарын 28
Хөрөнгийн зах зээл бол баялгийг тэгш хуваарилах, улстөрийг цэвэрлэх хамгийн үр ашигтай систем юм.

Алтны ханшийн дараагийн том давлагаа хэзээ эхлэх вэ?

2019 оны наймдугаар сарын 30-нд “Цуврал3: Алт дэлхийн зах зээлд гялалзах уу? галзуурах уу?” сэдэвт ээлжит нийтлэлээ хүргэж байж. Өмнөх нийтлэлийг энд дарж үзнэ үү. Тэр үед ханш 1,545 байсан бол одоо 1,456 болж буурчээ. Харин энэ удаад ханш яагаад буурав? Цаашид хэрхэх талаар товч дүгнэлтийг хүргэе.

ФА31 тохиролцоо амжилтанд хүрэх эерэг хүлээлтээр алтны ханш буурч байна

Наймдугаар сарын 30-аас хойш гадаад худалдааны дайн намжихийн зэрэгцээ АНУ-ын ХНС мөнгөний зөөлөн бодлогыг урт хугацаанд тууштай баримтлахгүй гэдгээ зарлаад амжсан. Аравдугаар сарын 11-ны өдөр талууд хэлэлцээрийн ширээний ард суусан бөгөөд ФАЗ1 хэмээх тохиролцоог хийхээр болсон билээ. Уг тохиролцоонд дараах нөхцөлүүд багтсан юм. 
  • Ирэх хоёр жилийн дотор Хятад улс АНУ-аас импортлодог хөдөө аж ахуйн бүтээгдэхүүнээ өмнөх үеийн хамгийн их болох 16 тэрбум ам.доллараас 40-50 тэрбум ам.доллар хүртэл нэмэгдүүлэхээр боллоо.
  • Хятад улс санхүүгийн салбараа нээлттэй болгох үйл явцыг хурдлуулахаар болов. Тухайлбал ирэх оны 1-р сарын нэгнээс фьючерсийн компаниуд, 4-р сарын нэгнээс хамтын сангууд, 12-р сарын нэгнээс үнэт цаасны компаниуд эзэмшлийн/өмчлөлийн хязгаараа цуцлахаар шийджээ. 
  • Зах зээлд суурилсан валютын пакт болон юаний ханшийн ил тод байдлын дэглэмийг баримтлахаар тохиролцсон ч тодорохой мэдээлэл өгөөгүй байна.
  • Технологийн солилцоо болон оюуны өмчийн тухай эхний ээлжийн зөвшилцөлд хүрчээ. Гэвч Хятадын зүгээс тодорхой амлалт өгөөгүй байгаа учраас цааш хэлэлцээрийг "Хоёр дугаар шатны" уулзалт дээр ярилцахаар болжээ.
  • Хоёр талаас зөвлөлдөx болон худалдааг өргөжүүлэх журмаар өөрсдийн хүмүүсийг томилов.
  • АНУ-ын зүгээс 10-р сарын 15-аас хэрэгжих байсан тарифын нэмэлтээ хойшлуулав. (Хятадын 250 тэрбум ам.долларын бүтээгдэхүүн дээр 25%-аас 30%-ийн тариф)
Өнгөрөгч Мягмар гарагт Трамп ФАЗ1 гэрээг зурахад ихээхэн ойртсон бөгөөд удахгүй талууд баталгаажуулна гэв. Мөн Хятадын талаас гадаад худалдааны маргааны голлох сэдэв болоод буй оюуны өмчийн хулгайг бууруулах, зогсоох асуудлаар хуулийн өөрчлөлт оруулж юуг оюуны өмчийн хулгай гэж үзэх талаарх босгоо бууруулахын зэрэгцээ уг төрлийн гэмт хэрэгт ногдуулах торгуулийг өсгөсөн байна. Ийнхүү эерэг хүлээлт давамгайлж байгаа нь хөрөнгийн зах зээл өсөх, алтны ханш унах нөхцөлийг бүрдүүлж байгаа билээ. 
 

Урт хугацаанд талууд бүрэн шийдэлд хүрэх үү?

АНУ нь Хятадыг өөрийн эдийн засгийг удирдаж буй арга барилаа өөрчлөхийг шаардаж буй нь Хятадын хувьд хамгийн хүнд сорилт болж эхлээд байна. АНУ-ын зүгээс Хятад улс чөлөөт эдийн засаг, чөлөөт худалдааг дэмжиж байгаа юм бол өөрийн эдийн засгийн салбаруудыг нээлттэй болгож Хятадын эдийн засагт чөлөөт өрсөлдөөнийг бий болгохыг шаардаж буй юм. Төрийн өмчит олон тооны компанитай, нэгдсэн чиг удирдлагаар хөдөлдөг Хятадын хувьд АНУ-ын шаардлагыг шууд хүлээж авах боломжгүй нь тодорхой. Иймээс өнгөн дээрээ талууд тодорхой асуудлуудаар тохиролцож болох ч гэлээ АНУ-ын шаардлагыг бүрэн биелүүлэхэд хүндрэлтэй юм.

Трампад ч тодорхой асуудлаар тохиролцоонд хүрэх нь улс төрийн орчинд хэрэгтэй байгаа билээ. Харин дунд хугацааг харвал АНУ-ын Хятадад ногдуулсан тарифын сөрөг нөлөөлөл дөнгөж эхэлж байна гэж хэлэхэд болно. 2018 оны хоёрдугаар хагасаас эхлэн томоохон тарифууд ногдуулсан нь өдгөө эдийн засаг сөрөг нөлөөлөл үзүүлж байгаа бол 2019 оны есдүгээр сард ногдуулсан дараагийн ээлжийн томоохон тарифуудын сөрөг нөлөөлөл ирэх жилийн хоёрдугаар хагасаас хүчтэй нөлөөлж эхлэх юм. Энэ нь алтны ханш өсөх суурь шалтгаануудыг нэг болох юм.

Гадаад худалдааны дайнаас гадна дэлхийд мөнгөний зөөлөн бодлого давамгайлж байна

Эдийн засгийн нөхцөл байдлаас үүдэн Ази болон Европын орнууд мөнгөний зөөлөн бодлого барьсаар байгаа нь алтны ханшийг дэмжиж байна. АНУ улс ч зөөлөн бодлогоруу өнгийж эхэлсэн нь алтны ханш өсөх томоохон суурь шалтгаан болох юм. Европ, Японы төв банкуудын бодлогын хүү олон жилийн доод түвшинд хүрж бодит хүүгийн өгөөж буурах, сөрөг түвшинд хүрээд байна. Ийм нөхцөлд үнэ цэнээ үл алдах алтны ханш өсдөг жамтай.

Алтаар баталгаажсан сангууд болон төв банкууд алтны нөөцөө өсгөж байна

Би өмнө нь Хятад болон ОХУ-ын төв банк алтны нөөцөө өсгөсөөр байгаа талаар дурьдаж байсан. Энэ байдал одоо ч үргэлжилж байна. Цаашид ч үргэлжлэх төлөвтэй байгаа. Үүнтэй зэрэгцэн алтаар баталгаажсан сангуудын алтны эзэмшил өссөөр байгаа нь анхаарал татаж байна. Энэ оны дөрөвдүгээр сараас эхлэн Хойд Америк болон Европын сангуудын алтны хэмжээ хурдацтай өсч аравдугаар сарын эцсийн байдлаар 1,460 тн болон 1,319 тн-д хүрчээ. Магадгүй энэхүү өсөлт нь ирээдүйн томоохон өсөлтийн талаарх сигнал байж болох юм.

 

Техник шинжилгээ юу хэлж байна вэ?

Давлагааны онолын дагуу ханшийн гуравдахь өсөлт тодорхой хугацааны дараа үүсэх магадлалтай байна. Гагцхүү ханшийн өсөлтийг дэмжих томоохон суурь шалтгаан юу байж болох талаар анхааралтай судлах нь маш чухал юм. Нарийвчилж харвал тодорхой хэмжээний уналт үүссэний дараа ханшийн өсөлт үүсэх магадлалтай гэж үзэж байна.

 

 

 
x