Маргааш төв талбай дээр болох "Улаанбаатарын мөнгөн шөнө-2025” арга хэмжээнд спортын салбарын олны танил эрхмүүд оролцоно
Маргааш буюу арванхоёрдугаар сарын 31-ний 21:00 цагт төв талбайд хуучин оноо үдэж, шинэ оноо угтах “Улаанбаатарын мөнгөн шөнө-2025” шоу тоглолт болно.
Нийслэлийн Соёл Урлагийн Газраас мэдээлснээр уг арга хэмжээнд
- 2025 оны 3x3 Дэлхийн аварга шалгаруулах тэмцээний мөнгөн медальт Монгол Улсын 3х3 эмэгтэй шигшээ багийн тамирчид
- Ой тогтоолтын Ази тивийн аварга, Дэлхийн хошой аварга, Оюуны Олимпын аварга, Гиннесийн рекорд эзэмшигч, Олон улсын Их мастер, Монгол Улсын Гавьяат тамирчин, Н.Энхшүр, Нармандахын Мөнхшүр нар
- 2015 оны UBS телевизийн "My Voice" тэмцээний шилдэг оролцогч, 2025 оны “Silkway star” олон улсын тэмцээний Гран-При, Алтан гадас одонт, дуучин Иозеф Червенка Мишээл
- Physical Asia шоунд Монгол улсаа төлөөлөн оролцсон багийн гишүүн, "One Championship" холбооны аваргын бүс эзэмшигч, холимог тулаанч, Монгол Улсын Гавьяат тамирчин Б.Энх-Оргил
- Netflix-ийн Physical Asia шоунд Монгол Улсаа төлөөлөн оролцсон “Алдар” спорт хороо, жүдо бөхийн Үндэсний шигшээ багийн тамирчин А.Адъяасүрэн нар оролцох юм байна.
Төв талбай дээр “Улаанбаатар хотын 3 мега” төслийн агуулгыг шингээсэн мөсөн хотхоныг байгуулж дуусжээ.
Мөсөн хотхон нь таван метрийн өндөртэй, тойрог хэлбэрийн хурдны зам, хоёр том гулсууртайгаар хийгдсэн бөгөөд Монголын уламжлалт 12 жилийн бэлгэдэл бүхий мөсөн баримал, долоон метрийн өндөртэй соёмботой мөсөн хөшөө, дөрвөн метрийн диаметртэй цагаан баавгайн мөсөн баримал, мөсөн метро, “2026” оныг тодотгосон баримал, гулгууртай байна.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
