Г.Ёндон: АМНАТ хөвөгч байх ёстой. Дараагийн Оюутолгой, Эрдэнэт нээгдэх боломжийг АМНАТ хааж байна

Б.Бадамгарав, IKon.mn

8 цаг 12 минутын өмнө

iKon.MN

Ашигт Малтмалын Нөөц Ашигласны Төлбөр(АМНАТ)-ийн тухай хуульд өөрчлөлт оруулах эсэх асуудал яригдаж буй энэ үед "Эрдэнэт Үйлдвэр" ТӨҮГ-ын Ерөнхий захирал Г.Ёндонгоос байр суурийг нь тодрууллаа.

Тэрбээр "Эрдэнэт үйлдвэр нь улс, орон нутагт төвлөрүүлж буй татвар хураамж чиглэлд уян хатан байх боломжтой. АМНАТ-ийг Эрдэнэт үйлдвэрт тусад нь авч үзэлгүйгээр ижилхэн бууруулж боломжтой. Эрдэнэт үйлдвэр АМНАТ-т 20 хувь төлдөг гэдэг ч үнэн хэрэгтээ 21.6 хувийг төлдөг.

Жишээлбэл Никель, лити дээр Хятад улс дангаараа интервенц хийж, үнийг нь бууруулаад гадаадын өрсөлдөгч нараа унагааж байсан. Ингэхэд Австрали улс никелийн аж ахуйн нэгжүүдээ унагахгүйн тулд никель дээрээ АМНАТ-өө байхгүй болгож байсан. Энэ бол ухаалаг бодлогын үр дүн.

АМНАТ бол "улаан шугам" шиг байж болохгүй. Гэтэл манайд АМНАТ гэж "улаан шугам" татчихаад, хөдөлгөөнгүй байлгадаг. Цагаан суварга, Хармагтай гээд орд хөдлөхөд бэлэн ч энэ шугамыг нь давж чадахгүй байгаа. АМНАТ бол хөвөгч хэлбэрээр байх ёстой. АМНАТ бол уул уурхайн гэхээс илүүтэй эдийн засгийн ойлголт. Зэсийн үнэ өсөх, буурахад АМНАТ хөдөлж байх ёстой. Мөн бүх ашигт малтмал дээр ижил байж ч болохгүй. Ашигт малтмалын төрөл, баяжуулалтын процессын зардал зэргээс шалтгаалж АМНАТ уян хатан байх ёстойг би хэлсээр байгаа.

Хэрэв Эрдэнэт үйлдвэрээс жилд дунджаар 1.8 их наяд төгрөг авдаг хэвээрээ байя гэвэл АМНАТ-өө бууруулаад, Засгийн газрын тогтоолоор ногдол ашиг хэлбэрээр авах боломжтой. Харин хууль дээрээ АМНАТ-өө бууруулах хэрэгтэй. Ингэвэл зэсийн бусад компани чадавхжих, шинэ компаниуд хайгуулын чиглэлээр орж ирэх боломж нээгдэнэ. Дараагийн Оюутолгой, Эрдэнэтийг нээх боломжийг АМНАТ хаагаад байгаа.

Эрдэнэт үйлдвэрийн АМНАТ-ийн зөрүү хэсэгт Хармагтай, Цагаан суварга ороод ирэх боломжтой. Цаашид энэ чиглэлийн яриа хэлэлцээ үргэлжилнэ байх" гэв.

Анхааруулга

Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!