Б.Бямбасайхан: Улаанбаатар хотын зарим байршилд ус зайлуулах шугам суурилуулах ажлын явц 85 хувьтай үргэлжилж байна

Гэрэл зургийг MPA агентлагийн онцгой зөвшөөрөлтэйгөөр ашиглав

-Улаанбаатар хотын үерийн эрсдэлээс сэргийлэх ажлуудын талаар Геодези, Усны Барилга, Байгууламжийн Газраас/ГУББН/ өнөөдөр танилцуулав.

Тус газрын дарга Б.Бямбасайхан “ГУББГ-аас энэ онд 26 төсөл хөтөлбөрийг хэрэгжүүлж байна. Үүнээс борооны ус зайлуулах шугамын ажил 10, замын ус зайлуулах шугам, худгийн арчлалт засварын ажил гурав, сэргээн засах ажил хоёр, лаг хагшаас цэвэрлэх ажил хоёр, хөрсний ус зайлуулах шугамын ажил хоёр, тохижилтын ажил хоёр, халиа, тошин багасгах ажил, насос станц, насост худгийн ажил, мониторингийн цооногийн ашиглалтын ажил, үерийн хамгаалалтын сувгийн ажлыг тус тус гүйцэтгэж байна.

26 төсөл хөтөлбөрөөс зургаан төсөл хөтөлбөрийг он дамжин хэрэгжүүлнэ. Үлдсэн 20 ажлыг энэ онд 100 хувь дуусгахаар төлөвлөн ажиллаж байна. Энэ онд дуусгах нийт ажлын гүйцэтгэл 85 хувьтай үргэлжилж байгаа” гэв. Дараах дөрвөн байршилд борооны ус зайлуулах шугамтай болжээ.

1. ХУД, 15 дугаар хороо, Энхтайвны гүүрний доод хэсгийн 628 метр урт зам талбайн ус зайлуулах шугамын ажил,
2. БГД, 5 дугаар хороо, Алтай хотхоны 14 дүгээр байр орчмын 412 метр урт борооны ус зайлуулах шугамын ажил,
3. БГД, 24, 26 дугаар хороо, Энгельсийн гудамжны 1,003 метр урт авто замын борооны ус зайлуулах шугамын шинэчлэл, өргөтгөлийн ажлын ажлын зураг төсөл,
4. ХУД, 3 дугаар хороо, ТЭЦ-3-ын арын уулзвараас Дунд голын гүүр хүртэлх 1,398 метр урт борооны ус зайлуулах шугамын ажлыг тус тус гүйцэтгэж дууссан хэмээн танилцууллаа.   
   Нийслэлийн 27 байршилд 48,323 метр.куб лаг хагшаас цэвэрлэсэн бол 13 байршилд насост худгийн засвар үйлчилгээ, хөрсний усны шугамын засвар ашиглалтын ажлын хүрээнд нийт 10 ширхэг үзлэгийн худгийн засвар арчлалтыг хийж гүйцэтгэжээ.